Шъуяплъ, зыжъугъэпсэф
Адыгеим икинотеатрэхэр ыкIи киноеплъыпIэхэр «Пушкинскэ картэм» ипрограммэ техникэмкIэ епхыгъэхэу шIыгъэнхэм фэшI Iофхэр кIэухым фэкIох.
Лъэпкъ проектэу «Культурэм» къыхиубытэу илъэс къэс киноеплъыпIэхэр зэтырагъэпсыхьажьых. Федеральнэ бюджетым къыхахызэ сомэ миллиони 5 IофшIэнхэм апаIуагъахьэ.
КиноеплъыпIи 7-мэ ащыщэу 6-р мэзэе мазэм къыкIоцI «Пушкинскэ картэм» ипрограммэ рапхынэу щыт. Ащ фэгъэхьыгъэ унашъо Адыгэ Республикэм культурэмкIэ иминистрэу Аулъэ Юрэ ышIыгъ.
Кощхьэблэ районым лъэпкъ культурэмкIэ и Гупчэ, Красногвардейскэ районым икиноеплъыпIэ, Адыгэкъалэ, Ханскэм культурэм иучреждениехэм, икъоджэ Унэ, Тэхъутэмыкъое районым ипсэупIэу Инэм икиноеплъыпIэ, Джэджэ районым икинотеатрэу «Родинэр», гъэцэкIэжьын Iофыгъохэр заухыхэкIэ Шэуджэн районым лъэпкъ культурэмкIэ и Гупчэ «пушкинскэ картэм» ипрограммэ рапхыщтых.
Мыекъопэ районымкIэ Тульскэм культурэмкIэ илъэпкъ Гупчи программэм хагъэхьащт.
Мыекъуапэ дэт унэе кинотеатрэхэу «Джой Ленд» ыкIи «Айко Синема» зыфиIохэрэм уплъэкIун Iофыгъохэр ащэкIох.
Адыгэ Республикэм культурэмкIэ иминистрэ иапэрэ гуадзэу Ольга Гавшинам къыIуагъ районхэм, къалэхэм якиноеплъыпIэхэр программэм шIэхэу зэрэхэуцощтхэр.
Билетхэр зэращэщтхэм, онлайным епхыгъэхэу Iофыр зэрэлъагъэкIотэщтым, нэмыкIхэм яхьылIэгъэ зэзэгъыныгъэхэр къулыкъушIэхэм зэдашIых.
«Пушкинскэ картэмкIэ» билетхэр ащэфынхэ алъэкIыщт мыщ фэдэ фильмэхэм яплъынхэм фэшI: «Другое имя», «Последний богатырь», «Чемпион мира», нэмыкIхэри.
Урысыем щытырахыгъэ фильмэхэу къагъэлъэгъощтхэм якъыхэхын зэхэщакIохэр пылъых.
«Пушкинскэ картэр» Урысыем икъэралыгъо программэу щыт. Илъэс 14 — 22-рэ зыныбжьхэр хэлажьэх. Картэм зэкIэмкIи 2022-рэ илъэсым ыуасэр сомэ мини 5. Ащ щыщэу сомэ мини 2-кIэ кинофильмэхэм яплъынхэу амал яI.
«Пушкинскэ картэр» Урысыем щыпсэурэ ныбжьыкIэхэу илъэс 14 — 22-рэ зыныбжьхэм къаратыным фэшI апэу атхынхэ фае. ИнтернетымкIэ ащ икъоу зыщагъэгъозэн алъэкIыщт.
Кином цIыфыр епIу, искусствэм чIыпIэ ин щыриI. Фильмэ дэгъухэм гъэзетеджэхэр яплъынхэу, кинор ящыIэныгъэ щыщ хъунэу афэтэIо.
Сахьидэкъо Нурбый.