Адыгэ сурэтышIхэм ялъэпкъ лъэмыдж
Урысыемрэ Тыркуемрэ яадыгэ сурэтышIхэм ятворчествэ иушэтын КъокIыпIэм щыпсэурэ лъэпкъхэм яискусствэ икъэралыгъо музей и Темыр Кавказ къутамэ иIофышIэхэм лъагъэкIуатэ. Къэралыгъо грантэу къырахыгъэм къыхиубытэу IофшIэнхэр зызэшIуахыхэрэр илъэситIу хъугъэ, къихьащт илъэсми паублэжьын агу хэлъ.
Грантым къыхиубытэрэ Iофтхьабзэхэм адиштэу музеим иIофышIэхэр Тыркуем шэкIогъум и 27-м щыIагъэх. Тхьамафэ фэдизрэ ащ зэрэщылэжьагъэхэм фэгъэхьыгъэ пресс- конференциер музеим щызэхащэгъагъ. Проектым ипащэу, музеим итхьаматэ игуадзэу Сулейманова Фатимэ, ащ иIофшIэгъухэу Къуекъо Жаннэ, ХъокIо Ларисэ, Адыгэ къэралыгъо университетым икIэлэегъаджэу, искусствоведэу Алла Соколовар пресс- конференцием хэлэжьагъэх, журналистхэм яупчIэхэм джэуапхэр къаратыжьыгъэх.
Проектым дэлажьэхэрэм къызэраIотагъэмкIэ, Истамбыл мэфитIурэ щылэжьагъэх. Адыгэ сурэтышIхэу Езел (СтIашъу) Ахьмэд, Ферида Бениджиоглу, Кузай Мамдухьэ, Оздэмыр Мехтап, Эйюп Аташ аIукIагъэх, ятворчествэ нэIуасэ зыфашIыгъ. Абхъаз культурэм и Гупчэ рагъэблэгъагъэх, адыгэ лъэпкъ къашъохэр къэзышIырэ ансамблэм икъэшъуакIохэм зэIукIэгъу адыряIагъ. Нэужым экспедицием хэтхэр Бодрум кIуагъэх. СурэтышI IэпэIасэу, сценаристэу ыкIи продюсерэу Озбек Сэтэнай IукIагъэх. АшIогъэшIэгъонэу итворчествэ зыщагъэгъозагъ, иIэшIагъэхэр шэпхъэ лъагэмэ зэрадиштэрэр хагъэунэфыкIыгъ. КIэухым музеим иIофышIэхэр Анкара мэфищырэ щыIагъэх, зэшыпхъухэу Беданэкъо Миральрэ Мелэчхъанрэ аIукIагъэх. Мираль — сурэтышI, цIыфхэм ясурэтхэм, пейзажхэм яшIынкIэ IэпэIас. Мелэчхъан — дизайнер-модельер. Адыгэ тхыпхъэхэм игъэкIотыгъэу адэлажьэ. 2011-рэ илъэсым Адыгеим щыкIогъэ къэгъэлъэгъонэу дышъэидагъэм, адыгэ Iэпэщысэхэм афэгъэхьыгъэм ар хэлэжьэнэу хъугъэ.
Анкара къэтыфэхэ тимузей иIофышIэхэр апшъэрэ еджапIэхэм япрофессорхэу Шениз Аксой, Гюзин Алтан аIукIагъэх. ЗэIукIэгъухэр адыгабзэкIэ, инджылызыбзэкIэ, тыркубзэкIэ рагъэкIокIыщтыгъэх. Адыгэ сурэтышIэу Тыркуем щыпсэухэрэм афэгъэхьыгъэ IофшIэгъэ икъу, IофшIэгъэ хьалэмэт тиушэтакIохэм къахьыжьыгъ. Электроннэ хъарзынэщым ар рагъэкIужьыщт, энциклопедиеу къыдагъэкIыщтым дагъэхьащт. Проектым къыдилъытэу музеим иIофышIэхэр Къэбэртэе-Бэлъкъарым ыкIи Къэрэщэе-Щэрджэсым джыри кIонхэу щыт. Къихьащт илъэсым шышъхьэIум иапэрэ мафэ ехъулIэу Тыркуем иадыгэ сурэтышIхэу Езел Ахьмэд, Фериде Бениджиоглу, Кузай Мамдухьэ якъэгъэлъэгъонхэр КъокIыпIэм щыпсэурэ лъэпкъхэм якъэралыгъо музей и Темыр Кавказ къутамэ щызэхащэныр проектым кIэух фэхъущт.
Тэу Замир.