Адыгэ къэралыгъо университетым цифрэ технологиехэмкIэ икафедрэ ипрофессорэу, физикэ-хьисап шIэныгъэхэмкIэ кандидатэу, Урысые Федерацием апшъэрэ сэнэхьат гъэсэны­гъэмкIэ иIофышIэ гъэшIуагъэу, Адыгэ Республикэм иапшъэрэ еджапIэ изаслуженнэ IофышIэу, педагогикэ шIэныгъэхэмкIэ Дунэе академием ичлен­корреспондентэу, Апшъэрэ аттестационнэ комиссием идоцентэу, тиныб­джэгъу хьалэлэу Блэгъожъ Заурбый Уцужьыкъо ыкъом ыныбжь илъэс 79-м итэу идунай зэрихъожьыгъэр лъэшэу гухэкI тщыхъугъ.

Блэгъожъ Заурбый Теуцожь районымкIэ къуаджэу Нэшъукъуае 1943-рэ илъэсым жъоныгъуакIэм и 3-м къыщыхъугъ. 1962-рэ илъэсым къыщегъэжьагъэу 1965-рэ илъэсым нэс СССР-м и УIэшыгъэ КIуачIэхэм къулыкъур ащихьыгъ. 1965-рэ илъэсым Адыгэ къэралыгъо кIэлэегъэджэ инсти­тутым чIахьи, 1970-рэ илъэсым дэгъу дэдэу къыухыгъ. 1971-рэ илъэсым АГПИ-м Iухьагъ, хьисап анализымкIэ кафедрэм иассистентэу щытыгъ, 2000-рэ илъэсым къыщегъэжьагъэу экономи­ческэ факультетым щылэжьагъ, хьисап методхэмрэ информационнэ технологиехэмрэкIэ кафедрэм илъэс 18 ипэщагъ. 1974-рэ илъэсым Ленинград дэт къэралыгъо университетым иаспиранту­рэ чIахьи, 1977-рэ илъэсым къыу­хыгъ.

Блэгъожъ Заурбый статья 55-рэ, апшъэрэ еджапIэхэм ястудентхэр зэ­рэрагъэджэрэ тхылъи 5 къыдигъэкIыгъ.Гъэсэныгъэм зегъэушъомбгъугъэнымкIэ фондым 2004-рэ илъэсым зэхищэгъэ зэнэкъокъум щатекIуагъ, апшъэ­рэ еджапIэхэм якIэлэегъаджэхэм атегъэ­псыхьэгъэ научнэ тхылъ анахь гъэшIэгъоным пае диплом къыратыгъ, зэнэкъокъуми илауреат хъугъэ. «АКъУ-р къызызэIуахыгъэр илъэс 75-рэ мэхъу» зыфиIорэ медальрэ Щытхъу тхылърэ 2015-рэ илъэсым къыфагъэшъошагъэх.

ГъэшIэ гъогу дахэ къэзыкIугъэ тиныбджэгъу хьисапми, студентхэм яегъэ­джэни иIахьышхо зэрахишIыхьагъэм нэмыкIэу цIыфхэм ахэхьаныр, икъоджэгъухэм аIукIэныр икIэсагъ. ЗиIорэ зишIэрэ зэтефэжьрэ, зыгу зэIу­хыгъэ, лъытэныгъэ зыфашIырэ цIыфэу ары тэ Заурбый зэрэтшIэщтыгъэр.

Лъэуж дахэ къэзыгъэнэгъэ тиныб­джэгъу егъашIэм шIукIэ тыгу илъыщт. Блэгъожъ лIакъоми, Заурбый ыкъуитIуи, ишъхьэгъуси тафэтхьаусыхэ, ­якъин адэтэгощы.

Ныбджэгъухэр.