Дунаим самбэмкIэ гъогогъу 11 дышъэр къыщыдэзыхыгъэу, Урысыем и Къэралыгъо Думэ идепутатэу Хьасанэкъо Мурат фэгъэхьыгъэ зэнэкъокъур Мыекъуапэ щыкIуагъ.

Къэбэртэе-Бэлъкъарым, Къэрэщэе-Щэрджэсым, Къалмыкъым, Краснодар краим, Санкт-Петербург, Нижний Новгород, Къырым, нэмыкIхэм яныбжьыкIэхэу илъэс 18-м нэс зыныбжьхэр самбэмкIэ зэнэкъокъугъэх.

Адыгэ Республикэм физкультурэмкIэ ыкIи спортымкIэ и Коми­тет итхьаматэу Дэгужъые Мурат ти ЛIышъхьэу КъумпIыл Мурат, Правительствэм ацIэкIэ зэнэкъо­къум икъызэIухын фэгъэхьыгъэ зэхахьэм къыщыгущыIагъ. