2012-рэ илъэсым Олимпиадэ джэгунхэм дышъэ медалыр къащызыхьыгъэ Арсен Галстян фэгъэхьыгъэ зэнэкъокъур Джаджэ щыкIуагъ.

Урысыем ишъолъырхэм дзюдомкIэ язэ­IукIэгъухэм ахэлэжьагъэх Оренбург хэкум, Краснодар ыкIи Ставрополь крайхэм, Къэ­бэртэе-Бэлъкъарым, Къэрэщэе-Щэрджэсым, Чэчэным, Ингушетием, Адыгеим, нэмыкIхэм ябэнакIохэр. 2006 – 2008-рэ илъэсхэм къэ­хъугъэ Iэтахъохэр алырэгъум щызэIукIагъэх.

Зэнэкъокъум икъызэIухын ехьылIэгъэ зэ­хахьэм къыщыгущыIагъэх Адыгэ Республикэм физкультурэмкIэ ыкIи спортымкIэ и Комитет ипащэу Дэгужъые Мурат, Олимпиадэ джэгунхэм дзюдомкIэ апэрэ чIыпIэр къащыдэзыхыгъэ Арсен Галстян, нэмыкIхэри.

Урысыем дзюдомкIэ ихэшыпыкIыгъэ командэ итренер шъхьаIэу Тао Хьасанбый Адыгэ къэралыгъо университетым физкультурэмрэ дзюдомрэкIэ и Институт къыухыгъ, Урысыем, Адыгеим язаслуженнэ тренер. Мудрэнэ Бислъан Адыгэ республикэ гимназием щеджагъ, Олимпиадэ джэгунхэм дзюдомкIэ дышъэр къащихьыгъ.

Хь. Таор, А. Галстян, Б. Мудранэр, нэмыкIхэу спортым щыцIэрыIохэр дзюдомкIэ бэнэкIо ныбжьыкIэхэм аIукIагъэх, гущыIэгъу афэхъугъэх.

Урысыем ишъолъыри 10-мэ ябэнэкIо 200-м нахьыбэмэ язэIукIэгъухэм Адыгеим щыщхэм хагъэунэфыкIырэ чIыпIэхэр къыщахьыгъэх. Мэлыщэ Аскэр, кг 90-м къехъу, ятIонэрэ чIыпIэр къыфагъэшъошагъ. Емызэщ Мурат, кг 60, Хьатхъохъу Рустам, кг 66-рэ, Былымыхьэ Амир, кг 90-рэ, ящэнэрэ чIыпIэхэр къахьыгъэх.

«Спортыр — щыIэныгъэ шапхъ» зыфиIорэ федеральнэ проектыр щыIэныгъэм щыпхыращызэ, псауныгъэр зыщагъэпытэрэ спорт Унэшхоу «Кристаллыр» Джаджэ 2020-рэ илъэсым щагъэпсыгъ. Урысыем спортымкIэ изаслуженнэ мастерэу Арсен Галстян фэгъэхьыгъэ апэрэ зэнэкъокъур «Кристаллым» щызэхащагъ. ХагъэунэфыкIырэ чIыпIэхэр къыдэзыхыгъэхэм щытхъу тхылъхэр, кубокхэр, ахъщэ шIухьафтынхэр аратыгъэх.

Зэнэкъокъум икIэщакIохэм, хэлэжьагъэхэм Арсен Галстян «тхьашъуегъэпсэу» ари­Iожьыгъ.