Республикэм щыкIуагъ
Хэгъэгум кушъхьэфэчъэ спортымкIэ изэнэкъокъу Адыгэ Республикэм икъушъхьэ гъогухэм ащыкIуагъ.
Купэу зэхэтхэу спортсменхэм яIэпэIэсэныгъэ Мыекъопэ районым ит къушъхьэхэм къащагъэлъэгъуагъ. Километрэ 20-р къызакIум, Воронеж щыщэу Антон Поповым апэрэ чIыпIэр къыдихыгъ.
Адыгэ Республикэм кушъхьэфэчъэ спортымкIэ иеджапIэ зыщызыгъасэхэрэ Александр Евтушенкэр, СтIашъу Мамыр хэгъэгум изэIукIэгъухэм ахэлэжьагъэх, ау хагъэунэфыкIырэ чIыпIэхэм ащыщ къыдахыгъэп.
Шъачэ щырагъажьэ
Урысыем кушъхьэфэчъэ спортымкIэ изэнэкъокъу мэфэ пчъагъэрэ Шъачэ щыкIощт. Хъулъфыгъэхэм язэIукIэгъухэр мэлылъфэгъум и 12-м Шъачэ щырагъэжьэщтых. — Хэгъэгум ихэшыпыкIыгъэ командэ хэт хъулъфыгъэхэри зэIукIэгъухэм ахэлэжьэщтых. Адыгеим испортсменхэр медальхэм афэбэнэщтых, — къытиIуагъ республикэм кушъхьэфэчъэ спортымкIэ и Федерацие ипащэу Анатолий Лелюк.