Лъэпкъ оркестрэ тищыкIагъ
Адыгэ Республикэм имузыкальнэ искусствэ зеушъомбгъу, хэхъоныгъэу ышIыхэрэм тагъэгушIо.
Адыгеим и Къэралыгъо академическэ ансамблэу «Налмэсыр», республикэм и Къэралыгъо камернэ музыкальнэ театрэу Хьанэхъу Адамэ ыцIэ зыхьырэр, Адыгэ Республикэм и Къэралыгъо орэдыIо-къэшъокIо ансамблэу «Ислъамыер», республикэм и Къэралыгъо филармоние иансамблэу «Ошъутенэр», кIэлэцIыкIу ансамблэхэр тиIэх.
Урысыем, Адыгеим, Темыр Кавказым яшъолъырхэм язаслуженнэ артистхэр, Адыгэ Республикэм инароднэ артистхэр, сэнаущыгъэ зыхэлъ артистхэр творческэ купхэм ахэтых. Искусствэр лъызыгъэкIотэн зылъэкIыщт еджагъэхэр нахьыбэ мэхъух.
Адыгэ къэралыгъо университетым искусствэхэмкIэ и Институт, Адыгэ Республикэм искусствэхэмкIэ иколледж, искусствэхэмкIэ кIэлэцIыкIу еджэпIэ 20-м нахьыбэмэ Адыгеим Iоф щашIэ. ТызыщыкIэрэ кадрэхэм ягъэхьазырынкIэ IэпыIэгъу къытфэхъунхэм фэхьазырых тигъунэгъухэу Ростов-на-Дону, Краснодар, Налщык яапшъэрэ еджапIэхэр.
Гъэхъагъэу тиIэр къызыдэтлъытэкIэ, Адыгэ Республикэм лъэпкъ музыкальнэ Iэмэ-псымэхэмкIэ иоркестрэ зэхащэн алъэкIыщтэу плъытэ хъущт.
Композиторэу Тхьабысымэ Умарэ орэд 600 нахьыбэ ыусыгъэу къалъытэ, Натхъо Джанхъот иорэдхэр 400-м къыщыкIэхэрэп. Анзорыкъо зэшхэу Чеславрэ Вячеславрэ, Сихъу Рэмэзан, Гъонэжьыкъо Аскэр, КIыргъ Юрэ, Бысыдж Мурат, Емыж Нурбый, Хэшх Казбек, ХьакIэко Алый, фэшъхьафхэм аусыгъэхэр шъэ пчъагъэ мэхъух.
Искусствэм щыцIэрыIохэу Нэхэе Аслъан, Гъот Аслъан, Тыкъо Къэплъан, Хъупэ Мурат, КIубэ Щэбан, Сэмэгу Гощнагъу, фэшъхьафхэм ятворчествэ къызыдэплъытэкIэ, къахэпхынэу орэдыбэ, музыкальнэ произведениехэр щыIэх. Лъачэ Альберт, ЛIыбзыу Аслъан, Мышъэ Андзаур, нэмыкIхэм яорэдхэу, аранжировкэ ашIыгъэхэр гум къегущыIыкIых.
Лъэпкъ музыкальнэ Iэмэ-псымэхэмкIэ оркестрэр зызэхащэкIэ адыгабзэм изэгъэшIэн, игъэфедэнкIэ тиамалхэм хэхъоныгъэ афэхъущт, лъэпкъ шэн-хабзэхэр нахьышIоу зэрагъэшIэщтых. ЛIэужхэм, IэкIыб хэгъэгухэм арыс адыгэхэм, республикэм щыпсэурэ лъэпкъхэм язэфыщытыкIэхэр гъэпытэгъэнхэм оркестрэр чанэу хэлэжьэщт. ШIэжь яIэу ныбжьыкIэхэр щыIэныгъэм хэщэгъэнхэмкIэ шIыкIэшIухэр зэхэщакIохэм къагъотыщтых.
Япчъагъэ хэхъощт
Орэд къэзыIо, адыгэ орэд зыусы зышIоигъохэм япчъагъэ зэрэхэхъощтым щэч хэлъэп. Лъэпкъ искусствэм тапэкIи нахь зиушъомбгъуным фэшI лъэпсэшIу республикэм ышIыгъэу тэлъытэ. ШIушIагъэу щыIэр къэтыухъумэным, лъыдгъэкIотэным тыфэмыхьазырэу зылъытэхэрэм адедгъаштэрэп.
Лъэпкъ оркестрэр зэрэтищыкIагъэм ехьылIэгъэ тхыгъэхэр «Адыгэ макъэм», «Гъуазэм» къащыхэтыутыхэу къыхэкIыгъ, ау Iофыр тызэрэфаеу лъыкIуатэрэп. Республикэм культурэмкIэ и Министерствэ, Адыгэ Республикэм икомпозиторхэм я Союз, республикэ общественнэ движениеу «Адыгэ Хасэм», фэшъхьафхэм оркестрэм ехьылIэгъэ гупшысэхэр къащытIэтыгъэх шъхьае, егъэжьапIэр чIыпIэм икощыкIыгъэгоп.
Композиторэу Нэхэе Аслъан, АР-м и Къэралыгъо филармоние ипащэу Къулэ Мыхьамэт, Урысыем изаслуженнэ артисткэу, кIэлэегъаджэу Нэхэе Тэмарэ, пщынэо цIэрыIоу Мышъэ Андзаур, нэмыкIхэм ягупшысэхэр тшIогъэшIэгъоных, лъэпкъ музыкальнэ Iэмэ-псымэхэмкIэ оркестрэ тищыкIагъэу алъытэ.
Тызыхэт илъэсыр
2022-рэ илъэсыр Урысыем щыпсэурэ лъэпкъхэм яискусствэрэ якультурнэ кIэнрэ я Илъэс. Адыгеир къэралыгъо гъэпсыкIэ иIэу зыпсэурэр мыгъэ илъэси 100 мэхъу. Тарихъым, щыIэныгъэм тигупшысэхэр ятэпхых. Лъэпкъ оркестрэр искусствэм шIухьафтын фэхъунэу, апэрэ лъэбэкъур гъашIэм щидзынэу фэтэIо.