Адыгеим и ЛIышъхьэу КъумпIыл Мурат тхьамэтагъор щызэрихьэзэ терроризмэм пэшIуекIорэ комиссием изэхэсыгъо Адыгэ Республикэм иправительствэ и Унэ тыгъуасэ щыкIуагъ.

НыбжьыкIэхэр терроризмэм щыухъумэгъэнхэмкIэ, гъэцэкIэкIо хабзэм икъулыкъухэмрэ республикэм иапшъэрэ еджапIэхэмрэ язэдэлэжьэныгъэ нахьышIу шIыгъэнымкIэ Iофтхьабзэхэу зэрахьэхэрэм афэгъэхьыгъэу къыIотагъ Адыгэ Республикэм гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцакIэгоу Евгений Лебедевым.

КъызэрэхагъэщыгъэмкIэ, гъэсэныгъэ зыщарагъэгъотырэ организациехэу республикэм итхэм ныбжьыкIэхэр экстремизмэмрэ терроризмэмрэ апэуцужьынхэ алъэкIыным епхыгъэ Iофтхьабзэхэр ащызэхащэх. 2021-рэ илъэсым пIуныгъэ культурнэ-гъэсэныгъэ Iофтхьабзэхэу мини 4,5-рэ фэдиз зэхащагъ, ахэм кIэлэеджэкIо ыкIи студент мин 62-м ехъу къызэлъаубытыгъ. Динымрэ культурэмрэ япхыгъэу Iоф зышIэхэрэр а Iофтхьабзэхэм ахэлэжьагъэх.

Ащ нэмыкIэу кIэлэегъэджэ 38-мэ яшIэныгъэхэм ахагъэ­хъуагъ, анахьэу анаIэ зытырагъэтыгъэр гъэсэныгъэ зыщарагъэгъотырэ организациехэм ачIэсхэм терроризмэмрэ экстремизмэмрэ зыдарамыгъэхьыхыныр ары. КIэлэегъэ­джэ-психолог ыкIи ныбжьыкIэхэм Iоф адэшIэгъэным фытегъэ­псыхьэгъэ нэбгыри 100-м ехъу джырэблагъэ щыIэгъэ семинарым хэлэжьагъэх. Адыгэ къэралыгъо университетым иректорэу Мамый Даутэрэ Мыекъопэ къэралыгъо технологическэ университетым иректорэу Къуижъ Саидэрэ студентхэр терроризмэмрэ экстремизмэмрэ ащыухъумэгъэнхэмкIэ Iофтхьабзэхэу зэшIуа­хыхэрэм афэгъэхьыгъэу къаIотагъ. ГущыIэм пае, хабзэр мыукъогъэным фэгъэзэгъэ студент отрядхэм, кибердружинэхэм студентхэр чанэу ахэлажьэх. КъэгущыIагъэхэм къаIуа­гъэхэр зэфихьысыжьхэзэ, Адыгеим и ЛIышъхьэ ныбжьыкIэхэр а зигугъу къэтшIыгъэ лъэныкъо щынагъохэм ащыухъумэгъэнхэмкIэ Iофэу ашIэрэр нахьышIоу зэхэщэгъэным епхыгъэ пшъэрылъ заулэ къыгъэуцугъ.

«КIэлэегъаджэхэмрэ хэбзэухъумэкIо къулыкъухэмрэ язэдэ­лэжьэныгъэ нахь агъэпытэн, мы лъэныкъомкIэ гумэкIыгъо къыздикIыхэрэр агъэунэфынхэ фае. НыбжьыкIэхэм шъуадэгущыIэн зыхъукIэ депутатхэр, дин ыкIи общественнэ IофышIэхэр, спортсмен цIэрыIохэр къежъугъэб­лагъэхэзэ шъушIы. Ахэм лъытэныгъэ афашIы ыкIи ныбжьыкIэхэмкIэ щысэ хъунхэ алъэкIыщт, опытэу яIэмкIи ныбжьыкIэхэм адэгощэшъущтых», — къыIуагъ КъумпIыл Мурат.

Ащ нэужым транспортыр щынэгъончъэу щытынымкIэ ыкIи транспортнэ инфраструктурэм къыхиубытэрэ псэуалъэхэр терроризмэм щыухъумэгъэнхэмкIэ Iофтхьабзэхэу зэрахьэхэрэм афэгъэхьыгъэу къыIотагъ Адыгэ Республикэм псэолъэшIынымкIэ, транспортымкIэ, унэ коммунальнэ ыкIи гъогу хъызмэ­тымкIэ иминистрэ иапэрэ гуадзэу Лафышъэ Рэмэзан. Ащ къызэрэхигъэщыгъэмкIэ, транспорт псэолъэ шъхьаIэхэм ящынэгъончъагъэкIэ Iоф зэрашIэщт планыр аухэсыгъ. Ащ дакIоу цIыфхэр зезыщэрэ транспортым епхыгъэ Iофтхьэбзэ гъэнэфагъэхэр рахъухьагъэх.

Урысые Федерацием ихэбзэгъэуцугъэ гъэцэкIагъэ зэрэхъу­рэр уплъэкIугъэнымкIэ межведомственнэ купым Iофэу ышIагъэм, джащ фэдэу Красногвардейскэ ыкIи Шэуджэн районхэм цIыф лъэпкъ зэфэшъхьафхэм къахэкIыгъэхэу ащыпсэухэрэм азыфагу илъ зэфыщытыкIэхэр тэрэзынхэм япхыгъэу къаIуагъэм зэхэсыгъом щядэIугъэх. Муниципальнэ образованиеу «Теуцожь районым» и АТК итхьаматэ къышIыгъэ псалъэми зэхэсыгъом къекIолIагъэхэр едэIугъэх.

АР-м и ЛIышъхьэ ипресс-къулыкъу