Адыгеим и ЛIышъхьэу КъумпIыл Мурат Адыгэ Республикэм хэгъэгу кIоцI IофхэмкIэ и Ми­нистерствэ иколлегие изэхэсыгъоу мы ведомствэм гъэрекIо Iоф зэришIагъэм ыкIи мы илъэсым иапэрэ кIэлъэныкъо пшъэрылъэу иIэхэм зыщатегущыIагъэм хэлэжьагъ. Рес­публикэм хэгъэгу кIоцI IофхэмкIэ иминистрэу Олег Безсмельницыным зэхэсыгъор зэрищагъ.

Джащ фэдэу коллегием изэхэсыгъо хэлэжьагъэх Адыгэ Республикэм и Къэ­ралыгъо Совет – Хасэм и Тхьаматэу Владимир Нарожнэр, видеоконференцие шIыкIэм тетэу – Урысые Федерацием и Президент и Полномочнэ лIыкIоу ЮФО-м щыIэм иаппарат АР-мкIэ ифедеральнэ инспектор шъхьаIэу Сергей Дрокиныр, республикэм ихэбзэухъумэкIо къулыкъу­хэм япащэхэр.

Адыгеим хэгъэгу кIоцI IофхэмкIэ иминистрэ зэхэсыгъор къызэIуихызэ зэрэхигъэунэфыкIыгъэмкIэ, общественнэ зэфыщытыкIэхэм япхыгъэ хабзэхэр мыукъогъэнхэмкIэ пшъэрылъхэр икъоу республикэм щагъэцэкIагъэх. Къыблэ федеральнэ шъолъырымрэ Урысыемрэ ялъытыгъэмэ, гурытымкIэ бзэджэшIа­гъэу республикэм щызэрахьагъэр нахь макI. ГъэрекIо бзэджэшIэгъэ 4496-рэ респуб­ликэм щызэрахьагъэу агъэунэфыгъ.

«ИкIыгъэ илъэсыр къиныгъэ, нахьыбэрэмкIэ ар зэпхыгъагъэр коронавирусым зызэриушъомбгъугъагъэр ары. Адыгеим и ЛIышъхьи, республикэм ихабзэ игъэцэкIэкIо, илIыкIо къулы­къухэ­ми «тхьашъуегъэпсэу» ясэIо IэпыIэгъу къызэрэтфэхъугъэхэм фэшI. ХэбзэухъумэкIо къулыкъу пстэуми тIэ зэкIэдзагъэу тызэрэзэдэлэжьагъэм ишIуагъэкIэ Iофхэр зыпкъ идгъэтынхэ, рэхьатныгъэр къэтыухъумэн тлъэ­кIыгъ, — къыIуагъ министрэм.

Адыгэ Республикэм хэгъэгу кIоцI Iоф­хэмкIэ и Министерствэ иштаб ипащэу, къулыкъум иполковникэу Маским Черносмага гъэрекIо Iофэу ашIагъэм къытегущыIагъ. Iофхэр нахь зыщагъэлъэшын фэе лъэныкъо заулэхэм министрэм ягугъу къышIыгъ. Пшъэрылъ шъхьаIэхэм ащыщых телефонкIэ зэрагъапцIэхэрэм, хэбзэнчъэу наркотикхэр къызэрэрагъэ­кIокIыхэрэм япхыгъэ бзэджэшIагъэхэр къегъэIыхыгъэнхэр, гъогухэм тхьамыкIагъохэр нахь макIэу атехъухьанхэмкIэ, Iэтахъохэм бзэджэшIагъэхэр зэрамы­хьанхэмкIэ ищыкIэгъэ амалхэр зехьэ­гъэнхэр.

Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, цIыфхэр щынэгъончъэу псэунхэм, рэхьатныгъэр республикэм къыщыухъумэгъэным апае хабзэм игъэцэкIэкIо къулыкъухэмрэ АР-м хэгъэгу кIоцI IофхэмкIэ и Министерствэрэ язэдэлэжьэныгъэ нахь агъэлъэшын фае. Республикэм къэралыгъо гъэпсыкIэ иIэ зыхъугъэр мыгъэ илъэси 100 зыщыхъурэ илъэсым мэхьанэшхо ащ иIэу щыт.

«Шъуиведомствэ хэбзэухъумэкIо къулыкъухэми, хабзэм икъулыкъухэми зэдэлэжьэныгъэ пытэ адыриI. Щынэгъончъэным епхыгъэ Iофыгъо­хэмкIэ тIэ зэкIэдзагъэу зэкIэми тызэдэлажьэ. Ащ шIуагъэ къызэритырэр къегъэлъагъо гъэрекIо Урысыем и Къэралыгъо Думэ ыкIи Адыгэ Респуб­ликэм и Къэралыгъо Совет – Хасэм ядепутатхэм хэдзынхэр зэхащэхэ зэхъум общественнэ рэхьатныгъэр зэрамыукъуагъэм. ТапэкIи цIыфхэр щынэгъончъэу щыIэнхэмкIэ ищыкIа­гъэр икъоу шIэгъэн фае», – хигъэунэфы­кIыгъ Адыгэ Республикэм и ЛIышъхьэ.

