Адыгэ Республикэм и Къэралыгъо академическэ къэшъокIо ансамблэу «Налмэсым» иконцертхэр мы мафэхэм Урысыем икъалэхэм къащетых.

Хэгъэгум культурэмкIэ и Министерствэ ипрограммэу «Мы — Россия» зыфиIорэм «Нал­мэсыр» хэлажьэзэ хэгъэгум ишъо­лъырхэм концертхэр ащызэхещэх. Ащ дакIоу, «Налмэсыр» илъэс 85-рэ, къэралыгъо гъэ­псыкIэ иIэу Адыгеир зыпсэурэр илъэси 100 зэрэхъухэрэм афэгъэхьыгъэу тиансамблэ цIэрыIо иIэпэIэсэныгъэ хэгъэгум къыщегъэлъагъо.

— Къалэхэу Подольскэ, Великий Новгород, Псков, Великие Луки тиконцертхэр ащыкIуагъэх, — къытиIуагъ «Налмэсым» ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ язас­луженнэ артистэу, Адыгэ Рес­публикэм инароднэ артистэу Хъоджэе Аслъан. — Дэгъоу къытпэгъо­кIых, тикъашъохэр агу рехьых. Бэрэ Iэгу къытфытеохэзэ, къэшъуакIохэр икIэрыкIэу пчэгум къыращэжьых.

«IэкIыб къэралхэм ащыпсэурэ тилъэпкъэгъухэм язэхэт къа­шъо», «ШIуфэс къашъор», «ЗэфакIор», фэшъхьафхэри «Налмэсым» пчыхьэзэхахьэхэм къащешIы. Адыгэ шъуашэм идэхагъэ концертхэм къаще­гъэлъагъо.

Брянскэ, Железногорскэ, Белгород «Налмэсыр» къащышъощт. Адыгэ Республикэм ыцIэ лъагэу искусствэм щызыIэтырэ артистхэм тафэраз. Лъэпкъыбэ зыщыпсэурэ Урысыем мамыр псэукIэр щызыгъэпытэрэмэ ащыщ тилъапIэу «Налмэсыр».