Республикэ общественнэ движениеу «Адыгэ Хасэр» Адыгеим испортсмен анахь дэгъухэм афэгушIуагъ.

ШэнышIу зэрэхъугъэу, адыгэ ИлъэсыкIэ мэфэкIым ехъулIэу Мыекъуапэ щызэхащэгъэ зэха­хьэм Адыгеим испортсмен анахь дэгъухэм ящытхъу щаIуагъ. 2021-рэ илъэсым Урысыем, IэкIыб хэгъэгухэм ащыкIогъэ зэнэкъо­къухэм хагъэунэфыкIырэ чIыпIэ­хэр къащыдэзыхыгъэхэр аныбжьхэм ялъытыгъэу къыхагъэщыгъэх.

Илъэс 20-м зыныбжь къехъугъэхэм якуп зэгъэпшэнхэр ща­шIыгъэх, зыцIэ къыраIуагъэхэм шъуащытэгъэгъуазэ.

Даур Къадырбэч — тхэквондо, спортымкIэ дунэе класс зиIэ мастер. Урысыем, Европэм, дунаим язэнэкъокъухэм дышъэр къащихьыгъ. Апшъэрэ лъэгапIэ зиIэ тренерэу Василий

Есиным егъасэ.

Беданыкъо Заур — дзюдо. Урысыем спортымкIэ иза­служеннэ мастер. Паралимпийскэ джэгунхэм, дунаим изэнэ­къокъу дышъэр къащыдихыгъ. Урысыем изаслуженнэ тренерэу Беданыкъо Байзэт ипащ.

ЦIыкIу Рэмэзан — дзюдо. Урысыем спортымкIэ имастер. Хэгъэгум дзюдомкIэ и Кубок къыдэхыгъэным фэгъэхьыгъэ зэ­нэкъокъум джэрзыр къыщихьыгъ. Тренерыр КIубэ Хьамед.

Дзэсэжъ Аслъан — атлетикэ онтэгъур. Урысыем спортымкIэ имастер. Хэгъэгум ия V-рэ Гъэ­мэфэ спартакиадэ илъэс 23-м нэс зыныбжьхэр хэлэжьагъэх. Дзэсэжъ Аслъан дышъэр къыдихыгъ. Урысыем и Кубок фэ­гъэхьыгъэ зэIукIэгъум ятIонэрэ, Урысыем изэнэкъокъу ящэнэрэ чIыпIэхэр къащихьыгъ. Итренерыр спортымкIэ дунэе класс зиIэ мастерэу Сихъу Аслъан.

Илъэс 20-м нэс зыныбжьхэр

Хьакъуй Амир — самбо. Урысыем спортымкIэ имастер. Урысыем, дунаим яныбжьыкIэхэм язэнэкъокъухэм дышъэр къа­щыдихыгъ. Тренерыр Гъомлэшк Алый.

Гъомлэшк Анзор — самбо. Урысыем изэнэкъокъухэм ха­гъэунэфыкIырэ чIыпIэхэр къащихьыгъ. Тренерэу, спортымкIэ дунэе класс зиIэ мастерэу Де­лэкъо Адам егъасэ.

АфэгушIуагъэх

Культурэм и Унэу «Гигантым» адыгэ ИлъэсыкIэм имэфэкI игъэ­кIотыгъэу щыкIуагъ. Республикэ общественнэ движениеу «Адыгэ Хасэм» физкультурэмкIэ, спортымкIэ, зекIо ыкIи ныбжьыкIэ IофыгъохэмкIэ и Комитет ипащэу, Урысыем, Адыгеим яза­служеннэ тренерэу Хъот Юныс спорт­смен анахь дэгъухэр къыхэ­хыгъэнхэмкIэ зэхэщэкIо купым пэщэныгъэ дызэрихьагъ.

— Адыгэ Республикэм ищытхъу лъагэу зыIэтырэ спортсмен дэгъухэр тиIэх, — къыщиIуагъ зэха­хьэм Хъот Юныс. — Зэнэкъо­къухэм гъэхъагъэу ащашIырэм тегъэгушхо.

Адыгэ Хасэм итхьаматэу, самбэмкIэ, дзюдомкIэ СССР-м спортымкIэ имастерэу ЛIымыщэкъо Рэмэзан мэфэкI зэхахьэм къызыщэгущыIэм, спортым ныбжьыкIэхэр зэрипIухэрэр, лIэужхэр зэрэзэфищэхэрэр хигъэунэфыкIыгъ.

— Мыгъэ гъэхъагъэу спортым щытшIырэр Адыгеим къэралыгъо гъэпсыкIэ иIэу зыпсэурэр илъэси 100 зэрэхъурэм фэтэгъэ­хьы, — къытиIуагъ республикэм самбэмкIэ испорт еджапIэ ипащэу Делэкъо Адам. — Адыгэ Хасэм тыфэраз. НыбжьыкIэхэр зэхещэх, щытхъур афеIо. Гъусэныгъэ зэдытиIэу тапэкIи ныб­жьыкIэхэм ягъэсэн тыдэлэ­жьэщт.

Адыгэ Республикэм лъэпкъ IофхэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр адыгэ ИлъэсыкIэ мэфэкIым урыс­хэр, къэзэкъхэр, къэндзалхэр, ермэлхэр, адыгэхэр, фэшъхьаф лъэпкъхэр зэрэхэлажьэхэрэм имэ­хьанэ тизэдэгущыIэгъу къыщыхигъэщыгъ. Спортсменхэм ящытхъу зэраIорэм осэ ин фи­шIыгъ.

— Спортым лъэпкъхэр зэфещэх, спортсменхэм адыгэ быракъыр хэгъэгу ыкIи дунэе зэнэ­къокъухэм ащагъэбыбатэ, жъо­гъо 12-р къызыхэлыдыкIырэ бы­ра­къым чIэтхэу нэпэеплъ сурэтхэр атырахых, — къытиIуагъ ЛIымыщэкъо Рэмэзан. — Мэлылъфэгъум и 25-м адыгэ быракъым и Мафэ республикэм щыдгъэмэфэкIыщт. Зэхахьэм спортсмен­хэри чанэу хэдгъэлэ­жьэщтых.

Пчыхьэзэхахьэм ансамблэхэу «Абрекхэр», «Мыекъуапэ инэфылъэхэр», «Синдикэр», «Майкопчанкэр», «Ащэмэзыр» къыщышъуагъэх, орэдхэр къыщаIуагъэх. Адыгэ Республикэм иза­служеннэ артистхэу Даутэ Сусанэ, Еутых Вячеслав, Нэгъой Азэ спортсменхэм афэгушIуагъэх, зэхахьэм хэлажьэхэрэм орэдыбэ къафаIуагъ. Адыгеим инароднэ артистэу Тхьаркъохъо Теуцожь лъэпкъ шэн-хабзэхэм яхьылIэгъэ едзыгъохэр къышIыгъэх. Нэгъой Заур ижъырэ ­адыгэ орэдыр ыгъэжъынчыгъ.

Спортсменхэр, тренерхэр, зэ­хахьэм хэлэжьагъэхэр зэхэща­кIохэм афэразэх. «Щытхъур рес­публикэм къыфэзыхьырэ спорт­сменхэр тлъэгъугъэх, тафэгу­шIуагъ, тигуапэу орэд къафэ­тIуагъ», — игупшысэхэм тащи­гъэгъозагъ Адыгэ Республикэм изаслуженнэ артисткэу Даутэ Сусанэ.