Адыгэ Республикэм терроризмэм пэуцужьыгъэнымкIэ икомиссие изэхэсыгъоу Адыгеим и ЛIышъхьэу КъумпIыл Мурат тыгъуасэ тхьамэтагъор зыщызэрихьагъэм ИлъэсыкIэ мэфэкIхэм ялъэхъан цIыфхэр жъугъэу зыщызэIукIэрэ чIыпIэхэр щынэгъончъэу зэрэщытыщтхэм япхыгъэ Iофыгъохэм щатегущыIагъэх.

Адыгэ Республикэм и МВД иполицие ипащэ игуадзэу Андрей Федосеевым зэхэсыгъом къызэрэщиIуагъэмкIэ, мэфэкIхэм ялъэхъан хэбзэукъоныгъэхэр амышIынхэм, бзэджэшIагъэхэр зэрамыхьанхэм атегъэпсыхьэгъэ Iофтхьабзэхэр республикэм ихэбзэухъумэкIо къулыкъухэм зэрахьэх.

Урысые Федерацием щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипащэу Сергей Каштановым зэрэхигъэунэфыкIыгъэмкIэ, бзэджэшIагъэхэр зезыхьан зылъэкIыщтхэу учетым хэтхэм участковэхэр зэралъыплъэхэрэм мэхьанэшхо иI.

Республикэм и ЛIышъхьэ АР-м и МВД пшъэрылъ фишIыгъ терро­ризмэмрэ экстремизмэмрэ апэ­уцужьыгъэнымкIэ Iофэу ашIэрэр агъэлъэшынэу. Джащ фэдэу цIыфхэр зэрэкощхэрэм гъунэ зэрэлъафырэм, лъэпкъ-культурнэ, общественнэ объединениехэм зэдэлэжьэныгъэу ады­ряIэм япхыгъэ Iофыгъохэми ахэплъагъэх.

Урысыем и МЧС АдыгеимкIэ и ГъэIорышIэпIэ шъхьаIэ ипащэу Станислав Илющенкэм ИлъэсыкIэ мэфэкI Iофтхьабзэхэр зыщы­зэхащэрэ чIыпIэхэр зэрауплъэ­кIущтхэр къыIуагъ. Тыгъэгъазэм и 20-м къыщыублагъэу Урысыем и МЧС АР-мкIэ и ГъэIорышIэпIэ шъхьаIэ гъэлъэшыгъэ шIыкIэм тетэу Iоф ышIэщт.

«ЦIыфхэм мэфэкIхэм зафагъэхьазырэу, петардэхэр ыкIи нэмыкI пкъыгъохэр къащэф­хэу аублагъ. Джащ пае уплъэ­кIун Iофтхьабзэхэр псынкIэу зэрахьанхэ фае. Заводхэм къадамыгъэкIыгъэ продукцием зэрар къарихын зэрилъэкIыщтыр къыдалъытэн фае, ар ащэ хъущтэп», — къыIуагъ КъумпIыл Мурат.

Мыекъуапэ мэфэкIхэм зэра­фэ­хьазырми зэхэсыгъом щытегущыIагъэх. Адыгеим и ЛIышъхьэ пшъэрылъ афишIыгъ район гупчэхэмрэ псэупIэхэмрэ ягъэ­кIэрэкIэн агъэпсынкIэнэу. Джащ фэдэу муниципалитетхэмрэ ведомствэхэмрэ игъо афалъэгъугъ коммунальнэ къулыкъухэр зэрэхьазырхэр ауплъэкIунэу.

Терроризмэм пэуцужьыгъэнымкIэ 2021-рэ илъэсым телъы­тэгъэ Iофтхьабзэхэр зэрагъэцакIэхэрэм якIэуххэм АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет итхьаматэу Шъхьэлэхъо Аскэррэ Адыгэ Республикэм гъэсэныгъэмрэ шIэныгъэмрэкIэ иминистрэ игуа­дзэу Евгений Лебедевымрэ къатегущыIагъэх. Мы илъэсым къэбар жъугъэм иреспубликэ амалхэм терроризмэмрэ экстре­мизмэмрэ апэуцужьыгъэнымкIэ тхыгъэ 350-м ехъу къары­хьагъ.

Илъэсыр къызихьагъэм щегъэ­жьагъэу террористхэмрэ экстремистхэмрэ амыгъэплъэхъунхэм атегъэпсыхьэгъэ Iофтхьэбзэ мини 2,4-рэ фэдиз республикэм щызэрахьагъ. КIэлэеджэкIо, студент мин 55-м ехъу ахэм къахарагъэубытагъ.

Шэуджэн, Кощхьэблэ районхэм терроризмэм пэуцужьыгъэ­нымкIэ якомиссиехэм 2021-рэ илъэсым Iофэу ашIагъэр зэхэсыгъом икIэух щызэфахьысыжьыгъ.

АР-м и ЛIышъхьэ ипресс-къулыкъу