Искусствэм ицIыфхэр
Тыгъэр мамырэу къытфепсы
Искусствэм гукIэ хэщагъэу псэурэ сурэтышI-модельер цIэрыIоу СтIашъу Юрэ мамыр щыIакIэм игъэпытэн фэгъэхьыгъэ дунэе Iофыгъохэм чанэу ахэлажьэ.
Мастэр, Iуданэр, шэкIыр зэригъэкIухэзэ, игупшысэхэр дунэе гумэкIыгъохэм арепхы. Адыгэ шъуашэхэр, тхыпхъэхэр, лIэкъо тамыгъэхэр, нэмыкIхэр ешIых. Тыкъэзыуцухьэрэ чIыопсым идэхагъэ, тыгъэу къепсырэм инэбзыйхэр къызэрэтлъыIэсхэрэм, тарихъым, лъэпкъ шэн-хабзэхэм къапкъырыкIырэ еплъыкIэхэр искусствэ лъагэм ыбзэкIэ къегъэлъагъох.
Унагъом ищыIакIэ, лъэпкъым къыкIугъэ гъогум, хэгъэгум ипсэукIэ анахьэу къащыхигъэщырэр дунаим мамырныгъэр щыгъэпытэгъэныр ары.
«ООН-м итамыгъэ шъуаш», «Кавказым итыгъэ игумэкIыгъохэр», «ЩэIагъэ», «ТекIоныгъэм исаугъэт», нэмыкI шъуашэхэу мамырныгъэм игъэпытэн фэгъэхьыгъэхэм тарихъым инэкIубгъохэр къызэIуахых. Саеу «Адыгэ Республикэм» лъэпкъым ихэхъоныгъэхэр къегъэлъагъох. Адыгеир республикэ хъугъэ, ылъэ пытэу теуцуагъ. Саеу «Нэфылъ бзыур» непэрэ щыIакIэм дештэ, пшъашъэу ар зыщыгъыр кIэракIэ. Олимпиадэ джэгунхэу Шъачэ щыкIуагъэхэм афэгъэхьыгъэ шъуашэхэр, тхыпхъэхэр лъэпкъ искусствэр зыгъэбаихэрэм ащыщых.
ЮНЕСКО-р къыщытхъугъ
СтIашъу Юрэ илъэс 90-рэ зэрэхъугъэм фэгъэхьыгъэу Мыекъуапэ къыщыдагъэкIыгъэ тхылъэу «Через дизайн к миру. В мире мифов и реальности» зыфиIорэм ехьылIагъэхэр тигъэзет къыщыхэтыутыгъэх. Тхылъыр Урысыем ишъолъыр- хэм, США-м, Германием, Тыркуем, ЮНЕСКО-м, нэмыкIхэм алъыIэсыгъ. ЮНЕСКО-м ипащэ ыцIэкIэ Рикардо де Гемараес Пинто гуфэбэныгъэ хэлъэу къытхыжьыгъэм къыщеIо СтIашъу Юрэ дунэе Iофыгъохэр щыIэныгъэм зэрэщыпхырищыхэрэр.
— ЮНЕСКО-м къыратхыкIыгъэм теджагъ, тигъэгушхуагъ. Гъэзетеджэхэр ащ нахь игъэкIотыгъэу щыдгъэгъуазэхэ тшIоигъу, — къытаIуагъ общественнэ IофышIэшхохэу, Дунэе Адыгэ Хасэм иIофшIэн чанэу хэлажьэхэрэ МэщфэшIу Нэдждэтрэ ЦIыкIушъо Аслъанрэ. — Тхылъым илъэтегъэуцо тыхэлэжьагъ. СтIашъу Юрэ шIум, дэхагъэм, мамыр щыIакIэм игъэпытэн язехьакIу, философие гупшысэ ин хэлъ, Адыгэ Республикэм щытхъоу фаIорэм хегъахъо…
Тарихъым, лъэпкъ шэн-хабзэхэм, хъугъэ-шIагъэхэм адиштэрэ IофшIагъэхэр щыIэныгъэм «къыщегъэгущыIэх». «Планета информаций» зыфиIорэр журналистхэм ящыIакIэ ехьылIагъ. Гъэзетхэу «Адыгэ макъэм, «Советскэ Адыгеим», нэмыкIхэм ацIэхэр хидыкIыгъэх. Журналистхэм яшIуагъэкIэ щыIэныгъэм ихъугъэ-шIагъэхэр цIыфхэм алъагъэIэсын зэралъэкIырэр Ю. СтIашъум итворчествэ къыщыхегъэщы.
