«Зэкъошныгъэм» имафэхэр
Мыекъопэ футбол клубэу «Зэкъошныгъэм» 2021 — 2022-рэ илъэс ешIэгъум пиублэжьынэу зегъэхьазыры.
— Мэзаем и 10-м къыщегъэжьагъэу ешIакIохэм стадионэу «Юностым» егъэджэн-зыгъэсэн зэIукIэгъухэр яIэщтых, — къытиIуагъ клубым идиректорэу ХъуакIо Къэплъан. — Стадионэу «Юностыр» зэтегъэпсыхьагъ, ныбджэгъу, уплъэкIун ешIэгъухэр щызэхэтщэнхэ тлъэкIыщт.
«Зэкъошныгъэм» хэкIыжьыгъэхэм, кIэу аштагъэхэм ацIэ къетIогорэп. Мэфэ заулэкIэ ахэр нахь нафэ хъущтых. Клубым иешIакIохэм яIэпэIэсэныгъэ хагъэхъоным фэшI Шъачэ кIонхэу мурад яI, ау уахътэр гъэнэфагъэп. «Зэкъошныгъэм» итренерхэм яштаб ипащэу Чэгъэдыу Бибэрт клубым иешIакIохэм Iоф адешIэ, зэгъэпшэнхэр ешIых.
Гъэтхапэм и 6-м илъэс ешIэгъум паублэжьыщт. «Зэкъошныгъэр» Ростов-на-Дону щыIукIэщт зэнэкъокъум апэрэ чIыпIэр щызыIыгъ командэу СКА-м.