Европэм футбол цIыкIумкIэ изэнэкъокъу Голлан­дием икъалэу Амстердам щыкIуагъ.

Урысыем ихэшыпыкIыгъэ коман­дэ зэIукIэгъухэм захэлажьэм ятIо­нэрэ чIыпIэр къыдихыгъ.

КIэух ешIэгъур

Португалиер — Урысыер — 4:2 (1:2). Къэлапчъэм Iэгуаор дэзыдза­гъэхэр: Соколов — 10, Афанасьев — 13, Урысыер. Паку — 19, Коэлью — 27, 32, Варела — 40, Португалиер.

ЗэIукIэгъур тифутбол ешIакIохэм дэгъоу рагъэжьагъ. Соколовымрэ Афанасьевымрэ къэлап­чъэм Iэгуаор зырызэ дадзагъ. Пчъагъэм хагъэхъонэу амалхэр яIагъэх, ау Португалием икомандэ икъэлэпчъэIут шIокIынхэ алъэ­кIыгъэп, ухъумакIохэри цыхьэ­шIэгъоу ешIагъэх.

Зэнэкъокъур кIэухым факIозэ 3:2-у Португалием текIоныгъэр ыхьыщтыгъ. Тикомандэ икъэлэп­чъэIутэу Путиловым ичIыпIэкIэ зэIукIапIэм ешIакIоу Абрамовыр къырагъэхьагъ. Урысыем иешIа­кIохэр бэрэ апэкIэ илъыгъэх, къэлапчъэм благъэу екIугъэх, ау хъагъэм Iэгуаор радзэнэу янасып къыхьыгъэп. Португалием иешIакIоу Варелэ Iэгуаор къызыIэкIахьэм, къэлэпчъэ нэкIым изакъоу екIуи, Iэгуаор дидзагъ — 4:2.

Дунаим, Европэм ячемпионэу Португалием икомандэ ешIэгъур ыхьыгъэми, тиспортсменхэр дэгъоу ешIагъэхэу плъытэ хъущт. Сыд пIуагъэми, ятIонэрэ чIыпIэр Европэм къыщахьыгъ. Афана­сьевым, Антошкиным, Абрамович, Абрамовым, Давыдовым, Соколовым, нэмыкIхэм тыжьыныр къыдэхыгъэным яIэпэIэсэныгъэ халъхьагъ. Тренер шъхьаIэр Сергей Скорович. Ащ къызэри­Iуагъэу, тиешIакIохэм тафэраз.