Къашъор ищыIэныгъ
Къашъор культурэм изы Iахь. Адыгэ къашъор лъэпкъым къызыхэхьагъэм къыщыублагъэу ар искусствэм пытэу хэуцуагъ.
Шэн-хэбзэ ыкIи зекIокIэ-шIыкIэ дахэхэр къизыIотыкIырэ къашъор пчэгум къызырахьэм, зыфэдэ щымыIэ лъэпкъ театрэм, общественнэ институтым япкъэу хъугъэ. ЫкIи непэ, зэхъокIыныгъэшхохэр зыщыкIорэ уахътэм, зыфэдэ щымыIэ адыгэ къашъом икультурнэ кIэн къэтыухъумэным мэхьанэшхо иI.
Къашъор яIэубытыпIэу культурнэ кIэным икъэухъумэн зиIахьышхо хэзышIыхьэхэрэм ащыщых лъэпкъ купхэм япащэхэу кIэлэцIыкIухэм ыкIи ныбжьыкIэхэм яцIыкIугъом къыщегъэжьагъэу адыгэ лъэпкъ культурэр шIу языгъэлъэгъухэрэр. Лъэпкъ къашъом идэхагъэ цIыфхэм алъызыгъэIэсыхэрэм ащыщ Пшызэ изаслуженнэ артистэу, АР-м культурэмкIэ изаслуженнэ IофышIэу, дунэе дышъэ орденэу «Сердце отдаю детям» зыцIэр къызыфагъэшъошагъэу, дунэе зэнэкъокъоу «Балетмейстер года-2019» зыфиIорэм илауреатэу Хьашыкъое Мурат Арсен ыкъор.
Мурат 1976-рэ илъэсым къалэу Налщык къыщыхъугъ. ИгукъэкIыжьхэр анахьэу зыфэгъэхьыгъэхэр къэшъоныр ары ыкIи ащ лъапсэ имыIэу щытэп. Мурат ятэжъэу Билял КъБАССР-м изаслуженнэ артист, янэжъэу Лялюся Къэралыгъо академическэ ансамблэу «Кабардинкэм» икъэшъокIуагъ, ятэу Арсен мы ансамблэм къулаиныгъэ зыхэлъ шIыкIэхэр (трюкхэр) къыщишIыщтыгъэх, Къэбэртэе-Бэлъкъар Республикэм изаслуженнэ артист. Мурат илъэситIу нахь ыныбжьыгъэп къэшъонымкIэ апэрэ лъэбэкъухэр зешIым. Ятэ гастрольхэм зыдищэзэ, ар сценэм жьэу къытыригъэхьагъ.
Апэрэ гъэхъагъэр Мурат зешIым илъэси 5 ыныбжьыгъэр. Урысые телевизионнэ зэнэкъокъоу «Веселые нотки» зыцIэу Москва щыкIуагъэм кIэлэцIыкIу IыгъыпIэм иансамблэу «Налкъут» зыфиIорэм хэтэу хэлажьи, Гран-при къахьыгъ. Ащ ыуж, ыныбжь илъэс 16 мэхъуфэ, ансамблэу «Iошъхьэмафэм» къыщышъуагъ.
ЕджапIэр къызеухым сэнэхьатэу къыхихыщтымкIэ джэнджэш иIагъэп, сыда пIомэ Хьашыкъое лIакъом итворческэ лъагъо лъигъэкIотэнэу рихъухьагъ. 1990-рэ илъэсым Къэбэртэе-Бэлъкъар Республикэм культурэмкIэ ыкIи искусствэхэмкIэ иучилищ хореографиемкIэ иотделение чIэхьагъ. 1994-рэ илъэсым ар къызеухым, Къэбэртэе-Бэлъкъар фольклорнэ-этнографическэ къэшъокIо ансамблэу «Балкария» зыфиIорэм аштагъ. Ащ тIэкIурэ къыщышъуагъэу дзэ къулыкъум ащагъ. Къыгъэзэжьи къэшъокIо ансамблэу «Кавказым» тIэкIурэ къыщышъуагъэу Къэралыгъо академическэ ансамблэу «Кабардинкэм» ар хагъэхьажьыгъ. Мурат ятэ иIэпэIэсэныгъэ къызIэкIигъэхьагъ, къулаиныгъэ зыхэлъ шIыкIэхэм зыфигъэзагъ.
2001-рэ илъэсым Пшызэ къэзэкъ хорым икъэшъокIо куп ипащэ Мурат ригъэблэгъагъ. Краснодар къэралыгъо филармониеу Г. Ф. Пономаренкэм ыцIэ зыхьырэм икъэралыгъо ансамблэу «Казачья Вольница» зыфиIорэм 2019-рэ илъэсым нэс Iоф щишIагъ. Джащ фэдэу Краснодар дэт циркым илъэси 2-рэ щылэжьагъ.