Дунаим щашIэ
Экономикэм фэгъэхьыгъэ зэхахьэм, Олимпиадэ джэгунхэу Шъачэ щыкIуагъэхэм якультурнэ Iофыгъохэм СтIашъу Юрэ ахэлэжьагъ, адыгэ шъуашэу ышIыгъэхэр къыщагъэлъэгъуагъэх, нэбгырэ мин пчъагъэ яплъыгъ.
Адыгэ шъуашэм идэхагъэ зэхахьэхэм, Олимпиадэ джэгунхэм ащызылъэгъугъэхэм ащыщ Урысыем и Президентэу Владимир Путиныр. Президентыр зэлъашIэрэ ансамблэу «Налмэсым» иартистхэм ахэтэу нэпэеплъ сурэтэу атырахыгъэхэр дунаим ИнтернетымкIэ щашIагъэх, гъэзетхэм къыхаутыгъэх.
СтIашъу Юрэ къызыхъугъэ мафэм тефэу адыгэ шъуашэм и Мафэ Адыгэ Республикэм, къош республикэхэм, IэкIыб хэгъэгухэм ащыхагъэунэфыкIы.
— Искусствэм цIыфхэр нахь зэпэблагъэ ешIых, — къытиIуагъ СтIашъу Юрэ. — ЮНЕСКО-м ащ мэхьанэшхо реты. Тхылъыр къыдэзыгъэкIыгъэхэм, сиIофшIагъэ уасэ фэзышIыгъэхэм, зэкIэми сафэраз. Сиунагъо, синыбджэгъухэм ацIэкIэ «тхьашъуегъэпсэу» ясэIожьы.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ IофшIагъэхэр СтIашъу Юрэ шIэхэу къыгъэлъэгъощтых. Лъэпкъым гъогу къинэу къыкIугъэр, иискусствэ Ю. СтIашъум зэрегъапшэх, зэфэхьысыжьхэр ешIых.
Ти ЛIышъхьэу КъумпIыл Мурат экономикэр къэIэтыгъэным, культурэм, спортым хэхъоныгъэ ашIыным зэрапылъым Ю. СтIашъур егъэгушхо. КъокIыпIэм щыпсэурэ лъэпкъхэм искусствэхэмкIэ я Къэралыгъо музей и Темыр-Кавказ къутамэ Iоф щишIэзэ, лъэпкъ искусствэр дунаим нахьышIоу щарегъашIэ. Мамыр псэукIэр ыгъэдахэ зэрэшIоигъор, культурэм гъунапкъэ зэримыIэр ыгу рихьырэ сэнэхьатым къыщегъэлъагъо.
Мы мафэхэм СтIашъу Юрэ анахьэу зыгъэгумэкIхэрэм къатегущыIэзэ, Донецкэ, Луганскэ народнэ республикэхэм япсэукIэ ынэгу кIэкIырэп. ГущыIабэ къымыIоу иIофшIагъэхэм яплъы, зэкIэми мамырэу къафепсырэ тыгъэм инэплъэгъу фегъазэ. «Донбасс мамырэу щыIэ сшIоигъу. Владимир Путиным десэгъаштэ, ар чыжьэу маплъэ…», — къыIуагъ СтIашъу Юрэ.
СурэтышI-модельерэу СтIашъу Юрэ Адыгэ Республикэм культурэмкIэ изаслуженнэ IофышI, медалэу «Адыгеим и Щытхъузехьэр», АР-м и Парламент итын анахь лъапIэу «Закон. Пшъэрылъ. ЦIыфыгъ» зыфиIорэр къыфагъэшъошагъэх, республикэмкIэ мамырныгъэм и Лигэ илауреат, республикэ общественнэ движениеу «Адыгэ Хасэм» игъэцэкIэкIо куп хэт, Адыгэ Хасэм и Щытхъу тхылъ къыфагъэшъошагъ.
Дунаим щыцIэрыIо лъэпкъ IэпэIасэу СтIашъу Юрэ иIофшIагъэхэр хэгъэгубэмэ къащагъэлъэгъуагъ. Тыгъэм инэфылъхэм къадэущызэ шIушIагъэу иIэр лъегъэкIуатэ. ЕмтIылъ Нурбый.