ИIофшIэгъухэр зылъещэх
Тэхъутэмыкъое районым иныбжьыкIэ драматическэ театрэу М. С. Ахэджагом ыцIэ зыхьырэм ихудожественнэ пащэу КIубэ Адам искусствэм къыщикIугъэ гъогур тшIогъэшIэгъонэу гущыIэгъу тыфэхъугъ.
ИскусствэхэмкIэ Кощхьаблэ икIэлэцIыкIу еджапIэ 1995 — 1999-рэ илъэсхэм иIэпэIэсэныгъэ щыхигъэхъуагъ. Лъэпкъ къашъохэм зафигъэсэныр ыгу рихьыщтыгъ. Мыекъуапэ къыщыхъугъэ кIалэм сэнэхьатэу къыхихыщтыр нахь къызынэфагъэр 2000-рэ илъэсыр ары. Москва дэт ГИТИС-м чIэхьагъ, артист хъунэу шIоигъуагъ.
2005-рэ илъэсым Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм IофшIэныр щыригъэжьагъ. 2014-рэ илъэсым Инэм щылажьэу зеублэм, ищыIэныгъэ зэхъокIыныгъэхэр фэхъугъэх. Лъэпкъ ансамблэхэу «Кавказым», «Щэрджэсым» яхудожественнэ пащэу искусствэм нахь куоу хэуцуагъ. Адыгэ къэшъокIо ансамблэу «КъушъхьэчIэсхэр» Натыхъуае щызэхищагъ. Щысэ зытырахырэ ансамблэу ар хъугъэ.
Театрэм, кином яартистэу КIубэ Адам федеральнэ проект къэгъэлъэгъонхэм ахэлажьэ. «Джокер-3», «Русалка», «Батальон», «Подставные», нэмыкIхэри Геленджик, Мыекъуапэ, Москва ащытырахыгъэх.
— Драматическэ рольхэр сыгукIэ нахь къыспэблагъэх, — еIо КIубэ Адамэ. — Комедием фэгъэхьыгъэхэри сшIогъэшIэгъоных, защысыуплъэкIу сшIоигъу.
Артистыр сыдигъокIи иIофшIэн фэхьазырын фаеу А. КIубэм елъытэ. Егъэджэн зэхахьэхэм, IэпэIасэм иеджапIэ, продюсерхэм, режиссерхэм язэIукIэхэм ахэлажьэ.
Театрэм Iоф зэрэщишIэрэм мэхьэнэ ин зэрэритырэм фэдэу, фильмэхэр тырахыхэ зыхъукIэ къащишIыщт рольхэм мэхьэнэ ин ареты. Арэу щытми, театрэмрэ киномрэ зэрэзэфэмыдэхэр, искусствэм уилъагъо щыпхырыпщыныр зэрэкъиныр изэфэхьысыжьхэм къащыхегъэщы.
Кинор ищыIэныгъэ щыщ, опыт зиIэ артистхэм акIырэплъы. Искусствэм гъунапкъэ иIэп. Ар къыдилъытэным фэшI исэнэхьат къызэрыкIоу зэрэщымытым ежь-ежьырэу уасэ реты. ИIофшIэн нахьышIоу зэрэзэхищэщт шIыкIэхэм алъыхъуныр шэнышIу фэхъугъ.
Драматическэ ныбжьыкIэ театрэу М. Ахэджагом ыцIэ зыхьырэм, кIэлэцIыкIу драматическэ купэу «Нурэм» яхудожественнэ пащэу Тэхъутэмыкъое районым культурэмкIэ и Унэ Iоф щишIэзэ, ныбжьыкIэхэм ягъэсэн, искусствэм хэщэгъэнхэм пылъ, общественнэ пшъэрылъхэр егъэцакIэх.
НыбжьыкIэ театрэр искусствэм нахь лъагэу щиIэты шIоигъоу КIубэ Адамэ къытиIуагъ. Репертуарым зэхъокIыныгъэхэр фишIынхэу имурад.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм творческэ купхэр пэгъокIыхэзэ, япшъэрылъхэр нахьышIоу зэрагъэцэкIэщтхэм пылъых.
ЖэнэлI Сулиет.