Урысыем дзюдомкIэ и Кубок къыдэхыгъэным фэгъэхьыгъэ зэнэкъокъур Грознэм щыкIуагъ.

Адыгэ Республикэм ихэшыпыкIыгъэ командэ хэт хъулъфыгъэхэр, бзылъфыгъэхэр зэIукIэгъухэм ахэлэжьагъэх.

ЦIыкIу Рэмэзан кг 60, ятIо­нэрэ чIыпIэр зэнэкъокъум къы­щыдихыгъ. Тибатыр алырэгъум бэнэгъуи 4 къыщихьыгъ. Свердловскэ хэкум, Хакасием, Челябинскэ, Москва хэкум ябэна­кIохэм Р. ЦIыкIур атекIуагъ.

Дышъэм икъыдэхын фэгъэ­хьыгъэ зэIукIэгъум Чэчэным щыщ спортсменыр Р. ЦIыкIум къыщытекIуагъ. Адыгеим ибэнакIо ятIонэрэ чIыпIэр къыфагъэшъошагъ.

Дзюдом зыфигъэсэнэу ЦIыкIу Рэмэзан Адыгэкъалэ щыри­гъэжьагъ. Апэрэ тренерыр Шъэумэн Байзэт. Ар ипащэу зэIукIэгъухэм ахэлажьэщтыгъ. Нэужым тренерэу Джармэкъо Рустам ипэщагъ. Р. ЦIыкIум Мыекъуапэ зыщигъасэу зырегъажьэм, тренерэу КIубэ Хьамед пащэ фэхъугъ.

Тренерэу Нэпсэу Бислъан ыгъэсэрэ ПашIо Алый кг 66-рэ къэзыщэчыхэрэм янэкъокъугъ. Къэбэртэе-Бэлъкъарым, Чэчэным, Ульяновскэ хэкум ябэ­накIохэм А. ПашIор атекIуагъ. Ящэнэрэ чIыпIэм икъыдэхын фэгъэхьыгъэ зэIукIэгъум Кемеровэ хэкум къикIыгъэ бэнакIор къыщытекIуагъ. А. ПашIом иапэ­рэ тренерыр Акъущэ Мыхьамод.

Тилъэпкъэгъу бэнакIохэри зэнэкъокъум хэлэжьагъэх. Адыгэ Республикэм изаслуженнэ тренерэу Псэунэ Мурат ыгъэсэрэ ЛIышэ Хьарун Шъхьащэфыжь щапIугъ, иIэпэIэсэныгъэ Ермэлхьаблэ щыхегъахъо. Хь. ЛIышэм, кг 60, ящэнэрэ чIыпIэр къыдихыгъ.

Нэгъуцу Данэ ТIуапсэ зыщегъасэ, ятэу Нэгъуцу Джамболэт тренер-кIэлэегъаджэу иI. Д. Нэ­гъуцум, кг 52-рэ, ящэнэрэ чIы­пIэр къыхьыгъ.

ШъэоцIыкIу Айдэмыр, кг 81-рэ, иапэрэ тренерыр Акъущэ Мыхьамод. А. ШъэоцIыкIур Къырым икомандэ хэтэу бэ­нагъэ, ятIонэрэ чIыпIэр къыди­хыгъ.

—Урысыем и Кубок сэнаущыгъэ зыхэлъ ныбжьыкIабэ фэбэнагъ, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгэ Рес­публикэм дзюдомкIэ ихэшыпыкIыгъэ командэ итренер шъхьа­Iэу Бастэ Сэлымэ. — Тиспорт­сменхэм нахьыбэкIэ тащыгу­гъыщтыгъ. Зэнэкъокъум щыкIагъэу тиIэхэр къыгъэлъэгъуагъэх. Къыхэзгъэщы сшIоигъу сэнаущыгъэ зыхэлъ ныбжьыкIэхэр зэрэдгъасэхэрэр. ЯIэпэIэсэ­ныгъэ хагъэхъонэу тэгугъэ.

Сурэтым итхэр: хагъэунэфыкIырэ чIыпIэхэр къыдэзыхыгъэ­хэр: ЦIыкIу Рэмэзан сэмэгумкIэ апэрэу щыт.