Урысыем иныбжьыкIэхэм, бзылъфыгъэхэм кушъхьэ­фэчъэ спортымкIэ язэнэкъокъу Адыгэ Республикэм щэкIо.

Москва, Санкт-Петербург, Са­ма­рэ, Иркутскэ, нэмыкI къэлэшхохэм защызыгъэсэрэ ныбжьыкIэхэр, зыныбжь икъугъэхэр Адыгэ Республикэм щызэIукIа­гъэх.

— Нэбгырэ 250-м нахьыбэ купищмэ ащызэнэкъокъу, — къы­тиIуагъ Адыгэ Республикэм кушъхьэфэчъэ спортымкIэ и Федерацие ипащэу, зэхэщэкIо купым хэтэу Анатолий Лелюк. — Мэлылъфэгъум и 6-м «Критериум» зыфиIорэм яIэпэIэсэныгъэ къыщагъэлъэгъуагъ.

Илъэс 15 — 16 зыныбжьхэм язэIукIэгъухэм пшъашъэхэр ахэлэжьагъэх. Елизавета Бор, Ангелина Новолодскаям, Юлия Чертихинам апэрэ чIыпIищыр къыдахыгъ.

Бзылъфыгъэхэм язэнэкъокъу Валерия Вагонен, Анастасия Печерских апэрэ чIыпIитIур къа­хьыгъ. ЗэкIэ спортсменкэхэр Санкт-Петербург щыщых. Москва зыщызыгъэсэрэ Софья Балаевам джэрзыр ыхьыгъ.

Адыгеим щапIугъэ Мария Брюхановар тиспортсменкэхэм къа­хэщыгъ.

— Хэгъэгум ибзылъфыгъэхэм язэнэкъокъу гъэшIэгъонэу макIо, тигуапэу тыхэлажьэ, — къыти­Iуагъ Санкт-Петербург къикIыгъэ Ангелина Новолодскаям.

Урысыем изэнэкъокъу мэлы­лъфэ­гъум и 9-м нэс Адыгеим щыкIощт.

Зэнэкъокъум хагъэунэфыкIырэ чIыпIэхэр къащыдэзыхыгъэмэ Анатолий Лелюк афэгушIуагъ, медальхэр, щытхъу тхылъхэр аритыжьыгъэх.