Дунаим щыцIэрыIу
Искусствэм щыцIэрыIоу, Урысыем исурэтышIхэм ыкIи иархитекторхэм ясоюзхэм ахэтэу Бырсыр Абдулахь ыныбжь илъэс 75-рэ зэрэхъугъэм фэгъэхьыгъэ къэгъэлъэгъоныр Мыекъуапэ къыщызэIуахыгъ.
Адыгэ Республикэм исурэт къэгъэлъэгъуапIэ щыкIогъэ зэхахьэм Адыгэ Республикэм культурэмкIэ иминистрэу Аулъэ Юрэ, Адыгэ Республикэм исурэтышIхэм я Союз итхьаматэу Елена Абакумовар, КъокIыпIэм щыпсэурэ лъэпкъхэм искусствэхэмкIэ я Къэралыгъо музей и Темыр-Кавказ къутамэ ипащэу ШъэуапцIэкъо Аминэт, Адыгэ Республикэм и Лъэпкъ музей ипащэ игуадзэу Шэуджэн Налмэс, нэмыкIхэри къыщыгущыIагъэх.
Адыгэ лъэпкъым итарихъ, искусствэ баеу иIэр исурэтхэмкIэ къэзыгъэлъэгъорэ Бырсыр Абдулахь гущыIэ фабэхэр къыфаIуагъэх, тапэкIи иIофшIагъэкIэ тигъэгушIонэу фэлъэIуагъэх.
Эдуард Овчаренкэр, Ольга Бреславцевар, Хъуажъ Рэмэзан, Нэгъуцу Аслъан, фэшъхьафхэу культурэм, искусствэм щашIэхэрэр, медицинэм иIофышIэу Батмэн Айдэмыр, ныбджэгъухэр, Iахьылхэр, кIэлэегъаджэхэр, еджакIохэр Бырсыр Абдулахь фэгушIуагъэх.
Зэхахьэм хэлэжьагъэхэм «тхьашъуегъэпсэу» Абдулахь къариIожьыгъ, къэгъэлъэгъоным еплъынхэу ригъэблэгъагъэх.
Къэгъэлъэгъоныр гъэтхапэм и 31-м нэс Мыекъуапэ щыкIощт. Лъэпкъым итарихъ, искусствэр зышIогъэшIэгъонхэр сурэтхэм яплъынхэу зэхэщакIохэр къяджэх.