Хэгъэгум иухъумакIо и Мафэ фэгъэхьыгъэ пчыхьэзэхахьэр Адыгэ Республикэм и Къэралыгъо филармоние щыкIуагъ.

Композитор цIэрыIохэу Д. Шостакович, Н. Бо­гословскэм, М. Исаковскэм яорэдхэмкIэ концертыр къызэIуахыгъ. Зэхахьэр зезы­щэгъэ Татьяна Резниченкэм орэдхэм ятарихъ къыIуатэзэ, зэгъэпшэн гъэшIэгъонхэр ышIыгъэх. Орэдымрэ лъэхъанымрэ зэрэзэпхыгъэ­хэр къыхигъэщыгъ, композиторхэр хэгъэгум зэрэфэусагъэхэм мэхьэнэ ин ритыгъ.

Адыгэ Республикэм и Къэралыгъо филармоние изэхэхьэпIэ цIыкIу къыщатыгъэ концер­тым уедэIункIэ гъэшIэгъоныгъэ. Кинофильм­хэм ахэт орэдхэр, ащыжъынчырэ произведениехэр гум къегущыIыкIых. Ным, къэзэкъ пшъэшъэ нэшIуцIэм, хым къулыкъур щызы­хьырэм, фэшъхьафхэм афэгъэхьыгъэхэр бэ­шIагъэу концертхэм ащызэхэтэхых, жъы хъухэрэп.

М. Таривердиевым ыусыгъэу «Мгновение» зыфиIорэр кинофильмхэм ащызэхэтхыгъ. Дунэе зэнэкъокъум илауреатэу Сергей Пособиловым флейтэмкIэ орэдышъор къабзэу къыригъэIуагъ. Адыгэ Республикэм инароднэ артисткэу Нэгъой Маринэ классикэм хэ­хьэ­гъэ произведениехэр, зэлъашIэрэ орэдхэр къыIуагъэх.

Дунэе зэнэкъокъухэм ялауреатхэу Сергей Трутневымрэ Теуцожь Бэлэрэ зэгъусэхэу шIулъэгъу орэдхэр къыхадзагъэх.

Татьяна Резниченкэм тарихъ къэбархэр къызэриIотагъэхэм зэхахьэр къыгъэбаигъ. Адыгеим щыщхэр Хэгъэгу зэошхом, лъэпкъ зэфэшъхьафхэр Ленинград икъэухъумэн зэрэхэлэжьагъэхэм, тичIыпIэгъу дзэкIолIхэм лIыгъэу Ленинград щызэрахьагъэм, саугъэтэу афагъэуцугъэм ар къатегущыIагъ.

Советскэ Союзым и ЛIыхъужъэу Андыр­хъое Хъусен лIыгъэу зэрихьагъэмкIэ непи къызэрэтхэтым, Советскэ Союзым итхакIохэу Хэгъэгу зэошхом хэлэжьагъэхэм, Адыгеим щыщхэм Т. Резниченкэм ягугъу къышIыгъ, Андырхъое Хъусен хэгъэгум итхакIохэмкIэ апэу Советскэ Союзым и ЛIыхъужъ щыт­хъуцIэ къызэрэфаусыгъэр къыхигъэщыгъ.

Къ. Жанэм игущыIэхэм атехыгъэу И. Свет­ловскаям ыусыгъэ орэдэу Хъ. Андырхъуаем фэгъэхьыгъэр Нэгъой Маринэ, Сергей Трутневым, Теуцожь Бэлэ адыгабзэкIи, урысыбзэкIи къаIуагъ.

«Мыекъопэ вальс» зыфиIоу У. Тхьабысы­мэм ыусыгъэми орэдыIохэм тырагъэдэIугъ. Набэкъо Бэлэ фортепианэмкIэ, Сергей По­со­биловыр флейтэмкIэ къадежъыугъэх.

А. Новиковымрэ А. Шведовымрэ зэдаусыгъэ орэдэу пшъэшъэ къуапцIэм фэгъэхьы­гъэр, «Пшъашъэхэр, тэ шъукъытаж» зы­фиIо­рэр Сергей Трутневым артист нэшанэхэр ыгъэфедэхэзэ узыIэпищэу къыIуагъэх. А. Пах­мутовам ыкIи Н. Добронравовым яорэдэу «Зачарованная даль» зыфиIорэмкIэ артистхэм пчыхьэзэхахьэр аухыгъ.

Орэдыр щыIэныгъэм зэрэщыщыр, цIыфым ипсэукIэ зэрэхэтыр артистхэм зэхахьэм къыщагъэлъэгъуагъ. Хэгъэгу зэошхом илъэ­хъан тидзэкIолIхэм орэдыр ягъогогъугъ. Джы­рэ лъэхъан къулыкъур зыхьырэ дзэкIолI­хэм нахьыжъхэм щысэ атырахызэ хэгъэгур къаухъумэ, мамыр псэукIэр агъэпытэ.

Купым ихудожественнэ пащэу Вера Посо­биловам къытиIуагъ концерт зэфэшъхьафхэр мыгъэ къызэратыщтхэр. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ Iофтхьабзэхэм чанэу ахэлэжьэщтых.