Мыпшъыжьэу Iоф зэрэзыдишIэжьыщтыгъэм ишыхьатэу Мурат IэпэIэсэ цIэрыIоу сценэм тетыгъ. Ащ къыгъэлъагъощтыгъэхэр бэмэ къафэшIыщтыгъэхэп. Къамэр голъэу, къамэхэр ыжэ дэлъхэу, кIакIор щыгъэу къашъохэр гъэшIэгъонэу, зыпарэкIи хэмыукъоу къышIыщтыгъэх. Москва, Санкт-Петербург ащыкIогъэ фестивальхэм Мурат зыхэт коллективыр рагъэблагъэзэ бэрэ ахэлэжьагъ, хагъэунэфыкIырэ чIыпIэхэр къафагъэшъошагъэх.
2010-рэ илъэсым пенсием зэкIом, Тэхъутэмыкъое районым икъуаджэу Бжыхьэкъоежъым культурэм и Унэу дэтым адыгэ къашъомкIэ лъэпкъ ансамблэу «Алеуар» зыфиIорэр щызэхищагъ. Нэужым, 2015-рэ илъэсым, Яблоновскэм культурэм и Унэу дэтым ипащэ къелъэIуи, ансамблэу «Молодость Адыгеи» зыцIэм ихудожественнэ пащэу кIуагъэ.
Мурат гу кIуачIэу иIэмкIэ, къэшъон сэнаущыгъэу хэлъымкIэ, щыIэныгъэм шIулъэгъоу фыриIэмкIэ иIофшIэгъухэм къахэщы. ЗиIофшIэн гуетыныгъэшхо фызиIэ творческэ цIыфым тиреспубликэ щыпсэухэрэр дэхагъэм хэщэгъэнхэмкIэ, дунаим тет цIыф лъэпкъ зэфэшъхьафхэм яшэн-хабзэхэр нахь дэгъоу ашIэнхэмкIэ, ныбжьыкIэхэр шэпхъэ дахэхэм атетэу пIугъэнхэмкIэ, тятэжъхэм якIэн бай къэухъумэгъэнымкIэ мафэ къэс мыпшъыжьэу Iоф ешIэ.
АнсамблитIуми Iоф ащишIэзэ къашъоу ыгъэуцухэрэм адыгэ лъэпкъым ихэбзэ дахэхэр, адыгэхэм цIыфыгъэу, хьалэлныгъэу ахэлъыр, бзылъфыгъэхэм ядэхагъэ къащыреIотыкIы. Зипэщэ ансамблэхэу «Алеуар» ыкIи «Молодость Адыгеи» зыфиIохэрэм дунэе ыкIи урысые фестиваль пчъагъэмэ лауреатыцIэр къащафагъэшъошагъ, Къэбэртэе-Бэлъкъар, Къэрэщэе-Щэрджэс ыкIи Адыгэ республикэхэм, Краснодар ащыкIорэ культурнэ Iофтхьабзэхэм хагъэунэфыкIырэ чIыпIэхэр къыщыдахыгъэх.
Мурат ыгъэсэрэ кIэлэцIыкIухэр цIыфышIух, лъэгъо дахэ щыIэныгъэм щыпхыращы. Къэшъоным зэрэфигъасэхэрэм нэмыкIэу адыгэм итарихъ аригъэшIэным, лъэпкъым ишэн-хабзэхэр, изекIокIэ-шIыкIэхэр ахилъхьанхэм пылъ.
Мурат творческэ унэгъо дахэ иI. Ишъхьэгъусэу Татьянэрэ ежьыррэ ыпшъэкIэ зигугъу къэтшIыгъэ къэшъокIо купхэм Iоф ащызэдашIэ. Япшъашъэу Миленэ ыкIи якIалэу Астемыр ежьхэм яансамблэ къыщэшъох.
Мы мафэхэм Налщык щыкIорэ фестиваль-зэнэкъокъоу «Нальчик подкова счастья» зыфиIорэм Мурат зипэщэ ансамблэу «Молодость Адыгеи» зыцIэр хэлажьэ. КъэшъокIо цIыкIухэм гъэхъагъэхэр яIэу къагъэзэжьынэу тафэлъаIо.
Мурат гу кIуачIэу иIэм къыкIыримыгъэчэу, тиреспубликэ ыцIэ дахэкIэ аригъаIоу, шIоу щыIэр игъогогъоу щыIэнэу фэтэIо.
КIАРЭ Фатим.