ЧIышъхьашъом тет цIыфхэм зэкIэми апэ мафэу къытфакIорэм пэгъокIыхэрэр Японием щыпсэухэрэр ары. Ахэр нэбгырэ миллиони 130-рэ мэхъух.

Тайга Нозаки а къэралыгъом къыщы­хъугъ ыкIи щэпсэу. Илъэс 19 ыныбжь. Ащ Кавказыр лъэшэу шIу ылъэгъугъ, икультурэ, ибаиныгъэ, ишэн-хабзэхэр шIогъэшIэгъоных. ЕгъашIи ымылъэгъугъэ черкесхэу (адыгэхэу) а чIыгум щыпсэухэрэм ыгукIэ апэблагъэ хъугъэ.

Тайга Нозаки Токио щэпсэу. Адыгэ къашъохэр зэрегъашIэх. КIалэм инэ­кIубгъоу инстаграмым итым ащ къыщетхы.

— Мы лъэхъаным сэр-сэрэу зэсэгъашIэх Кавказым ис лъэпкъхэм абзэхэр, якъашъохэр, яорэдхэр. Ахэр Интернетым къисэхых. ЯлъэпкъкIэ японцэхэу куп зэхэсщагъ, кIалэхэри пшъашъэхэри ащ хэтых. Кавказ къашъохэр тигуапэу зэтэгъашIэх. Токио концертэу къащыттыхэрэм «ЛъэпэчIасэр» ахэтэгъахьэ. Сэ сшъхьэкIэ сыкIэхъопсы зэ нахь мыхъуми Кавказым сыкIонэу, «ЛъэпэчIасэр», нэмыкI къашъохэри къэзышIыхэрэ цIыфхэр слъэгъунхэу. Кавказым щыпсэухэрэм якультурэ бай Японием исхэм алъызгъэIэсыным, язгъэшIэным сигъашIэ фэзгъэIорышIэщт.

Сэнаущыгъэ зыхэлъ кIалэм тырихыгъэ видеороликхэм ащыолъэгъу ащ адыгэ къашъом зэрэщытэу зызэрэритырэр. Японием щыщ ныбжьыкIэхэм саехэмрэ цыехэмрэ ащыгъэу къашъохэр къызэрашIырэм егъэгушIо.

Тайга Нозаки Кавказыр угу къэзыгъэкIырэ пстэури егъэлъапIэ. Зыщыпсэурэ унэм идэпкъхэр къамэхэмкIэ, адыгэ паIохэмкIэ, Кавказым ичIыопс идэхагъэ къэзгъэлъэгъорэ сурэтхэмкIэ гъэкIэрэкIагъэх.

«Сэ сычеркес» ыIоу къытхыхэрэм ахэплъэгъощт.

— ЛIы шъыпкъэ ухъунэу пфэсэIо, Тайга, убланэу, уIушэу, уцIыфышIоу ыкIи шъыпкъагъи пхэлъэу ущыIэнэу сыфай. Тайга ыцIэ Адыгеим щыпсэухэ­рэм язгъэшIэнэу згъэгугъагъэ. Гъэзетэу къыдэдгъэкIыхэрэм ыкIи журналэу «Родничок Адыгеи» зыфиIорэм икъэбар къарызгъэхъанэу зысэIом ар лъэшэу гушIуагъэ.

Тикъашъо тэ тыгу зэрэрихьырэм фэ­дэу Тихий океаным ихыгъэхъунэ чы­жьэхэм ащыпсэухэрэми агу зэрэнэсыгъэр тигуапэ.

Бэгъушъэ Мариет.