Апшъэрэ лигэм ия 2-рэ куп хэт хъулъфыгъэ во­­лейбол командэхэм яешIэгъухэр Воронеж щэкIох.

— Я 4-рэ едзыгъом хэхьэрэ ешIэгъухэм тахэлажьэ, — къытиIуагъ Мыекъопэ «Динамо- МГТУ-м» итренер шъхьаIэу, Адыгэ Республикэм изаслуженнэ тренерэу Павел Зборовскэм. — Зэнэкъокъум апэрэ чIыпIищыр щызыIыгъ командэхэм тадешIэ.

ЗэIукIэгъухэр

«Динамо-МГТУ» Мыекъуапэ – «Обнинск» Обнинск – 2:3 (25:17, 25:20, 18:25, 17:25, 12:15). Тыгъэгъазэм и 16-м Воронеж щызэIукIагъэх.

Мыекъуапэ икомандэ ешIэгъур дэгъоу ригъэжьагъ. Апэрэ едзыгъуитIумэ текIоныгъэр къащи­хьыгъ. ТиешIакIохэр текIоныгъэм пэблэгъагъэх, ау зэIукIэгъум къырыкIон ылъэкIыщтыр зыIэкIагъэкIыгъ. КIуачIэу, ухьазырыныгъэу яIэр текIоныгъэм фагъэIорышIэн алъэкIыгъэп.

«Кристалл» Воронеж – ЦОП Краснодарский край – 3:0 (25:10, 25:19, 25:15).

ЧIыпIэхэм шъузэпяплъ

1. «Обнинск» — 27 2. «Дагъыстан» — 24 3. «Кристалл» — 22 4. «Динамо-МГТУ» — 18 5. «Ставрополь» — 15 6. «Ростов-Волей» — 15 7. «Динамо» Иж – 10 8. «Грозный-2» — 3 9. ЦОП – 3 10. «Тюмень» — 1. «Динамо-МГТУ-м» ешIэгъуи 10 иIагъ. ЗэIукIэгъуи 6-р къыхьыгъ, 4-р шIуахьыгъ.

Тыгъэгъазэм и 17-м «Динамо-МГТУ-р» «Кристалл» Воронеж дешIагъ. Тыгъэгъазэм и 19-м зичэзыу ешIэгъухэр Воронеж щаухыщтых.