ГъэцэкIэкIо хабзэм икъулыкъухэмрэ хэбзэухъумэкIо къулыкъухэмрэ япшъэ­рылъ шъхьаIэхэр КъумпIыл Мурат къыгъэнэфагъэх. Республикэм ипащэ зэри­лъытэрэмкIэ, Iэтахъохэм хэбзэукъоныгъэхэр амышIынхэмкIэ пэшIорыгъэшъ Iофтхьабзэу зэрахьэхэрэр гъэлъэшыгъэн­хэм мэхьанэшхо иI. КъумпIыл Мурат зэрэхигъэунэфыкIыгъэмкIэ, бзэджэшIагъэхэр нахь макIэу зэрахьанхэмкIэ яшIуагъэ къэкIо хэбзэухъумэкIо къулыкъухэм, гъэсэныгъэм, культурэм, спортым афэгъэзэгъэ учреждениехэм, ныбжьыкIэ движениехэм, общественнэ организациехэм азыфагу илъ зэдэлэжьэныгъэм.

Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм тетэу республикэм игъогухэм щынэгъончъагъэ ателъынми ар афэ­гъэхьыгъ. Автомобиль гъогухэм ягъэцэкIэжьынрэ яшIынрэ Адыгеим щылъагъэкIуатэх; транспортхэр нахь жъугъэу зыщызекIорэ гъогухэм зэхэкIыпIакIэхэр ащагъэпсых; джырэ шапхъэхэм адиштэрэ видео камерэхэр илъэс къэс гъогухэм атырагъэуцох. Джыдэдэм республикэм игъогухэм комплекси 114-рэ ащагъэуцугъ. Мы илъэсым джыри 18 агъэуцунэу рахъухьэ. 2024-рэ илъэсым нэс шъолъыр­хэм ягъогухэм автоматическэ пости 6 ащагъэуцущт. Мыгъэ ащ фэдэ пости 2 агъэпсыгъах.

ТелефонкIэ зэрагъапцIэхэрэм ебэныжьыгъэнымкIэ цIыфхэм адэгущыIэнхэ, ахэр агъэпцIэн зэралъэкIыщтыр агурагъэIон фаеу Адыгэ Республикэм и ЛIышъхьэ ылъытагъ. ЯIофшIэнкIэ анахьэу анаIэ зытырагъэтыщт лъэныкъохэр – терроризмэмрэ экстремизмэмрэ апэуцужьыгъэныр, хэбзэнчъэу наркотикхэр зэрагъэзекIохэрэм, экономическэ бзэ­джэшIагъэхэм, къолъхьэ тын-Iыхыным ябэныгъэныр ары.

Къэралыгъо фэIо-фашIэхэр нахьышIоу гъэцэкIэгъэн, участковэхэм яIофшIэн хэбзэ икъу хэлъхьэгъэн зэрэфаем зэхэ­сыгъом хэлэжьагъэхэм анаIэ тырарагъэ­дзагъ. Хэбзэукъоныгъэу алъэгъухэрэм а­фэгъэхьыгъэу цIыфхэм къэбарэу къа­IэкIагъахьэхэрэм псынкIэу ахэплъэнхэ зэрэфаер республикэм ипащэ къыIуагъ. Адыгеим и ЛIышъхьэ зэрэхигъэунэфыкIыгъэмкIэ, шъолъырым ис цIыфхэм IэпыIэгъу къазэраратыщтым сыдигъуи яцыхьэ телъын фае.

«Тэ гухэлъэу тиIэхэр зэтефэх, ащ фэшI Адыгеим ис цIыфхэм ящыIэкIэ- псэукIэ зыкъегъэIэтыгъэнымкIэ тызэгурыIоу тапэкIи тызэдэлэжьэным мэхьанэшхо иI. Хэгъэгум и Президен­тэу Владимир Путиным зэрэхигъэунэфыкIыгъэу, «кадрэхэмкIи, техникэмкIи, нэмыкI лъэныкъохэмкIи амалэу тиIэр зэкIэ къызфэдгъэфедэн фае цIыфхэм ящынэгъончъагъэ зыкъегъэIэтыгъэным, ахэм яфитыныгъэхэр, яшъхьафитыныгъэ, ямылъку къэухъумэгъэнхэм апае», — хигъэунэфыкIыгъ АР-м и ЛIышъхьэ.

Зэхэсыгъом икIэух республикэм ипащэ министрэми, Адыгэ Республикэм хэгъэгу кIоцI IофхэмкIэ и Министерствэ иIофышIэхэми «тхьашъуегъэпсэу» ари­Iуагъ яIофшIэнкIэ гъэхъагъэхэр зэрашIырэм, зэрэзэгурыIохэрэм, республикэм ихабзэ игъэцэкIэкIо къулыкъухэм дэ­гъоу зэрэдэлажьэхэрэм афэшI. Полицием икъулыкъушIэхэу зиIофшIэн анахьэу гъэхъагъэ щызышIыгъэхэм зэхэ­сыгъом тынхэр къащыфагъэшъошагъэх. Хабзэмрэ рэхьатныгъэмрэ якъэухъумэн­кIэ гъэхъагъэхэр зэряIэхэм фэшI АР-м и ЛIышъхьэ ирэзэныгъэ тхылъ къафагъэшъошагъ полицием иподполковникэу Юрий Волковым, полицием имайорэу Мамый Мурат, полицием ипрапорщикэу Быикъо Нурбый. Джащ фэдэу IофышIэ зырызхэм АР-м и Къэралыгъо Совет – Хасэм ирэзэныгъэ тхылъхэмрэ Урысыем хэгъэгу кIоцI IофхэмкIэ иведомствэ тынхэмрэ къафагъэшъошагъэх.

АР-м и ЛIышъхьэ ипресс-къулыкъу