Апэрэ жьыкъэщэгъум, нэплъэгъум, апэрэ щэ фабэм, псы Iубым, апэрэ гукIэгъум, гумэкIым, апэрэ IаплI фабэм, апэрэ лъэбэкъум къащежьэ сабый цIыкIум ищыIэныгъэ. Ащ иухъумакIор Алахь закъор ары.

ЩыIэныгъэм къыщытIуплъэрэ нэфынэр шIукIэ къытэтэ. ТэкIо, тэчъэ, тэплъэ — тыщыI. ШIулъэгъуныгъэм тегъэпытэ; сизэхашIэхэм сиусэхэр къырагъэкъух.

ШIулъэгъу бзый

Осэпс махэу укъыстехи, Дышъэ ткIопсхэм саIэтыгъ. Тыгъэ бзыеу укъыстепси, ГушIом пшысэу сыхэтыгъ.

Жъогъо лыдэу укъысфэсзэ, Спсэ ифабэ улъэIэс. Мэзэ нэфэу укъысфесзэ, Гум гушIуагъоу ущэшэс.

Шэф остыгъэу насып дахэм Бзыу тэмабгъоу зиIэтыгъ. Ошъогу къаргъоу нэ дэхитIум Сидэхэгъуи пэзгъохыгъ.

Гугъэ-гушIо ныбжьыкIэгъум Иилъэсхэр гум имыкI. СикIэлэгъу игукъэкIыжьхэм Чэщи мафи сащымыкI.

ГъэшIэ лъагъом игъунапкъэм Жъыгъо уахътэр нэпкъы мах. Гугъи гушIуи сIэпихыжьмэ, ГукъэкIыжьыр къэнэжьын.

Жьыбгъэ чъыIэр зыщыпхъашэм Фабэу шъабэр сисабый. Насып нэфэу къызхэкIыгъэм Фэшъыпкъэшъурэр сисабый.

Лъэуж дахэ къысфэнэжьмэ, РыкIожьышъурэр сисабый. Тыгъэ бзыеу къысфепсыжьмэ, Спсэ инурэр сисабый.

Бзэпс дышъэпсэу сызыIыгъыр ЗишIулъэгъур сисабый! НыбжьыкIэгъуи, жъыгъо мафи Янэфынэр шIулъэгъу бзый!

ОхътакIэмэ такъыдекIокIы

КIымафэр фыжьыбзэ дах, Ауми, сыгукIэ сымах. Итыгъэ лыди нэгъыф. Ибзый нэфи фэмыф.

Ефапэ дунаир фыжьэу, ЕгъаIэ ибгъагъэ чъыIэу. Бзыу орэди къэмыIу, Жьыбгъэм ымакъи гомыIу.

КIымафэм ичэщ кIыхьэ ПкIыхьэхэм сащыхьэкIагъ. СхьэкIэнэу игъо симыфэу, Имэфэ кIакуи блэкIыгъ.

Гъатхэм ишъуашэ къызештэм, КIымафэр хэщэIукIыгъ. Хъыбэеу хъытыум ифагъэу, Уахътэм ригъэкIокIыгъ.

Огур нэшхъуабзэу, ЧIыгур шхъонтIабзэу, Дунаим зыкъышIэжьыгъ, — Псэ зыпытыр къэущыжьыгъ.

ТиIэм идахэр тихъой

Пщэсы фыжьыбзэхэр Огум къыщесых. Пэго жъгъэибэр Псыхъом къелъэсы.

Къазы пшъэфыжьхэр Псы кIыIум тесых. Псычэт щырхэр Янэ кIэрысых.

Къушъхьэ шыгуфхэр Дахэу къэлъагъох. Хьарзэ тэмэфхэр Къыблэм къеблагъэх.

Нэбгъо шIыгъахэхэр Чъыгмэ къахэщы. Пчэндэхъу щырхэр Ащ къыщыращы.

ПцIэшхъо кIэтIаркъохэм яIоф мэжъот. Яорэд дахи зырагъэIэт. Ацэпэ цIыкIумэ ятIэр адэлъ, УнэгъошIэныр ащ ягухэлъ.

Гугъэ гуфабэр ахэм ахэлъ, Дунай дахэм янэпэеплъ. Тэ темызэщэу пстэуми талъэплъ, НахьышIум ренэу тыпаплъ.

Нэплъэгъум къыубытрэр — Нэхъой. Дунаим идахэр — Тихъой.

Адыгэ макъ

Адыгэ макъэм игъашIо Сыгу егъэкIэжьы, сэгушIо. Адыгэ макъэм ишIуагъэ Спсэ егъэфабэ, сэгугъэ.

Адыгэ макъэр дышъэпсы ткIопсэу, Тыгъэнэбзыйхэр къыпэгушIуатэх. Адыгэ макъэр тыжьын утысэхэу, Тиощхы быбымэ ахэсыхьажьы.

Адыгэ макъэр чэфыбзэ къабзэу, Къушъхьэ шыгуфхэм алъэIэсыжьы. Адыгэ макъэр орэд дэхабэу, Тиошъо чIэгъы щыкIэсыкIыжьы.

Адыгэ макъэр ным игъэшIуабзэу, ШIулъэгъу макъэкIэ къытэушъыеу, ЧIым тытетыфэ чIылъэм щэрэIу. Тисабый дышъэми ренэу ярэIу.

Хъут Сар. Адэмый.