Театрэр, щыIэныгъэр
«Шыу мафэм» апэрэу теплъыщт
Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм спектаклэу «Шыу маф» зыфиIорэр гъэтхапэм и 25 – 26-м къыщагъэлъэгъощт.
Урысыем итхакIохэм я Союз хэтэу Дэрбэ Тимур ипьесэ техыгъэ театральнэ къэгъэлъэгъоныр режиссерэу, Адыгэ Республикэм искусствэхэмкIэ изаслуженнэ IофышIэшхоу ЕмкIуж Андзор ыгъэуцугъ.
Тарихъым къыхэхыгъэ хъугъэ– шIагъэу адыгэ шыум ехьылIэгъэ къэгъэлъэгъоным хэлэжьэрэ артистхэм ащыщхэм гущыIэгъу тафэхъугъ.
Гъэтхэпэ мазэр шIукIэ тыгу къэкIыжьыщт. Адыгэ ИлъэсыкIэм имэфэкI игъэкIотыгъэу хэдгъэунэфыкIыгъ. Лъэпкъ театрэр зычIэт унэм гъэцэкIэжьын IофшIэнхэр щаухи, пчъэхэр къызэIуахыжьыгъэх. Апэрэ къэгъэлъэгъонэу театрэм «Шыу маф» зыфиIоу щызэхащэрэм тыхэлэжьэщт, — къытиIуагъ роль шъхьаIэхэр къэзышIыхэрэм ащыщэу, Адыгэ Республикэм инароднэ артистэу Тхьаркъохъо Теуцожь.
Артистхэу Жъудэ Аскэрбый, Болэкъо Адам, Тхьэкъуахъо Марджэнэт, фэшъхьафхэм пьесэр ашIогъэшIэгъон. Нэмыц пшъашъэу Маргрезе ироль Тхьэкъуахъо Марджэнэт узыIэпищэу къешIы. Жъудэ Аскэрбыйрэ Болэкъо Адамрэ спектаклым лъэпкъ гупшысэу хэлъым мэхьэнэ ин раты.
Адыгэ шыур зэуакIоу, хъункIакIоу щыIэныгъэм къыщаIуатэу цIыфхэм бэрэ нахьыпэкIэ зэхахыщтыгъ. 1850-рэ илъэс, Iоныгъу. Польшэр, Пруссие гъунапкъэ, Ловиц шъолъырым хэхьэрэ Скирнивиц щыIэ урыс гарнизоным ихъугъэ-шIагъэ пьесэм ухещэ.
Адыгэ шыур ухъумакIоу, шъыпкъэныгъэм фэбанэзэ инамыс, ихэгъэгу, иунагъо къыухъумэнхэ зэрилъэкIырэм, адыгэр хьыкумым зэрэщаумысырэм къэгъэлъэгъоныр афэгъэхьыгъ. Адыгэ шыур шIулъэгъу къабзэм гукIэ фэкIон, насыпышIо хъун, шыу мафэр насыпзехьэм фэбгъэдэн зэрэплъэкIырэм удехьыхы, урегъэгупшысэ. Адыгэ дзэкIолIхэу Шумаф, Шъалихьэ, Бачмызэ, нэмыкIхэм спектаклым чIыпIэу щыряIэр, лъэпкъ шIэжьым куоу зыщызыгъэгъуазэ зышIоигъохэр, театрэр зышIогъэшIэгъонхэр къэгъэлъэгъоным еплъынхэу зэхэщакIохэм рагъэблагъэх.
ЕмтIылъ Нурбый.