Искусствэр, тикъэгъэлъэгъонхэр
ЕджакIохэм ясэнаущыгъэ къызэIуахы
Бгъэфедэн плъэкIыщт искусствэм фэгъэхьыгъэ я IХ-рэ республикэ зэнэкъокъур Мыекъуапэ щыкIуагъ.
КIэлэцIыкIухэм яхудожественнэ еджапIэ IофшIагъэхэм якъэгъэлъэгъон ыкIи зэнэкъокъум изэфэхьысыжьхэм япхыгъэ зэхахьэ щызэхащагъ.
Адыгэ Республикэм искусствэхэмкIэ икIэлэцIыкIу еджапIэу N 1-м методикэмкIэ и Гупчэрэ Адыгеим культурэмкIэ и Министерствэрэ Iофтхьабзэм кIэщакIо фэхъугъэх. Адыгэ Республикэм и Къэралыгъо программэу культурэм хэхъоныгъэ ышIыным фэгъэхьыгъэм иедзыгъохэм ар ащыщ.
Тыкъэзыуцухьэрэ чIыопсыр, лъэпкъ шэн-хабзэхэр нахьышIоу ашIэнхэм, искусствэм иамалхэр агъэфедэхэзэ ятворческэ гупшысэныгъэ зырагъэушъомбгъуным афэшI къэгъэлъэгъоным мэхьэнэ ин иIэу зэхэщакIохэм алъытэ.
Адыгэ Республикэм искусствэхэмкIэ иколледж, республикэм искусствэхэмкIэ икIэлэцIыкIу еджапIэхэр, художественнэ кIэлэцIыкIу еджапIэр зэнэкъокъум хэлэжьагъэх. Илъэси 8 – 11, 12 – 15, 16 – 19, 20 – 24-рэ зыныбжьхэр куп зэфэшъхьафхэм ахэтхэу яIэпэIэсэныгъэ къагъэлъэгъуагъ.
Пхъэм, етIэ гъэжъагъэм, апчым, шэкIым, гъучIым, шъом ахашIыкIыгъэхэр, фэшъхьафхэр зэнэкъокъум къырахьылIагъэх. «Тыжьын мастэр, дышъэ Iуданэр» зыфиIорэм дэным, хъэным, нэмыкIхэм яхьылIагъэхэр къыщагъэлъэгъуагъэх. Тыкъэзыуцухьэрэ дунаим къыхэхыгъэ IэшIагъэхэр гъэшIэгъоныгъэх.
Хэлэжьагъэхэр
Живописыр, бгъэфедэн плъэкIыщт искусствэр зиIэ отделениехэр зэнэкъокъум хэлэжьагъэх. Ахэр республикэм иеджэпIэ 15 мэхъух.
Республикэм искусствэхэмкIэ иколледжэу Тхьабысымэ Умарэ, искусствэхэмкIэ республикэм икIэлэцIыкIу еджапIэу Лъэцэрыкъо Кимэ ацIэхэр зыхьыхэрэр, Адыгэкъалэ, Мыекъуапэ, республикэм ирайонхэм якIэлэцIыкIу еджапIэхэр зэнэкъокъум щызэIукIагъэх.
ОсэшI купыр
Адыгэ Республикэм искусствэхэмкIэ икIэлэцIыкIу еджапIэу К. Лъэцэрыкъом ыцIэ зыхьырэм икIэлэегъаджэу, Адыгеим изаслуженнэ сурэтышIэу Хъуажъ Рэмэзан осэшI купым пэщэныгъэ дызэрихьагъ.
Республикэм культурэмкIэ и Министерствэ испециалист шъхьаIэу, тарихъ шIэныгъэхэмкIэ кандидатэу Теуцожь Нуриет, Адыгэ Республикэм искусствэхэмкIэ иколледжэу У. Тхьабысымэм ыцIэ зыхьырэм икIэлэегъаджэу, Адыгеим культурэмкIэ изаслуженнэ IофышIэу Ольга Плетневар осэшI купым иIофшIэн хэлэжьагъэх.
Зэхахьэм методикэмкIэ Гупчэм иIофышIэхэр, кIэлэегъаджэхэр, осэшI купым хэтхэр къыщыгущыIагъэх. КIэлэеджакIохэм яшIэныгъэхэм зэрахагъахъорэр, искусствэм кIэлэцIыкIухэр, ныбжьыкIэхэр зэрипIухэрэр, лъэхъаным диштэу еджапIэхэм хэхъоныгъэ зэрашIырэр Хъуажъ Рэмэзан изэфэхьысыжьхэм къащыхигъэщыгъ.
IэпэIасэхэр къыхахыгъэх
«ШIыкIэ зэфэшъхьафхэр» зыфиIорэ зэнэкъокъум художественнэ еджапIэм зыщызыгъэсэрэ Елизавета Комаровам апэрэ чIыпIэр къыщыдихыгъ, кIэлэегъаджэр Д. Глазова.
Нахьыжъхэм якуп хэтэу, искусствэхэмкIэ республикэ колледжым щеджэрэ Елизавета Булгаковам апэрэ чIыпIэр фагъэшъошагъ, кIэлэегъаджэр О. Бреславцева.
«Тыжьын мастэр, дышъэ Iуданэр» зыфиIорэм ятIонэрэ чIыпIэр къыщыдихыгъ Кощхьаблэ искусствэхэмкIэ икIэлэцIыкIу еджапIэу М. Хьагъэуджым ыцIэ зыхьырэм щеджэрэ КIуращынэ Аминэ. Зэнэкъокъум ия 2-рэ куп хэтэу СтIашъу Маринэ апэрэ чIыпIэр ыхьыгъ. Пшъэшъэжъыем Гъобэкъуае зыщегъасэ, А. Iэшъынэр икIэлэегъадж. Ящэнэрэ купым хэтэу Софья Яскуновам ятIонэрэ чIыпIэр фагъэшъошагъ. ИскусствэхэмкIэ республикэ колледжым зыщегъасэ, кIэлэегъаджэр О. Бреславцева.
Зэнэкъокъум щытхъуцIэхэр къыщыдэзыхыгъэхэм ащыщых Софья Михайловскаяр, ГъукIэлI Анжеликэ, Надежда Агафоновар, Анастасия Печерскаяр, фэшъхьафхэри.
Щытхъу тхылъхэр зыфагъэшъошагъэхэм ащыщых Гъузыекъо Залинэ, Вадим Германовыр, СтIашъу Самирэ, ЛIыIужъу Асыет, Адела Амирян, Хьэфиз Джулие, нэмыкIхэри.
Зэнэкъокъум илауреатхэр зэрагъэхьазырыгъэхэм фэшI кIэлэегъэджэ 15-мэ щытхъу тхылъхэр афагъэшъошагъэх. Г. Абрэджыр, Д. Бадыер, С. Немцовар, З. Хъотыр, О. Бреславцевар, М. Iэшъынэр, фэшъхьафхэри къыхагъэщыгъэх.
Адыгеим илъэпкъ IэпэIэсэ цIэрыIоу Абрэдж Гощэфыжь зэхэщакIохэм «тхьашъуегъэпсэу» ариIожьыгъ. КIэлэеджакIохэм, ныбжьыкIэхэм яшIэныгъэхэм ахагъэхъонымкIэ, ясэнаущыгъэ къызэIуахынымкIэ ащ фэдэ зэнэкъокъухэр зэрящыкIагъэхэр кIэлэегъаджэхэм къаIуагъ.
Сахьидэкъо Нурбый.