Насыпым, мамырныгъэм язехьакIоу «Шыу маф»
«Адыгэ макъэр» ублапIэ фэхъугъ
Я 19-рэ лIэшIэгъу. Европэр. Адыгэ кIалэм ышъхьэ къырыкIогъэ хъугъэ-шIагъ. Ащ фэгъэхьыгъэ пьесэ Дэрбэ Тимур ытхыгъэу, ЕмкIуж Андзор къэгъэлъэгъонэу джы егъэуцу. Адыгэ кIалэм икъэбар нэмыц хъарзынэщхэм къахихыжьи, шIэныгъэлэжьэу Едыдж Батрай гъэзетэу «Адыгэ макъэм» къыщыхаутыгъагъ. Ащ къыкIэлъыкIоу Дэрбэ Тимур пьесэри ытхыгъ.
— Ащыгъум сэ лъэшэу сшIогъэшIэгъон хъугъэ я 19-рэ лIэшIэгъум, 1850-рэ илъэсхэм, черкесхэр Пруссием зэрэкIогъагъэхэр. Европэмрэ тихэкурэ зэрэзэпэчыжьэхэм емылъытыгъэу, — еIо Тимур. — Пруссием имушкетерхэмрэ адыгэ кIалэхэмрэ ащыгъум зэо-зэутэкIыныгъэ яIэ хъугъагъ. Ар апэрэу згъэшIэгъуагъэ къэбарым сызеджэм. ЯтIонэрэу сшIогъэшIэгъон хъугъэр — къалэу Бромберг 1851-рэ илъэсым хьыкумэу щырекIокIыгъагъэр ары. Адыгэхэр ащ щаумысыщтыгъэх е къыщагъэгъунэщтыгъэх. А лъэхъэнэ чыжьэм хьыкумым присяжнэхэр, очылыр, прокурорыр хэлажьэщтыгъэх. Адыгэ кIалэр къыгъэгъунэным фэшI зыщыщ лъэпкъым икъэбар, итарихъ очылым зэригъэшIэгъагъ. Ари лъэшэу згъэшIэгъогъагъэхэм ащыщ. Адыгэхэм афэгумэкIэу хьыкумым къэбар гъэшIэгъонхэр къыщиIотэгъагъэх.
Зы хьыкум Iоф фэд. Ау адыгэ кIалэм, зыщыщ лъэпкъым ящыIакIэ, ядунэететыкIэ афэгъэхьыгъ. ЫкIи зы нэбгырэ икъэбар адыгэ лъэпкъым фагъэхьы.
— Мы пьесэм адыгэгур, адыгэ псэр, адыгэ дунэееплъыкIэр щызэфэхьысыжьыгъ, — къеIуатэ режиссерэу ЕмкIуж Андзор. — ЛIыхъужъ шъхьаIэу пьесэм хэтым ыгу илъыр, ащ идунэееплъыкIэ адыгэу дунаим тет пстэуми, зыдэщыIэм емылъытыгъэу, IэкIыбми, хэкуми яеплъыкI ары. Сыд фэдэ лIэшIэгъу укъыхэхъухьагъэми, е непэрэ мафэм ухэтми, уидунэееплъыкIэ пфэхъожьынэу щытэп, ар лъым хэлъ, ным ибыдзыщэ къыдакIо.
Дэрбэ Тимур ытхыгъэ пьесэм зеджэм, ЕмкIуж Андзор бэрэ егупшысагъэп. Къэгъэлъэгъон зэригъэуцущтым ицыхьэ телъыгъ. Джащ тетэу адыгэ лъэпкъ театрэу Цэй Ибрахьим ыцIэ зыхьырэм Iофым щыфежьагъэх.
Бромберг щыкIогъэ процессыр...
Ащ фэдэу Дэрбэ Тимур пьесэу ытхыгъэм еджагъ. 2020-рэ илъэсым драматургием ылъэныкъокIэ зэнэкъокъоу зэхащэгъагъэм апэрэ шъуашэ зиIэ лауреатыцIэр къыщыфагъэшъошэгъагъ. Къэгъэлъэгъон агъэуцунэу зыфежьэхэм, режиссерымрэ тхакIомрэ Iоф зэдашIагъ. «Шыу мафэри» ащ къыкIэлъыкIуагъ.
