Налщык щыбэнагъэхэм тагъэгушIуагъ
Темыр Кавказым идзэ шъолъыр (СКВО) тхэквондомкIэ изэIухыгъэ зэнэкъокъу Налщык щыкIуагъ.
Адыгэ Республикэм испорт еджапIэу N 2-м зыщызыгъасэхэрэ ныбжьыкIэхэр зэIукIэгъухэм ахэлэжьагъэх. ЕджапIэм ипащэр Урысыем, Адыгеим язаслуженнэ тренерэу Хъот Юныс.
Террорым, экстремизмэм апэшIуекIонхэм афэгъэхьыгъэ зэнэкъокъум тибэнакIохэм хагъэунэфыкIырэ чIыпIэхэр къыщыдахыгъэх.
Даур Къадырбэч, кг 87-рэ, Кристина Левишевам, кг 68-рэм къехъу, апэрэ чIыпIэхэр къыдахыгъэх. Кристина Дюбинам, кг 73-рэ, ятIонэрэ чIыпIэр къыфагъэшъошагъ.
Алексей Лупетэ, кг 73-рэ, Эрик Агиенкэм, кг 68-рэ, Кариякос Заимидис, кг 55-рэ, ящэнэрэ чIыпIэхэр къыдахыгъэх.
Адыгэ Республикэм испорт еджапIэу N 2-м итренерэу Василий Есиным тхэквондом ныбжьыкIэхэр фегъасэх. ЩыIэныгъэм лъэпкъ шэн-хабзэхэр щызэрахьанхэм мэхьанэшхо реты. Тиспортсменхэр шъолъырхэм къарыкIыгъэ бэнакIохэм нэIуасэ афэхъугъэх, спортым, пIуныгъэм афэгъэхьыгъэ хъугъэ-шIагъэхэм атегущыIагъэх.