Адыгеим и ЛIышъхьэу КъумпIыл Мурат Урысыем щынэгъончъэнымкIэ икъулыкъухэм яIофышIэ и Мафэ фэгъэхьыгъэ зэIукIэ игъэкIотыгъэу тыгъуасэ щыIагъэм хэлэжьагъ.

Iофтхьабзэм джащ фэдэу хэлэжьагъ федеральнэ инспектор шъхьаIэу Сергей Дрокиныр.

ЩынэгъончъэнымкIэ Федеральнэ къулыкъум Адыгэ Рес­публикэмкIэ и ГъэIорышIапIэ ипащэу Сергей Коштановыр ямэфэкIкIэ ведомствэм иIофы­шIэхэм къафэгушIуагъ, псауныгъэ пытэ яIэнэу, хэгъэгум ипа­щэхэм къагъэуцугъэ пшъэрылъхэр гъэхъагъэ хэлъэу агъэцэ­кIэнхэу къафэлъэIуагъ.

Республикэм ипащэу КъумпIыл Мурат ипсалъэ зэрэщы­хигъэунэфыкIыгъэмкIэ, щынэ­гъончъэнымкIэ къулыкъухэм уащылэжьэныр пшъэдэкIыжьы­шхо зыпылъ Iоф къинэу щыт.

«Къэралыгъом ипащэу Владимир Путиным пшъэрылъ къы­гъэуцугъ «шъыпкъагъэр зылъэ­псэ къэбархэр цIыфхэм алъыгъэIэсыгъэным, экстремизмэм- рэ терроризмэмрэ апэуцужьыгъэным лъэш дэдэу анаIэ тыра­гъэтынэу». Социальнэ хъытыу­хэм зэщыгъэкъон Iофхэу ащызэрахьэхэрэм ягъогупэ пы­бзы­кIыгъэн фае. Къолъхьэ тынIыхыным пэуцужьыгъэнымкIэ, шъо­лъырым экономикэ щынэгъончъагъэ илъынымкIэ зэфэ­дэ пшъэ­рылъхэр тиIэх», — къыIуагъ КъумпIыл Мурат.

Адыгэ Республикэм и ЛIы­шъхьэ щынэгъончъэнымкIэ Фе­деральнэ къулыкъум Адыгэ РеспубликэмкIэ и ГъэIорышIа­пIэ иIофышIэхэм «тхьашъуегъэпсэу» ариIуагъ общественнэ-политикэ, социальнэ зыпкъитыныгъэр рес­публикэм къыщыухъумэгъэнымкIэ Адыгеим ихэбзэ къулыкъу­хэм гъусэныгъэ пытэ зэрадыряIэм фэшI. КъумпIыл Мурат къулыкъум иIофышIэхэмрэ иве­теранхэмрэ ясэнэхьат епхыгъэ мэфэкIымкIи, ИлъэсыкIэу къэблагъэрэмкIи афэгушIуагъ.

ЩынэгъончъэнымкIэ Федеральнэ къулыкъум Адыгэ Рес­публикэмкIэ и ГъэIорышIапIэ иIофышIэхэм ащыщхэм къэралыгъо, ведомствэ тынхэр зэIу­кIэм къащаратыжьыгъэх.

АР-м и ЛIышъхьэ ипресс-къулыкъу