— Андзоррэ сэррэ тызэдэгущыIэжьи, нахь къызэрыкIоу, ау мэхьанэ куу иIэу шъхьэ фэтшIын зэрэфаем тыкъыфэкIуагъ, — еIо Дэрбэ Тимур. — «Шыу мафэ» ежь Андзор къыIуагъ, сэри дезгъашти, джащ тетэу ыцIэ зэблэтхъужьыгъ. Тарихъ хъугъэ-шIагъэм хэтми, пьесэм илIыхъужъ шъхьаIэ Мусса ыцIэр, ау ащи ШумафэкIэ теджагъ. Насыпыр, шIур къэзыхьырэ дунаир къэзыгъэнэфырэ шыу — ары купкIэу иIэр. ЕтIани лъэшэу сэ сызгъэгушIорэр мы спектаклыр ЕмкIуж Андзор зэригъэуцурэр ары. Режиссер IэпэIас, ыцIэ чыжьэу Iугъэ ыкIи еплъыкIэ, гупшысэкIэ гъэшIэгъон IэкIэлъ.
Тарихъ хъугъэ-шIагъэми ащ фэдэу хэт — 1850-рэ илъэсым хьыкумым хэлажьэхэрэм адыгэхэм якъэбар ашIэнэу хъугъагъ. Адыгэ кIалэр къыгъэгъунэ зыхъукIэ, IэубытыпIэ ышIынхэм пае лъэпкъым итарихъ, ишэн, ихабзэ очылым зэригъэшIэгъагъ. ЫкIи хьыкумым хэлажьэрэ прокурорым пэуцужьыным фэшI ахэр ыгъэфедэщтыгъэх. Адыгэ кIалэхэр мамырым изехьакIохэу, шъыпкъагъэм ыкIи зэфагъэм афаблэхэу зэрэщытхэр къыIуатэщтыгъ. Джы лъэпкъ театрэм иактерхэм мы тарихъ хъугъэ-шIагъэхэр утыкум къыралъхьэ. Хъуадэкъо Азэмат Шумафэ къэгъэлъэгъоным къыщешIы. Мыр тарихъ хъугъэ-шIагъэм техыгъ ыкIи хъун ылъэкIыщтыгъэхэри тхакIом хигъэхьагъэх. Ар шIулъэгъуныгъэ Iоф.
— Тарихъ къэбар шъыпкъэм хэмытыгъэу цIыфхэм нахь ашIогъэшIэгъоныным фэшI шIулъэгъуныгъэ хэзгъэхьагъ, — къеIуатэ Дэрбэ Тимур.
Джы мары хьыкумым къэралыгъо умысакIоу щыIэ нэмыц лIым ыпхъу Шумафэ шIу елъэгъу. Пшъашъэм ятэ ар ыгу рихьырэп ыкIи адыгэ кIалэр зэриушъхьакIущтым ыуж ит. Нэмыц прокурорым ироль Тхьаркъохъо Теуцожь къешIы. «Адыгэхэм мыхъунхэр ясIуалIэ зыхъукIэ сыгу зэбгъэжьы», — еIо ащ. Прокурорым ыпхъур Тхьакъохъо Мэрджан ары. Театрэм нэмыкI лъэпкъхэм ащыщ бзылъфыгъэхэм ярольхэр къыщишIыхэу къыхэкIыгъ. Джы нэмыц пшъашъэм зырегъапшэ.
— Пьесэм нэмыц прокурорэу сыхэт, адыгэ кIалэр спхъу нэIуасэ фэхъу, шIу зэрэлъэгъух. Джы адыгэхэр фэсэуIэих, дэих, Iэлых, ашъэ икIыгъэм фэдэх сэIо, зэшIозгъэкIодынхэу ары сыгу илъыр. Ащ пае кIалэм укI тыралъхьанэу е хьапс къыхьынэу сыкIэдэу, зэкIэрысчынхэр ары пшъэрылъэу сиIэр. 1850-рэ илъэсхэр ары мыр зыхъугъэр. Ащыгъум Европэм щагъэшIэгъогъагъ мы къэбарыр. Адыгэ кIалэхэр ныбжьыкIагъэх, илъэс 21 — 30 нахь аныбжьыгъэп. Джыри мары илъэси 170-м ехъу тешIагъэу къэбарым къыфэдгъэзэжьыгъ, — еIо Теуцожь.
