Гъэтхапэм и 25-р — культурэм иIофышIэ и Маф
Адыгэ Республикэм культурэмкIэ иIофышIэхэу лъытэныгъэ зыфэтшIыхэрэр! Ныбджэгъу лъапIэхэр! Шъуисэнэхьат епхыгъэ мэфэкIымкIэ тышъуфэгушIо!
Культурэм иIофышIэхэу тищыIэныгъэ нахь дахэ зышIы зышIоигъохэм ящытхъу непэ тэIо.
Культурэм иIофышIэхэмрэ титворческэ коллективхэмрэ ягъэхъагъэхэр ары культурэ-тарихъ байрэ шэн-хэбзэ шIагъохэмрэ зиIэ тиреспубликэ анахьэу зэлъязыгъашIэрэр.
Шъоры, культурэмкIэ унэхэм, музейхэм, тхылъеджапIэхэм яIофышIэхэр, художественнэ самодеятельностым хэлажьэхэрэр, концертхэр зэхэзыщэрэ организациехэм, театральнэ, музыкальнэ, хореографическэ коллективхэм ялIыкIохэр, культурэмкIэ учреждениехэу сэнэхьат гъэсэныгъэ языгъэгъотыхэрэм яIофышIэхэр ары цIыфхэм гухахъо къафэзыхьырэр, къыткIэхъухьэрэ ныбжьыкIэхэр цIыфыгъэ шэпхъэ лъагэхэм атетэу пIугъэнхэмкIэ, культурэ шIуагъэхэм якъэухъумэнкIэ афэлъэкIырэр зэкIэ зышIэхэрэр.
IофышIоу ешъухьыжьэхэрэм тапэкIи гъэхъагъэхэр ащышъушIынэу, Адыгеим ия 100-рэ илъэс фэгъэхьыгъэ Iофтхьабзэхэм тиреспубликэ икультурэ хэхъоныгъэшхо рагъэшIынэу шъуфэтэIо.
Ныбджэгъу лъапIэхэр, псауныгъэ пытэ, насып, творческэ хахъо шъуиIэнэу, Адыгеимрэ Урысыемрэ апае гухэлъышIоу шъуиIэхэр къыжъудэхъунэу тышъуфэлъаIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет —Хасэм и Тхьаматэу Владимир Нарожный