«Ислъамыем» ишIушIэ пчыхьэзэхахь
Урысыем, Адыгеим, Къэрэщэе-Щэрджэсым янароднэ артистэу, композиторэу Нэхэе Аслъан цIыфхэм япсауныгъэ къэухъумэгъэныр Iофыгъо шъхьаIэхэм ащыщэу елъытэ.
— Зэпахырэ узэу дунаир зэлъызыкIугъэм гумэкIыгъуабэ къытфихьыгъ, — къытиIуагъ Адыгэ Республикэм и Къэралыгъо орэдыIо-къэшъокIо ансамблэу «Ислъамыем» ихудожественнэ пащэу, композиторэу Дмитрий Шостакович ыцIэкIэ агъэнэфэгъэ шIухьафтыныр къызыфагъэшъошагъэу Нэхэе Аслъан. — Апэрэ мафэхэм къащегъэжьагъэу узым пэуцугъэхэу цIыфхэм япсауныгъэ медицинэм иIофышIэхэм къаухъумэ. ШIушIагъэу яIэр дгъэлъапIэзэ, ящытхъу тIоныр яфэшъуашэу сэлъытэ.
— Аслъан, тыгъэгъазэм и 17-м медицинэм иIофышIэхэм шIушIэ концерт къафэшъутынэу ишъухъухьагъ. Зэхахьэм кIэщакIо узэрэфэхъугъэр тэшIэ.
— Медицинэм иIофышIэхэм афэмышIапхъэ щыIэп. Адыгэ Республикэм псауныгъэм икъэухъумэнкIэ иминистрэу Мэрэтыкъо Рустем, ащ иIофшIэгъухэр гъусэ къытфэхъухи, шIушIэ концертыр зэхэтщэнэу итхъухьагъ.
— «Ислъамыем» иартистхэм орэд къаIощт, къэшъощтых. Сыда ащ нэмыкIэу цIыфхэм яшъуIощтыр?
— Медицинэм иIофышIэхэм фэбагъэ зыхэлъ гущыIэу зэхядгъэхы тшIоигъор макIэп. ОшIа, сымаджэр ылъэ теуцон ымылъэкIэу врачыр къызекIуалIэкIэ, мэгугъэ, IэпыIэгъоу къыратыщтым ежэ. Ынэгу ымылъэгъурэми, ынэхэм яплъын елъэкIы. Сымаджэмрэ врачымрэ зэгурыIоныгъэу азыфагу илъым къыпкъырыкIырэ зэдэгущыIэгъум нэбгыритIури егъэгъуазэ. Сымаджэр кIочIэгъу зыфэхъужьы, псауныгъэр нахьышIу зэрэхъущтым егупшысэ. ЦIыфхэм ятIо тшIоигъу медицинэм иIофышIэхэр щыIэныгъэм иухъумакIохэу зэрэщытхэр.
— Артистхэм къаIощт орэдхэр къыхэшъухыгъэха?
— Медицинэм иIофышIэхэм нахь агу рихьыхэрэр, лъэпкъ искусствэм ехьылIагъэхэр, «Ислъамыем» ирепертуар хэтхэр къафэтIощтых.
— Орэдым цIыфыр епIу, щыIэныгъэм фегъасэ.
— Ар къыдэтлъытэзэ, псауныгъэр къэзыухъумэхэрэм таIукIэщт. Орэдыр — тиадыгабз, орэдыр — тигупшыс. Искусствэм ыбзэкIэ зэкIэ медицинэм иIофышIэхэм талъыIэсын тимурад.
— Медицинэм щылажьэхэрэм гуетыныгъэ ин ахэлъ, ау ахэри IэпыIэгъу зищыкIагъэхэм ащыщхэу олъытэба?
— Сэлъытэ. Апэрэ IэпыIэгъур вакцинэр цIыфхэм зыхалъхьаным къыщежьэ. Врачхэм къаIорэм тедэIу, дгъэцакIэ зыхъукIэ, тигумэкIхэр нахь макIэ хъущтых.
— Лъэхъэнэ къинэу тызхэтым «Ислъамыем» концертхэр зэпигъэухэрэп.
— «Ислъамыер» зызэхэтщагъэр мыгъэ илъэс 30 хъугъэ. Адыгеим ирайонхэм, къалэхэм концертхэр къащыттыгъэх.
— Адыгэ Республикэм «Ислъамыер» илэгъу. Ансамблэм сыда анахьэу къыдэхъугъэр?
— Ижъырэ адыгэ орэдхэм ятIонэрэ щыIакIэр ятэтыжьы, лъэхъаным диштэхэу ансамблэм къеIох. Урысыем и Правительствэ ипремие «Ислъамыем» къыфагъэшъошагъ. Гъогу тэрэз тытетэу тапэкIэ тызэрэлъыкIуатэрэр щыIэныгъэм къегъэлъагъо.
— Дунаим щыпсэурэ адыгэхэм тилъэпкъ орэдхэр зэхахых.
— Адыгэ Республикэм и ЛIышъхьэу КъумпIыл Мурат, Правительствэм, Парламентым тафэраз. Ахэр тиIэпыIэгъухэу тимурадхэм тафэкIо. Ижъырэ адыгэ орэдхэм ядэхагъэ тиконцертхэм къащытэгъэлъагъо. ТшIогъэшIэгъонэу къыхэзгъэщмэ сшIоигъор концертхэм адыгэхэм ямызакъоу, урысхэр, къэзэкъхэр, къэндзалхэр, урымхэр, нэмыкI лъэпкъхэри ягуапэу зэряплъыхэрэр ары. Искусствэм лъэпкъхэр зэрэзэфищэхэрэр «Ислъамыем» ипчыхьэзэхахьэхэм ащытэлъэгъух. Искусствэр зышIогъэшIэгъонхэр типчыхьэзэхахьэ къетэгъэблагъэх. ТиорэдхэмкIэ, къашъохэмкIэ, лъэпкъ произведениехэмкIэ дгъэгушIохэ тшIоигъу.
— Шъуигухэлъхэр къыжъудэхъунхэу шъуфэтэIо.
— Тхьауегъэпсэу.
ЕмтIылъ Нурбый.