ЕджапIэм джыри мыкIохэрэ кIэлэцIыкIухэр дзюдом фэзыгъэсэрэ тренерхэм яшIэныгъэхэм ахагъэхъоным фэгъэхьыгъэ зэхахьэхэр гъэтхапэм и 18 – 31-м Мыекъуапэ щыкIуагъэх.

Мыекъопэ къэралыгъо технологическэ университетым щызэIукIагъэх Урысыем ишъолъыр­хэм къарыкIыгъэ тренерхэр. Университетым экологиемкIэ ифакультет ипащэу, биологие шIэныгъэхэмкIэ докторэу, профессорэу Галина Коноваловам тренерхэм ясеминар пэублэ гущыIэкIэ къызэIуихыгъ.

Илъэси 3 – 5 зыныбжь кIэлэцIыкIухэм Iоф адэзышIэрэ тренерхэм яшIэныгъэхэм ахагъэ­хъонымкIэ ящыкIэгъэ тхылъхэр Г. Коноваловам аритыгъэх. Зэхахьэм ащ къызэрэщиIуагъэу, кIэлэцIыкIум дзюдомкIэ бэнакIэ еогъашIэмэ, апэ унаIэ зытеудзэн фаер макIэп.

КIэлэцIыкIум кIуачIэр зэрипсыхьащтыр, псауныгъэр зэригъэ­пытэщтыр тренерым къыгурэIо. Ащ дакIоу ар щыIэныгъэм фэбгъэсэн, цIыфышIу хъуным фэшI уишIуагъэ ебгъэкIын фае.

Университетым ипроректорэу, социологие шIэныгъэхэмкIэ докторэу, профессорэу Татьяна Овсянниковар кIэлэцIыкIу спортым зегъэушъомбгъугъэным шIэныгъэлэжьхэр зэригъэгумэкIы­хэрэм иеплъыкIэхэр къыриIолIагъэх.

Къыблэм, Темыр Кавказым, Оренбург хэкум, нэмыкIхэм ятренерхэр зэхахьэм къыщыгущыIагъэх. Къалэу Тулэ щыпсэурэ Кирилл Дзюбэ къытиIуагъ зэхэщакIохэм лъэшэу зэрафэразэр.

ШъэоцIыкIу Рустам спортымкIэ дунэе класс зиIэ мастер, Бастэ Сэлым Адыгэ Республикэм изаслуженнэ тренер, Мерэм Саидэ Адыгэ Республикэм дзюдомкIэ ибзылъфыгъэ хэшыпыкIыгъэ командэ итренер шъхьаI. ХьакIэу къэкIуагъэхэм тиреспубликэ щыщ­хэр аIукIагъэх, упчIэжьэгъу зэрэзэфэхъухэрэм мэхьэнэ ин иIэу алъытэ.

БэнапIэм щызэIукIагъэх

Олимпиадэ джэгунхэм дышъэ медалыр къащызыхьыгъэ Владимир Невзоровым ыцIэ зыхьырэ бэнапIэм щызэхащэгъэ Iофтхьабзэр гъэшIэгъонэу кIуагъэ. КIэлэцIыкIухэр тренерхэм, кIэлэегъаджэхэм аIукIагъэх, зэхэтхэу нэпэеплъ сурэтхэр атырахыгъэх. ШIухьафтынхэр зыфашIыгъэ кIэлэцIыкIухэм егъэджэн зэIукIэгъу­хэр агу рихьыгъэх. КIэлэцIыкIухэм аIэпкъ-лъэпкъхэр зэрагъэпытэщтхэ шIыкIэхэр арагъэлъэгъугъэх. ЛъапэкIэ, лъэдакъэкIэ алырэгъум зэрэщыкIощтхэм, зэрэбэнэщтхэм, нэ­мыкI­хэм яхьылIэгъэ къэгъэлъэгъонхэр афызэхащагъэх.

Спортым щыцIэрыIохэр

Мыекъопэ бэнэпIэ еджапIэм щапIугъэ Арсен Галстян Олимпиадэ джэгунхэм апэрэ чIыпIэр дзюдомкIэ къащихьыгъ, Урысыем дзюдомкIэ ихэшыпыкIыгъэ командэ итренер. — КIэлэцIыкIухэм спортым гъэ­хъа­гъэу щашIын алъэкIыщтым тренерхэр ежэх, — къы­тиIуагъ Арсен Галстян. — Ныбжьэу яIэр къыдэплъытэзэ Iоф адапшIэ зыхъукIэ, бэнапIэм щыбгъэсэрэ кIэлэцIыкIу­хэм уишIуагъэу ябгъэкIыщтыр нахьыб. Мыекъуапэ тызэрэщызэIукIагъэм тэ, тренерхэм, мэхьанэшхо етэты, зэхэщакIохэм «тхьашъуегъэпсэу» ясIожьы сшIоигъу.

СпортымкIэ дунэе класс зиIэ мастерэу Ордэн Анзаур Урысыем дзюдомкIэ ихэшыпыкIыгъэ ныбжьыкIэ командэ итренерэу загъэнэфагъэр бэшIагъэп.

— Сигуапэу кIэлэцIыкIухэм, тренерхэм, кIэлэегъаджэхэм салъэплъэ, — къытиIуагъ Ордэн Анзаур. — Дзюдор спорт лъэпкъ гъэшIогъэнэу зэрэщытыр кIэлэцIыкIухэм нахь дэ­гъоу къагурыIуагъэу сэлъытэ.

Хьажэкъо Мэдин тренерэу Шъачэ Iоф щешIэ. Зэшъхьэгъусэхэу Хьакурынэ Дамиррэ Ларисэрэ Мыекъопэ бэнэпIэ еджапIэу Кобл Якъубэ ыцIэ зыхьырэм итренерых.

— КIэлэцIыкIухэм бэнапIэм агу етыгъэу зыща­гъасэ, — еIо Хьакурынэ Ларисэ. — ЗэхэщэкIо купым хэтэу Галина Коноваловам лъэшэу тыфэраз, упчIэу естыгъэхэм яджэуап­хэм сягупшысэ.

— Мыекъуапэ ныбджэгъубэ щысиI, — къеIуатэ тренерэу Хьажэкъо Мэдин. — Зэхахьэр еджэпIэ дэгъу зэрэтфэхъугъэм тапэкIи тытегущыIэщт. ШIэныгъэлэжьхэм яеплъыкIэхэр щыIэныгъэм дештэх. Арсен Галстян, Ордэн Анзаур, ШъэоцIыкIу Рустам, нэмыкI бэнэкIо цIэрыIохэм кIэлэцIыкIухэр зэраIукIагъэхэр ащымыгъупшэжьыщтэу сэлъытэ.

— Тренерхэр етэгъаджэх, —къытиIуагъ зэхэщэкIо купым пэщэныгъэ дызезыхьэрэ Галина Коноваловам. — Тимурад къызэрэддэхъурэр щыIэныгъэм щытэлъэгъу.

Непэрэ кIэлэцIыкIухэм тигугъэ­хэр ятэпхы, бэнэкIо цIэрыIо хъун­хэу афэтэIо.

ЕмтIылъ Нурбый.