Гъэзетеджэхэм ятворчествэ щыщ
Сэ сишIулъэгъур орэп
КIэлэ ныбжьыкIэр гугъэу Игъогу лъагъо рэкIо. Пшъэшъэ дэхащэм фаеу Ипшъэшъэ унэ макIо. Ау зыдэкIуагъэр гъэры. Гу мэхэ закъор мэгъы. — Сэ сишIулъэгъур орэп, О уигъогогъур сэрэп. СимашIо ибзый плъырхэр Уишъхьантэ сфытегъэпсэнхэп. СигушIо ишIогъэ Iуплъэ СиплъакIэ хэплъэгъошъунэп. УипIэшъхьагъ сшъхьэ щызгъашIоу, Ау нэмыкIыр сишIулъэгъумэ – Уфэена, кIэлэ маф? Сфэшъошэна, симынэф? Тызфэмафэр тифэшъуашэу, Тызфэзафэм тыришъуашэу ТыщыIэнба, щыIэныгъ? КъэдгъэшIэнба, гъэшIэныгъ?
Тхьэ лъапIэм иIэмырышIу
Чъэп ужым дунаир Тыгъэнэпс. Иосэпси псы къабзэу тикIас. Ос ужым дунаир – Фыжьыбз. Ощх ужым дунаир – Рэхьат. КъэкIрэ лъэпкъыр Ащ егъэпыт. Ижьы IэшIуи дунаир – Рыбай. Псэ зыпытым Ар инэхъой. Дунаим идэгъуи, идахи – Тхьэ лъапIэм иIэмырышIу. ШIугъэм зыфэзыщэйрэм ЫшIэнхэу иамалышIу.
Гупсэу къыслъыIэси…
Гупсэу къыслъыIэси, Спсэ уфэзгъэдэн. ГушIопсэу насыпыр Тхьэм къыпфигъэкIон. Тыгъэпсэу къысэплъи, Слъэ къыгъэпсынкIэн. Гунэсэу къэпсалъи, Слъы къыгъэфэбэн.
Сипчъэ къыфэпшIыжьымэ сымыджэуапынчъ
ФыIусхыгъэр шIум сикъэлапчъ. Къеблэгъагъэр шIукIэ мычэфынчъ. СигущыIэ – шIуфаIо – гъунэнчъ. Гуфэбэ–гукIэгъукIэ сымыамалынчъ. Чэфыгъом уезгъэIэтмэ, сымыакъылынчъ. ГушIуагъом ухэзгъэтмэ, сымынасыпынчъ. Сипчъэ къыфэпшIыжьмэ, сымыджэуапынчъ. * * * ГукIэгъу зыхэлъыр – Гу закI. Ар зыхэмылъыр – Гу нэкI. Гу фабэм игъогур – ГушIуагъу. Гу чъыIэм имыIэр – ГукIэгъу.
Хьэшхъуанэкъо-Хъут Сар. Адэмый.