— Сыдэущтэу нэмыкI лъэпкъым щыщ бзылъфыгъэ къэсшIыщт сIуи, ащ екIолIакIэу фыхэсхыщтым сегупшысыгъ, — лъегъэкIуатэ къэбарыр Тхьакъохъо Мэрджанэ. — Титеатрэ нэмыкI лъэпкъхэр къыщызгъэлъагъоу къыхэкIыгъ — Испанием ыкIи Грузием ащыщ бзылъфыгъэхэр. Ар уисэнэхьат зыхъукIэ, узыфаер къыбдэхъуным фэшI Iоф зыдэпшIэжьын фае.
НэфапIа, хьауми пкIыхьапIа?
Шъыпкъэ, къэгъэлъэгъоным икъэбар режиссерым еушъэфы. Ащ еплъынэу къэкIощтхэм шIухьафтын гъэшIэгъон афэхъуным фэшI зэкIэ игупшысэхэр, игухэлъхэр къыIуатэхэрэп. Ау иекIолIакIэ къызэрыкIоу зэрэщымытыр къыхигъэщыгъ:
— ЦIыфыр мыщ зеплъыкIэ, шъыпкъа е пкIыхьапIа? — ащ фэдэу зэупчIыжьынэу къэзгъэлъэгъонэу сыфай. ЗэкIэ актерхэми, сурэтышIхэми, шъуашэхэр зыдыхэрэми а гупшысэр къыздаIыгъ.
Къэгъэлъэгъонэу «Шыу мафэ» пае шъуашэхэр кIэу адых, джырэкIэ джэнэ 20 агъэхьазырыгъах. Ау ащ къыщыуцущтхэп, сыда пIомэ цIыфыбэ хэтыщт ыкIи зэкIэми апае шъуашэхэр кIэу ашIыщтых. ШъуашэхэмкIэ сурэтышI-модельерыр Лlыхъурэе Росит. Зыфэгъэзэгъэ IофшIэныр ащ къытфеIуатэ:
— А лъэхъаным щыIэгъэ модэр тиIэубытыпI, ау къэгъэлъэгъоныр мэкIофэ шъуашэми зызэблехъу, лъэпкъ нэшанэхэр къыхахьэх. Адыгэ ыкIи нэмыц шъуашэхэр щызэхэпхъагъэу мэхъу.
Ащ язакъоп, утыкум итеплъи зыфэдэщтыри агъэхьазыры. ЕмкIуж Андзор сурэтышIэу Сихъу Рэмэзан игъусэу ащ Iоф дашIэ. Ари джырэкIэ анахь шъэфхэм ащыщ. СурэтышIымрэ режиссерымрэ зэгурыIохэ къодыеп, яеплъыкIэхэри зэтефэх.
— Режиссер пэпчъ ежь хихыгъэу екIолIакIэ иI, — къеIуатэ АР-м инароднэ сурэтышIэу Сихъу Рэмэзан. — Андзор иекIолIакIэ сыдигъокIи гъэшIэгъоны. Тимур узIэпищэу пьесэр ытхыгъ, режиссерыми екIолIакIэ иI, сэри зыгорэ хэслъхьажьынэу сыщэгугъы.
Адыгэ лъэпкъым иблэкIыгъэ ыкIи инеущ ыгъэгумэкIхэрэ тхакIомрэ режиссерымрэ гухэлъ гъэнэфагъэхэр яIэхэу Iоф ашIэ. Къэгъэлъэгъоным иIахь анахь макIэм ышъхьэ къырахыгъ ныIэп.
— Спектаклыр ышъокIэ, итеплъэкIэ, исурэткIэ адырэхэм афэдэу щытыщтэп, — еIо режиссерым. — ПэIухъор къызэIуахымэ, цIыфэу залым чIэс- хэм алъэгъугъэр агъэшIэгъонкIэ псалъэ къыосэты. Ау ащ тынэмысэу нахьыбэ къэтэмыгъэIуат.
Джащ фэдэ зэфэхьысыжь зэдэгущыIэгъум къыфишIи, актерхэм адэлэжьэнэу режиссерым пидзэжьыгъ. Адыгэ лъэпкъым ищыIакIэ, идунэететыкIэ ыкIи игупшысакIэ зыкIоцIылъ спектаклым мафэ къэс Iоф дашIэ. Ар гъэтхапэм ыкIэм къагъэлъэгъонэу агъэнафэ.
ГъукIэлI Сусан.