Адыгэ Республикэм иныб­жьы­кIэхэм атлетикэ онтэгъумкIэ язэнэкъокъу Тэхъутэмыкъое рай­оным ипсэупIэу Инэм щы­кIуагъ.

2007 — 2011-рэ илъэсхэм къэхъугъэ кIа­лэхэр, пшъашъэхэр яонтэгъугъэ елъытыгъэу апэрэ чIыпIэхэм афэбэнагъэх.

Пшъашъэхэм язэIукIэгъухэм апэрэ чIыпIэхэр къащыдэзыхыгъэхэм шъуащытэгъэ­гъуазэ. Бэгъушэ Алинэ, Полина Соколовам, Ева Бесовам якупхэм текIоныгъэр къаща­хьыгъ.

КIалэхэр купи 9 хъухэу щылычым ебэныгъэх. Данил Маловым, Андрей Кармановым, Игорь Сорокиным, Быржь Айдэмыр, Ордэкъо Астемир, Гъубжьэкъо Ислъам, Бгъуашэ Асхьад, Цэй Батыр, Святослав Полиным апэрэ чIыпIэхэр къафагъэшъошагъэх.

Апэрэ чIыпIэхэр республикэм изэнэкъокъу къыщыдэзыхыгъэ пшъашъэхэр, кIалэхэр Уры­сыем икIэух зэIукIэгъухэм ахэлэжьэщтых.

— Хэгъэгум изэнэкъокъу 2022-рэ илъэсым, мэзаем къалэу Старый Оскол щыкIощт, — къытиIуагъ Адыгэ Республикэм атлетикэ онтэгъумкIэ испорт еджапIэу Чыржьын Му­хьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан. — Урысыем изэIукIэгъу зыфэдгъэ­хьазырзэ, кIэлэеджакIо пэпчъ иIэпэIэсэныгъэ зэрэхигъахъорэм тылъыплъэщт. Тренерхэм хэушъхьафыкIыгъэ едзыгъохэр зэхащэщтых.

Спортсменхэм, тренерхэм шэнышIу зэрафэхъугъэу, хэгъэгум изэнэкъокъу хэлэжьэнхэу гъогу зытехьэхэкIэ Адыгэ Республикэм ибыракъ зыдаштэщт, хэгъэгум изэIукIэгъу щагъэбыбэтэщт.

Республикэм ыцIэ спортышхом лъагэу щызыIэтырэ спортсменхэм, тренерхэм ягъэ­хъагъэхэм ахагъэхъонэу, гушIуагъо къытфа­хьынэу афэтэIо.

Сурэтым итхэр: зэнэкъокъум апэрэ чIы­пIэхэр къыщыдэзыхыгъэхэр, тренерхэр.