Урысыем иныбжьыкIэхэм самбэмкIэ язэнэкъокъу Нижегород хэкум икъалэу Кстово щылэ мазэм и 30-м щегъэжьагъэу мэзаем и 4-м нэс щыкIуагъ.

Къыблэм ихэшыпыкIыгъэ командэ хэтхэу Адыгэ Республикэм ибэнакIохэр зэIукIэгъухэм ахэлэжьагъэх. Урысыем ишъолъырхэм яспортсмен 600 Кстово щызэнэкъокъугъ.

Адыгэ Республикэм самбэмкIэ испорт еджапIэ зыщызыгъэсэрэ Екатерина Соловьевам, кг 80-м къехъу, дышъэ медалыр къыдихыгъ, тренерэу Нэныжъ Байзэт ипащ.

Кобл Рэмэзан, кг 53-рэ, Нащ Расул, кг 58-рэ, ятIонэрэ чIыпIэхэр къахьыгъ. Тренерхэу Джарымэкъо Рустамрэ Джарымэкъо Азмэтрэ япащэх. Тыгъужъ Тимур, кг 49-рэ, ящэнэрэ чIыпIэр къыхьыгъ. Тренерхэу Делэкъо Адамрэ Хьабэхъу Адамрэ агъасэ. Ваган Григорян, кг 88-рэ, ящэнэрэ чIыпIэр къыдихыгъ, тренерыр Роман Оробцов.

— Апэрэ чIыпIэр къыдэзыхыгъэ Екатерина Соловьевар дунаим иныбжьыкIэхэм язэнэкъокъоу чъэпыогъум и 16 – 17-м Болгарием щыкIощтым хэлэжьэщт. ЯтIонэрэ чIыпIэхэр къэзыхьыгъэхэ Кобл Рэмэзанрэ Нащ Расулрэ Европэм изэнэкъокъоу Эстонием щызэхащэщтым щыбэнэщтых, — къытиIуагъ Адыгэ Республикэм самбэмкIэ испорт еджапIэ ипащэу, Урысыем спортымкIэ дунэе класс зиIэ имастерэу Делэкъо Адамэ. – Хэгъэгум иныбжьыкIэхэм язэнэкъокъу тиспортсменхэм, тренерхэм гъэхъагъэу щашIыгъэр Адыгеир къэралыгъо гъэпсыкIэ иIэу зыпсэурэр илъэси 100 зэрэхъурэм фагъэхьы.