Урысыем, Адыгеим янароднэ артистэу, композиторэу Дмитрий Шостакович ыцIэкIэ агъэнэфэгъэ шIухьафтыныр къызыфагъэшъошэгъэ Нэхэе Аслъан исимфоническэ музыкэ фэгъэхьыгъэ концерт республикэ филармонием щыкIощт.

Адыгеим къэралыгъо гъэпсыкIэ иIэу зыпсэурэр илъэси 100 зэрэхъурэм ипэгъокIэу респуб­ликэ филармонием и Къэралыгъо симфоническэ оркестрэ концертыр зэхещэ. Оркестрэм идирижерыр СтIашъу Къэплъан, художественнэ пащэр Урысыем изаслуженнэ артистэу, Къэбэр­тэе-Бэлъкъарым изаслуженнэ артистэу Темыркъанэ Петр.

Нэхэе Аслъан Адыгеим иапэрэ профессиональнэ композитор, Адыгэ Республикэм иком­позиторхэм я Союз итхьамат. МэщбэшIэ Исхьакъ ытхыгъэ романэу «Бзыикъо заом» техыгъэ апэрэ лъэпкъ оперэр, симфоническэ произведение инхэр А. Нэхаим ыусыгъэх. Адыгэ лъэпкъ музыкальнэ искусствэм зиушъомбгъуным лъапсэ фи­шIыгъ. Лъэхъаным диштэу адыгэ классическэ музыкэр зыусырэ композиторэу ар алъытэ. Республикэм итын анахь лъапIэу медалэу «Адыгеим и Щытхъузехьэр» къыфагъэшъошагъ, Урысыем и Правительствэ ипремие илауреат.

Концертым адыгэ лъэпкъ орэ­ды­шъохэр, фольклорым къы­хэ­хыгъэхэу композиторым оркестрэм пае зэригъэфагъэхэр, симфони- ческэ произведениехэр щыIущтых. 2022-рэ илъэсым, мэлылъфэгъум и 15-м пчыхьэзэхахьэр филармонием щыкIощт. Искусствэр зышIогъэшIэгъонхэр зэхэщакIохэм рагъэблагъэх.

ЕмтIылъ Нурбый.