Хэгъэгум футболымкIэ изэнэкъокъу апшъэрэ купым щэкIо. Мэлылъфэгъум и 1 — 3-м я 23-рэ ешIэгъухэр командэхэм яIагъэх.

ЗэIукIэгъухэр

«Рубин» — «Химки» — 2:3, «Арсенал» — «Ахмат» — 0:0, «Крылья Советов» — «Уфа» — 1:2, «Ростов» — «Нижний Новгород» — 1:2, «Локомотив» — «Спартак» — 1:0, «Краснодар» — «Динамо» — 0:1, ЦСКА — «Урал» — 2:2, «Шъачэ» — «Зенит» — 0:0.

Командэр истадион щешIэ зыхъукIэ, текIоныгъэр къыдихыщтэу нахь уегъэгугъэ. Арэу щытми, я 23-рэ зэIукIэгъухэм язэ­фэхьысыжьхэм къагъэлъагъорэр нэмыкI. «Локомотив» «Спартак» 1:0-у текIуагъ. Я 85-рэ такъи-къым Изидор къэлапчъэм пэчы­жьэу дауи, Iэгуаор чэрэгъузэ лэгъупкъопсым фэдэу быби, хъа­гъэм ифагъ.

ЕтIани дгъэшIагъорэр ешIэгъу уахътэм къыкIоцI «Локомотив» зэ ныIэп «Спартак» икъэлапчъэ зэрэдэуагъэр. КъэлэпчъэIутэу Александр Максименкэм инасып имызакъоу, иIэпэIэсэныгъи къы­хьыгъэп чэрэгъурэ Iэгуаор къызэкIидзэжьынэу.

«Рубин» зэIукIэгъур 2:2 ыухыщтэу гугъэзэ, ешIэгъур зыщау­хыщт уахътэм икъэлапчъэ Iэ­гуаор дигъэкIыгъ. «Динамэр» 1:0-у «Краснодар текIуагъ, пенальтикIэ хъагъэм Iэгуаор ридзагъ. Ду­наим футболымкIэ ифедерацие исудьяу Алексей Николаевым зэрилъытэ­рэмкIэ, судьям пенальтир ыгъэу­нэфынэу Iофхэр щытыгъэхэп. ЦСКА-р «Урал» зыдешIэм, аужырэ такъикъым судьям пенальтир ыгъэунэфын фэягъэ. ЦСКА-м иухъумакIо шапхъэхэр ыукъуа­гъэх. «Шъачэ» «Зенит» дэгъоу дешIагъ.

Судьяхэм ялажьэкIэ ешIэгъу­хэм кIэухэу афэхъурэм гумэкIыгъохэр къапкъырэкIых, командэхэм чIэнагъэхэр ашIых.

«Уфа» иешIэкIо ныбжьыкIэу Гамид Агаларовыр ухъумакIохэм къадзыхьагъэу щытыгъэми, псынкIэу ыпэкIэ илъыгъ, зэIукIэгъур аухынымкIэ такъикъ заулэ къэнагъэу хъагъэм Iэгуаор ри­дзагъ. Г. Агаларовыр хэгъэгум щыкIорэ зэнэкъокъум ешIэгъу 22-мэ ахэлэжьагъ, гъогогъу 15 къэлапчъэм Iэгуаор дидзагъ.

ЦСКА-м мыгъэ аштэгъэ Юсуф Языджи къэлапчъэм Iэгуаор димыдзэу ешIапIэм икIыжьырэп. ЦСКА-р «Урал» зыIокIэм пенальтикIэ Ю. Языджи хъагъэм Iэ­гуаор ридзагъ.

Апэ ишъыгъэ командитфыр медальхэм афэбанэх. «Зенит» дышъэр ыхьыщтэу бэмэ алъытэ. Тыжьыныр, джэрзыр къыдэзыхыщтхэр зэнэкъокъум къыгъэлъэ­гъощтых.

ЧIыпIэу зыдэщытхэр

1. «Зенит» — 49 2. «Динамо» — 46 3. ЦСКА — 43 4. «Шъачэ» — 39 5. «Локомотив» — 37 6. «Краснодар» — 36 7. «Ахмат» — 32 8. «Кр.Советов» — 32 9. Н. Новгород – 27 10. «Спартак» — 27 11. «Рубин» — 25 12. «Ростов» — 22 13. «Урал» — 21 14. «Арсенал» — 21 15. «Химки» — 21 16. «Уфа» — 21.

Ауж къинэхэрэм рэхьат яIэп. Апшъэрэ купым къыхэнэжьыхэ ашIоигъу. Командэ пэпчъ иешIакIэ зэрэхигъахъорэр къыхэтэгъэщы.

Я 24-рэ ешIэгъухэр

0.04 «Химки» — ЦСКА «Н.Новгород» — «Динамо» «Рубин» — «Краснодар» «Ахмат» — «Зенит» 10.04 «Урал» — «Кр.Советов» «Уфа» — «Шъачэ» «Спартак» — «Арсенал» «Ростов» — «Локомотив».