Урысыем щыпсэурэ лъэпкъхэм якультурэ кIэн и Илъэс лъэпкъ IэшIагъэ­хэм зягъэушъомбгъугъэным тегъэпсыхьагъэу проектэу «Урысыем икартэ хэдыкIыгъ» зыфиIорэм Iоф дашIэу аублагъ. Адыгеим ис IэпэIасэхэри ащ хэлажьэх.

Хэгъэгум икартэшхоу хады­кIыщтым шъолъыр пэпчъ нэшэнэ шъхьаIэу иIэхэр къыхэщыщтых, тхыпхъэ, техникэ зэфэшъхьафхэр агъэфедэщтых. Урысыем ишъо­лъыр 60-мэ арыс IэпэIасэхэр IофшIэным фежьагъэх.

— Адыгэ Республикэм фэгъэ­хьыгъэ Iахьыр хэзыдыкIыщтыр Адыгэ Республикэм культурэмкIэ икъэралыгъо бюджет учреждениеу «Адыгэ Республикэм ­лъэпкъ культурэмкIэ и Гупчэ» народнэ творчествэмкIэ, лъэпкъ культу­рэхэмкIэ иотдел ипащэу, Адыгэ Республикэм лъэпкъ IэшIагъэхэмкIэ и Ассоциацие хэтэу, дышъэ идэмкIэ IэпэIасэу Гумэ Ларис ары, — къыщытаIуагъ Адыгэ Республикэм культурэмкIэ и Министерствэ.

Гъэтхапэм нэс картэм Iоф дашIэщт, Урысыем и Мафэ ехъу­лIэу Чувашскэ Республикэм икъэлэ шъхьаIэу Чебоксары ар апэу къыщагъэлъэгъощт. Урысыем инароднэ артисткэу Надежда Бабкинар ары ар зыпшъэ ралъхьагъэр.

Мэкъуогъум и 12-м къыщегъэ­жьагъэу тыгъэгъазэм и 1-м нэс картэр Урысые Федерацием ифедеральнэ шъолъырхэм, ты­гъэгъазэм и 12-м Москва къащагъэлъэгъощт.

Проектым кIэщакIо фэхъугъэр Чувашскэ Республикэм культу­рэмкIэ, лъэпкъхэм яIофхэмкIэ ыкIи архив IофхэмкIэ и Минис­терств. ЗэхэщакIохэр Чувашскэ Республикэм и Правительствэрэ Урысыем лъэпкъ IофхэмкIэ и Федеральнэ агентствэрэ ары. Москва культурэмкIэ икъэралыгъо бюджет учреждениеу «Русская песня» зыфиIоу Надежда Баб­кинар зипащэр Iофтхьабзэм чанэу хэлажьэ.