Урысыем истудентхэм тхэквондомкIэ язэнэкъокъу Москва хэкум икъалэу Люберцы щыкIуагъ.

Адыгэ къэралыгъо университетым физкультурэмрэ дзюдомрэкIэ и Институт щеджэрэ Кристина Дюбинам, кг 73-рэ, ящэнэрэ чIыпIэр къыдихыгъ. Тренерэу Василий Есиным пшъашъэр тхэквондом фегъасэ.

— Кристина Дюбинар дэгъоу еджэ, общественнэ Iофхэм ягъэ­цэкIэн чанэу ахэлажьэ, ­— къытиIуагъ физкультурэмкIэ ыкIи дзюдомкIэ Институтым ипащэу Бгъуашэ Айдэмыр. — Зэнэкъокъу пэпчъ дэгъоу зыфегъэхьазыры. Адыгеим испортсмен анахь дэгъуи 10-у 2021-рэ илъэсым къы­хахыгъэхэм ащыщ.

Адыгэ Республикэм испорт еджапIэу N 2-м ипащэу Хъот Юныс изэгъэпшэнхэм къащыхигъэщыгъ Кристина Дюбинар Урысыем тхэквондомкIэ ихэшыпыкIыгъэ командэ зэрэхэтыр. Европэм иныбжьыкIэхэм ыкIи зыныбжь икъугъэхэм язэнэкъокъухэм гъогогъуи 2 джэрзыр къащихьыгъ. 2021-рэ илъэсым Урысыем и Кубок къыдихыгъ. Тхэквондор Олимпиадэ джэгунхэм ахэхьэрэ спорт лъэпъкъхэм ащыщ.

Кристина Дюбинам хэгъэгум щызэхащэщт зэIукIэгъухэм ахэлэжьэнэу зегъэхьазыры.

Сурэтым итхэр: сэмэгумкIэ къебгъэжьэнышъ Кристина Дюбинар ящэнэрэу щыт.