Тиадыгэ кIалэ хэлэжьагъ
Я 72-рэ Дунэе Берлинскэ кинофестивалыр мэзаем и 10-м къызэIуахыгъ. Ар мэфипшIэ кIощт.
Фестивалым иIахь шъхьаIэ непэ зэфашIыжьы, кIэуххэм адиштэу дышъэ ыкIи тыжьын «мышъэхэр» къызыфагъэшъошагъэхэр къэнэфэщтых, ахэр афагощыщтых. Нэужым етIани мэфи 4-рэ фестивалым хэлэжьэгъэ фильмхэр кинотеатрэхэм къащагъэлъэгъощтых.
Урысыем ипроектибл фестивалым хэлажьэ. Ахэм анахь къахэбгъэщын фаеу специалистхэм зигугъу ашIырэр Александр Золотухиным ыгъэуцугъэ фильмакIэу «Брат во всем» зыфиIорэр ары. Прооектым ихудожественнэ упчIэжьэгъур зэлъашIэрэ Александр Сокуровыр ары.
Фильмыр къызытегущыIэрэр зэшхэу Андрей ыкIи Митя Березинхэр ары. Ахэр летчик хъунхэу щыт, авиационнэ училищым щеджэх. ЯтеплъэкIэ зэфэдэхэми, язекIуакIэкIи, яшэнкIи зэтекIых. Ау ошъогум зихьэхэкIэ тIури зэфэгумэкIыжьых, ащ къыхэкIыкIэ яеджэн нахь къыщэкIэ. ЗэшитIур къиныгъуабэхэм яуалIэх, ахэр зэпачых, ыпэкIэ лъэкIуатэх. Роль шъхьаIэхэр къэзышIыгъэхэр Николай ыкIи Сергей Журавлевхэр ары.
Фильмыр зыщытырахыгъэр Адыгеим икъэлэ шъхьаIэу Мыекъуапэ иаэродром ары. Анахь гъэшIэгъоныр республикэм щыщхэр мыщ зэрэхэ-лэжьагъэхэр ары. Ахэм адыгэ кIэлэ закъоу ахэтыгъ Аджыр Азэмат. Ащ летчик-лейтенантым ироль дэгъу дэдэу къышIыгъ.
Азэмат янэу Гощсимэ къызэрэтиIуагъэмкIэ, фильмым хэлажьэхэрэр мазэм къыкIоцI хьакIэщэу «Эдем» зыфиIорэм исыгъэх. Ау кастинг зэрэщыIэм ежь ышъхьэкIэ щыгъозагъэп. Мафэ горэм Азэмат хьакIэщым ищагу къыдэхьагъэу фильмыр тезыхыхэрэм алъэгъугъ ыкIи агу рихьыгъ. А уахътэм адыгэ кIалэм ыныбжь илъэс 18 хъущтыгъэп. Ау исурэтхэр Москва агъэхьыгъэх ыкIи ыпшъэкIэ зигугъу къэтшIыгъэ ролыр къышIынэу къыхахыгъ.
— Мазэм къыкIоцI тихьэкIэгъэ артистхэм джы къызнэсыгъэми агу тыкъэкIыжьы, къытфатхэх. Мыекъуапэ щагъэкIогъэ уахътэр шIукIэ агу къинэжьыгъ, — еIо Гощсимэ.
ГъэшIэгъон дэдэр мы фильмым роль къыщызышIыгъэ пстэуми профессиональнэ артист зэрахэмытыр ары. Режиссерыр зэрегупшысагъэмкIэ, ащ фэдэ шIыкIэр ыгъэфедэмэ, фильмыр цIыфхэм нахь гурыIогъошIу афэхъущт.
— Мы проектышхом сшIогъэшIэгъонэу сыхэлэжьагъ, джы къызнэсыгъэми мы мафэхэр, роль зэфэшъхьафхэр къэзышIыгъэхэр сщыгъупшэхэрэп. Ащ фэдэ проектхэм джыри сахэлэжьэным сыфэхьазыр, кинор сищыIэныгъэ къыхэуцуагъэу сэлъытэ, — еIо Аджыр Азэмат.
Александр Золотухиным ыгъэуцугъэ фильмэу «Брат во всем» зыфиIорэм фестивалым изэхэщакIохэм осэшIу къыфашIынэу тыщэгугъы. Ащ хэлэжьэгъэ Аджыр Азэмат тапэкIи гъэхъэгъэшIухэр ышIынхэу, ыгу ри-хьыгъэ актер сэнэхьатым гухахъо хигъотэнэу фэтэIо.
Зыгъэхьазырыгъэр ТХЬАРКЪОХЪО Адам.