АдыгабзэмкIэ диктант атхыгъ
Адыгабзэмрэ тхыбзэмрэ я Мафэ ипэгъокIэу гъэтхапэм и 12-м Адыгэ къэралыгъо университетым илъэпкъ факультет «Адыгэ диктант» зыфиIорэр щыкIуагъ.
Сыхьатыр 12-м ар рагъэжьагъ. Пандемием ыпкъ къикIыкIэ гъэрекIо фэдэу ар пэIудзыгъэ шIыкIэм тетэу атхыгъ.
Адыгэ къэралыгъо университетым адыгэ филологиемкIэ ыкIи культурэмкIэ ифакультет идеканэу Хьамырзэкъо Нуриет къызэриIуагъэмкIэ, пэшIорыгъэшъэу IофшIэгъэ 400 мы илъэсым къатыгъ. ДжырэкIэ ахэм яуплъэкIун ыуж итых.
— Илъэс къэс гъэтхэпэ мазэм адыгабзэм ыкIи адыгэ культурэм языкъегъэIэтыжьын фэгъэхьыгъэ Iофтхьэбзэ зэфэшъхьафхэр республикэм щызэхащэх. Тифакультет ныдэлъфыбзэм икъэухъумэн пшъэрылъ шъхьаIэу иI. «Адыгэ диктантыр» лъэпкъыбзэм икъызэтегъэнэжьын, ар нахь цIыфыбэмэ зэрагъашIэ ашIоигъо хъуным фэлажьэ. 2019-рэ илъэсым къыщегъэжьагъэу зэхэтэщэ. Ащ чанэу зэрэхэлажьэхэрэр зытэлъэгъум, илъэс къэс, мэфэкIым ипэгъокIэу редгъэкIокIэу тыублагъ. Мыгъэ ар я 4-у зэхэтщагъ. 2020-рэ илъэсым диктантыр затхыщтыр IофшIэгъу мафэу тефагъэти, ащ фэдизэу бэмэ атхыгъэп, ащ къыхэкIыкIэ къыкIэлъыкIохэрэр зыгъэпсэфыгъо мафэхэм атедгъэфэнэу тетыубытагъ. 2021-рэ илъэсым гъэтхапэм и 14-м онлайн шIыкIэм тетэу ар зэхэтщагъ. Ащ IофшIэн 613-рэ къагъэхьыгъагъ. Диктантыр нэбгыри 117-мэ дэгъу дэдэу атхыгъагъ, — еIо Хьамырзэкъо Нуриет.
Мыгъэ диктантыр зытхыхэрэр тIоу гощыгъагъэх. Бзэр зыIулъэу зыгъэфедэхэмрэ бзэр зэзыгъашIэхэрэмрэ. А купитIум яхьылъагъэкIэ диктант зэфэшъхьафхэр атхыгъэх. Шъхьадж ежь иIэрыфэгъур къыхихыгъ, тIури зытхыгъэхэри къахэкIыгъэх. Ахэм къяджагъэх адыгабзэмкIэ ыкIи литературэмкIэ республикэ зэнэкъокъум текIоныгъэ къащыдэзыхыгъэх кIэлэегъэджэ пэрытхэу Мамый Саидэрэ Шышэкъо Сусаннэрэ.
Iофтхьабзэм ипэублэ диктантыр зэрэптхыщт ыкIи зэрауплъэкIущт шIыкIэр къаIотагъ. Сыхьатым къыкIоцI ар кIуагъэ, нэужым зэхэщакIохэм агъэнэфэгъэ электроннэ почтэмрэ телефонымрэ IофшIэнхэр арагъэхьыжьыгъэх.
ЗэхэщакIохэм къызэраIорэмкIэ, онлайн шIыкIэм тетэу диктантыр зэратхырэм ишIуагъэкIэ ащ хэлажьэхэрэм япчъагъэ нахьыбэ хъугъэ. Адыге-им щыпсэухэрэм ямызакъоу IэкIыбым ис тилъэпкъэгъухэри ахэтыгъэх.
— Текстым икъыхэхын мэхьанэшхо етэты. Ащ дэлэжьэщтхэр пэшIорыгъэшъэу дгъэнэфагъэх. Текстым гъэсэныгъэмкIэ ыкIи пIуныгъэмкIэ купкI ин иIэу къыхэтэхы, ащ дакIоу ар къин дэдэ хъущтэп, сыда пIомэ, адыгабзэр зэкIэми зэраIэкIэлъыр зэфэшъхьафы. Ар дэгъоу атхыгъэу, балл ин къызахьыкIэ, къэкIорэ илъэсым джыри фэчэфхэу хэлэжьэщтых. Iофтхьабзэм икIэух зэфэхьысыжьхэр тэшIых, цIыфхэмкIэ ар Iэрыфэгъу, нахь гъэшIэгъон зэрэхъущтым тыдэлажьэ, ыпэкIэ тылъэкIуатэ. IофшIэнхэм язэфэхьысыжьхэр гъэтхапэм и 20-м нэс къэнэфэщтых, тисайт ахэр къихьажьыщтых, — къыIуагъ лъэпкъ факультетым идекан.
ДЕЛЭКЪО Анет.