Фэбагъэу ахэлъым уегъэгупсэфы
Къыблэм щызэлъашIэрэ сурэтышIэу, тарихълэжьэу Лариса Ушаковам тыкъэзыуцухьэрэ дунаим идэхагъэ фэгъэхьыгъэ IофшIагъэу къыгъэнагъэхэм якъэгъэлъэгъон Мыекъуапэ къыщызэIуахыгъ.
КъокIыпIэм щыпсэурэ лъэпкъхэм искусствэхэмкIэ я Къэралыгъо музей и Темыр-Кавказ къутамэ ипащэу ШъэуапцIэкъо Аминэт зэхахьэр зэрищагъ.
Лариса Ушаковар къалэу Грознэм къыщыхъугъ. Ростов къэралыгъо кIэлэегъэджэ апшъэрэ еджапIэм художественнэ графикэмкIэ ифакультет къыухыгъ. Къыблэ федеральнэ университетым икафедрэ ипащэу 2012-рэ илъэсым къыщыублагъэу Iоф ышIагъ.
Урысыем исурэтышIхэм я Союз хэтэу Л. Ушаковам живописым, графикэм иIэпэIэсэныгъэ къащызэIуихыгъ. Урысыем культурэмкIэ изаслуженнэ IофышI, профессор. Я XVIII — XX-рэ лIэшIэгъухэм дунаим исурэтышI анахь цIэрыIохэм ахалъытагъ.
Игъонэмысэу ищыIэныгъэ ыухыгъэми, искусствэм IофшIэгъэ ин къыщигъэнагъ. Адыгэ Республикэм культурэмкIэ и Министерствэ иотдел ипащэу Шэуджэн Бэлэ зэхахьэм къыщиIуагъ Л. Ушаковам исурэтхэм фэбагъэ зэрахэлъыр. ЩыIэныгъэм изытет къыраIотыкIы.
«Пчыхьэм иорэдышъу», «ХыIушъомрэ чъыгхатэмрэ», «Щагу псэупIэр», фэшъхьаф сурэтхэр шъо зэфэшъхьафхэмкIэ гъэкIэрэкIагъэх. Щагум итеплъэ къэзыгъэлъэгъорэ сурэтыр адыгэ къуаджэм щытлъэгъухэрэм ятэгъапшэ. Унэр, чъыгхэр, къэгъагъэхэр, фэшъхьафхэри зэдештэх, гупсэ-фыпIэу зэрэщытхэм къегъэдахэх.
Адыгэ Республикэм исурэтышIхэм я Союз ипащэу Елена Абакумовар, республикэм исурэтышI цIэрыIохэу Эдуард Овчаренкэр, Хъуажъ Рэмэзан зэхахьэм къыщыгущыIагъэх. Л. Ушаковар искусствэр зыгъэбаигъэ сурэтышIхэм зэращыщыр къыхагъэщыгъ.
Лариса Ушаковам исурэт 58-рэ музеим къыщагъэлъагъо. Зэхахьэм студентхэр, искусствэхэмкIэ еджапIэхэм защызыгъасэхэрэр, кIэлэегъаджэ- хэр хэлэжьагъэх. Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм икIэлэегъаджэу, сурэтышI IэпэIасэу Абрэдж Гощэфыжь къыIуагъ Лариса Ушаковам тыкъэзыуцухьэрэ дунаир дахэу сурэтхэмкIэ къызэригъэлъэгъуагъэр. Ащ иэскизхэмкIэ Кипр итарихъ музей агъэкIэрэкIагъ. Хэгъэгу, дунэе къэгъэлъэгъонхэм щытхъуцIэхэр къащыдихыгъ.
2022-рэ илъэсым, щылэ мазэм и 9-м нэс музеим къэгъэлъэгъонхэр щыкIощтых.