КIэлэцIыкIухэмрэ зыныбжь икъугъэхэмрэ апае «ЛIыжъ ЩтыргъукIыр ыкIи тыгъужъ ежьа­шъор» зыфиIорэ концертыр Мыекъуапэ къы­щагъэлъэгъуагъ.

Адыгэ Республикэм и Къэралыгъо филармоние и Къэралыгъо симфоническэ оркестрэ идирижерэу СтIашъу Къэплъан япащэу музыкантхэм классикэм хэхьэгъэ произведениехэр къы­рагъэIуагъэх.

П. Чайковскэм, Д. Шостакович, С. Прокофьевым, А. Лядо­вым, Ж. Бизе, Э. Григ, А. Ха­чатурян аусыгъэхэр оркестрэм къыригъэIуагъэх.

Пшысэм техыгъэ къэгъэлъэгъонэу ЛIыжъ ЩтыргъукIымрэ тыгъужъ ежьашъомрэ яхьы­лIа­гъэм Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм иартисткэу Нэ­хэе Марджанэт къеджагъ.

Филармонием къыщызэIуахыгъэ экранышхом пшысэм къы-­хэхыгъэ едзыгъохэр къыща­гъэлъэгъуагъэх. Сурэтхэр шъо зэфэшъхьафхэмкIэ гъэкIэрэкIагъэх. Пшысэр нахь гурыIогъошIу хъуным фэшI Нэхэе Марджанэт хъугъэ-шIагъэхэм IупкIэу къатегущыIагъ. ЛIыжъ ЩтыргъукIым гъусабэ иI, цIыфхэр кIымэфэ лъэхъаным жэхэм арысхэу мэ­зекIох. ИлъэсыкIэм ехъулIэу мэфэкI шIухьафтынхэр зэрашIыхэрэр, ЛIыжъ ЩтыргъукIыр зэкIэми зэрафэгушIорэр къэгъэлъэгъоным къыхэщы. ШIухьафтынхэр жэм къырадзэхэзэ цIыфхэм алъагъэIэсых, мэфэкIым игушIуа­гъо зэдагощы.

— ИлъэсыкIэм узэфэгушIон, шIухьафтынхэр пшIынхэ фае, — къыIуагъ концертыр зезыщэрэ Нэхэе Марджанэт.

Концертым еплъыгъэхэ Даурхэм яунагъо, Расимэ цIыкIур, нэмыкIхэр бэрэ Iэгу теуагъэх, къэгъэлъэгъоныр ашIогъэшIэ­гъоныгъ. Ар къызаухым, дирижерэу СтIашъу Къэплъан, оркестрэм хэтэу, Адыгэ Респуб­ликэм инароднэ артисткэу Ольга Мамикян, литературнэ Iофыгъохэр зыгъэцэкIагъэу Нэхэе Марджанэт, нэмыкIхэм залым чIэсыгъэхэр гущыIэгъу афэхъугъэх, зэгоуцохэзэ нэпэ­еплъ сурэтхэр атырахыгъэх.

— ЛIыжъ ЩтыргъукIыр, тыгъужъ ежьашъор, мэфэкI зэха­хьэхэр зэрэгъэпсыгъэхэр концертым еплъыгъэхэм агу ри­хьыгъ, — къеIуатэ СтIашъу Къэплъан. — Музыкэмрэ сурэт­хэм якъэгъэлъэгъонрэ зэрэзэдиштэхэрэм тизэхахьэ къыгъэбаигъ.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм, нэмыкIхэм афэ­гъэхьыгъэ зэхахьэхэм симфоническэ оркестрэм зафегъэхьазыры. Художественнэ пащэр Урысыем, Къэбэртэе-Бэлъ­къарым язаслуженнэ артистэу Те­мыркъэнэ Петр.

ЕмтIылъ Нурбый.