Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм игъэцэкIэн къыдыхэлъытагъэу 2022-рэ илъэсым километри 10,5-рэ зикIыхьэгъэ автомобиль гъогур Тэхъутэмыкъое районым щагъэцэкIэжьыщт. Ащ ишIуагъэкIэ шъолъыр мэхьанэ зиIэ гъогу Iахьи 4-р аужырэ шапхъэхэм адиштэу зэтырагъэпсыхьащтых. ЗэкIэмкIи ащ сомэ миллиони 118-м ехъу пэIуагъэхьащт.

Мы лъэпкъ проектым къыдыхэлъытагъэу Теуцожь районым ипсэолъи 3-ми гъэцэкIэ­жьынхэр ащыкIощтых. Ащ къыхеубытэх автомобиль гъогоу «Шевченко – Петров» зыфиIо­рэм игъогу IахьитIу, якIыхьагъэ километрэ 1,8-рэ мэхъу. Джащ фэд автомобиль гъогоу «Пэ­нэжьыкъуай – Пщыкъуйхьабл» зыфиIорэм ичIыпIэу километри 5 зикIыхьагъэр. Лъэпкъ проектым ишIуагъэкIэ, сомэ миллион 62,3-рэ зытефэщт IофшIэнхэр илъэсэу тызыхэтым ибэдзэогъу мазэ ыкIэм нэс аухыщтых. Километри 6,8-рэ зикIыхьэгъэ гъогум телъ асфальтыр агъэ­кIэжьыщт. Ащ нэмыкIэу гъогу тамыгъэхэр зэблахъущтых, нэмыкI IофшIэнхэр агъэцэкIэщтых.

Адыгеяавтодорым иотдел ипа­щэу Роман Верзуновым къызэриIуагъэмкIэ, шъолъыр мэхьанэ зиIэ гъогухэм ягъэцэ­кIэжьынкIэ пIалъэу щыIэм ыпэ итхэу Iоф­шIэнхэр республикэм щызэшIуа­хых. Адыгеим къэралыгъо гъэ­псыкIэ иIэу зыщыIэр илъэси 100 зэрэхъурэр зэрифэшъуашэу хэгъэунэфыкIыгъэным шъолъырым игъогу хъызмэт икъулыкъу­шIэхэм яIахьышIу халъхьэ.