— Лъэпкъ проектхэм щыIэныгъэм зэхъокIыныгъэу къыхалъхьэрэр цIыфхэм зэхашIэн фае. ПсэолъакIэ шIыгъэн е гъэцэкIэжьыгъэн закъор арэп ахэм пшъэрылъ шъхьаIэу яIэр. Лъэпкъ проектхэм яшIуагъэкIэ цIыфхэр анахьэу зыгъэгумэкIыщтыгъэхэр дэгъэзыжьыгъэнхэ фае, — къыIуагъ УФ-м и Президентэу Владимир Путиным.

Илъэсэу икIырэм лъэпкъ проектхэм япхырыщын къиныгъо къыхэзылъхьагъэр уасэхэр зэрэдэкIуаехэрэр ары. Ащ ыпкъ къикIыкIэ зэнэкъокъухэр зэхэщэгъуае хъугъэ, псэолъэшIыныр къызэтырагъэуцо, подрядчикхэм къин адалъэгъу. А зэпстэур къыхигъэщыгъ Президентым. Арэу щытми, лъэпкъ проектхэм къады­хэлъытэгъэ псэуалъэ­хэр зэкIэри игъом атынхэр шIокI зимы­Iэ Iофэу зэрэщытыр къыкIигъэтхъыгъ.

Лъэпкъ проектхэм яшIуагъэкIэ шIагъэ хъугъэхэм уакъытегущыIэмэ… Илъэсищым шъолъыр 78-мэ еджэпIэ 271-рэ кIэу ащашIыгъ. 2024-м ыкIэм нэс джыри 1300-рэ агъэуцунэу щыт. Iоф зышIэрэ еджэпIэ 7300-мэ ягъэкIэжьын илъэситф гухэлъхэм ащыщ.

2018-рэ илъэсым къыщегъэжьагъэу ФАП 1750-рэ субъектхэм ащагъэуцугъ, псэупIэхэр къэзыкIухьэрэ медицинскэ комплексэу миным ехъу афащэфыгъ. КIэлэцIыкIу поликлиникэхэр, адэбз, гу-лъынтфэ узхэм зыщяIэзэхэрэ гупчэхэр агъэкIэжьых. НэмыкIэу лъэ­ныкъо зэфэшъхьафхэмкIэ зэшIохыгъэ хъу­гъэр бэ.

Владимир Путиныр къалэхэм япсэукIэ зынэсыгъэми игугъу къышIыгъ. Ащ къы­зэриIуагъэмкIэ, 2024-рэ илъэсым ыкIэм нэс тыкъэзыуцухьэрэ дунаим иягъэ езыгъэкIырэ псэолъэ щынагъоу 88-рэ агъэкIодынэу планхэм ащыгъэнэфагъ. Ащ фэдэ объект 60-р агъэкIодыгъах, илъэсым ыкIэм нэс джыри 6 Iуахыжьынэу ыуж итых. Зыщымыгъэнэфэгъэ чIыпIэм щагъэпсыгъэ хэкIитэкъупIэ полигон 30 Iуахыжьыгъ, джыри 12 «чэзыум хэт».

— Лъэпкъ проектхэм мэхьэнэшхо яI. Унагъохэм псэукIэ амал дэгъухэр яIэ хъуным, къэлэ щыIакIэр, социальнэ лъэныкъор нахьышIу шIыгъэнхэм, бизнесым амалышIухэр иIэнхэм ахэр фэIорышIэх, — къыкIигъэтхъыгъ къэралы­гъом ипащэ.

Адыгеим мы уахътэм лъэпкъ проект 12-у сомэ миллиарди 5,8-рэ зыуасэр щыпхыращы. Ахэм ыкIи къэралыгъо программэхэм яшIуагъэкIэ псэолъэ зэфэшъхьафыбэ республикэм щашIыгъ е щагъэкIэжьыгъ.

Президентым къыгъэуцугъэ пшъэ­рылъхэр пхырыщыгъэнхэр, пчъагъэу ащ къыгъэнэфагъэхэм къафэкIогъэныр шIокI зимыIэ Iофэу зэрэщытыр АР-м и ЛIышъхьэу КъумпIыл Мурат къыкIигъэтхъыгъ.

— Илъэсыр икIынкIэ къэнагъэр бэп, — къыIуагъ АР-м ипащэ. — IофшIэнхэр игъом тыухынхэм, ахэр шапхъэхэм адиштэу пхырыщыгъэнхэм, къэкIощт илъэсым хэхьэрэ проектхэр тымыгъэгужъонхэм амалэу щыIэр зэкIэ етхьылIэн фае.