Хэгъэгум и Кубок кушъхьэфэчъэ спортым- кIэ къыдэхыгъэным фэгъэхьыгъэ зэнэкъокъур мэлылъфэгъум и 11-м республикэм икъэлэ шъхьаIэу Мыекъуапэ щыкIуагъ.

Трекым щызэхащэгъэ зэIукIэгъухэм бзылъфыгъэхэм яIэпэIэсэныгъэ къыщагъэлъэгъуагъ. Купым хэтхэу зэнэкъокъухэзэ, ауж къинэрэр зэIукIэгъум къыхагъэкIыщтыгъ.

Омскэ хэкум зыщызыгъэсэрэ Мария Иванцовам апэрэ чIыпIэр къыдихыгъ. Адыгэ Республикэм ихэшыпыкIыгъэ командэ Елизавета Арчибасовамрэ Таисия Чуренковамрэ тыжьыныр ыкIи джэрзыр къыфахьыгъэх.

Тикомандэ хэтхэм Адыгэ Республикэм изаслуженнэ тренерэу Алексей Войновыр япащ. Ащ зэрилъытэрэмкIэ, тибзылъфыгъэхэр медальхэм афэбанэхэзэ, ясэнаущыгъэ къызэIуахы.