Урыс лъэпкъ искусствэр бай дэдэу зэрэщытыр ИлъэсыкIэм фэгъэхьыгъэ концертхэм къащагъэлъагъо.

Адыгэ Республикэм и Къэралыгъо филармоние и Къэралыгъо оркестрэу «Русская удалым» ипчыхьэзэхахьэ театрализованнэ гъэпсыкIэхэм къагъэдэхагъ. ИлъэсыкIэм ехьылIэгъэ сурэтхэр гъэкIэ­рэкIагъэхэу сценэшхом къы­тырагъэу­цуагъэх. ЦIыф су­рэтхэр, лъэпкъ Iэмэ-псымэхэр шъо зэфэшъхьафхэмкIэ гъэлагъэх, мэфэкI шъуашэм дештэх.

Урыс лъэпкъ Iэмэ-псымэхэмкIэ оркестрэу А.В. Шипитьком ыцIэ зыхьырэм ихудожественнэ пащэу, Адыгэ Республикэм инароднэ артистэу Андрей Ефименкэр пчыхьэзэхахьэм изэхащакIохэм ащыщ, оркестрэм идирижер.

МэфэкI концертэу «Рождественские святки» зыфиIорэр лекторэу Ибрагимовам зэри­щагъ. Композиторхэм, музыкантхэм, лъэпкъ творчествэм яхьылIэгъэ къэбархэр къыIотагъэх.

Урысыем ыкIи дунэе зэнэкъо­къухэм ялауреатэу Анастасия Истамуловам орэдхэр къыIуагъэх. Дунэе зэнэкъокъум илауреатэу Александр Титаренкэм пщынэмкIэ орэдышъоу къыригъэIуагъэхэр лъэпкъ искусствэм, мэфэкI зэхахьэхэм яхьылIагъэх.

Анатолий Быковым балалайкэмкIэ къыригъэIогъэ произведениехэр гъэшIэгъоных. Пчыхьэзэхахьэм ихьакIэу, Урысые ыкIи Дунэе фестиваль-зэнэкъокъухэм ялауреатэу Елизавета Ковешниковам мэкъэ IэтыгъэкIэ лъэпкъ орэдхэм таригъэдэIугъ. Оркестрэм иартистэу, орэдыIоу Николай Никишиныр пчыхьэзэхахьэр къэзыгъэбаигъэхэм ащыщ.

В. Андреевым, В. Городовскаям, А. Соболевым япроизведениехэу «Мазэм къегъэнэфы», «Урыс кIымаф», «Барыня» зыфиIохэрэр оркестрэм ыгъэ­жъынчыгъэх. Урыс лъэпкъ орэдхэр артистхэм гъэшIэгъонэу къаIуагъэх.

Е. Крылатовым иорэдэу «Шы фыжьищыр» дунэе искусствэм щызэлъашIэ. Анастасия Истамуловам мэфэкI зэхахьэм икIэух а орэдыр мэкъэ къабзэкIэ узыIэпищэу къыхидзагъ.

Концертыр къызаухым, залым чIэсхэр къызыкIэлъэIугъэ произведениехэр оркестрэм къыригъэIуагъэх. ИлъэсыкIэм фэгъэхьыгъэ гущыIэ фабэхэмкIэ мэфэкI пчыхьэзэхахьэр зэфа­шIыжьыгъ, оркестрэм хэт артистхэм, художественнэ пащэу Андрей Ефименкэм бэрэ Iэгу афытеуагъэх. Урысхэр, адыгэхэр, нэмыкIхэри ягуапэу концертым еплъыгъэх.

ЕмтIылъ Нурбый.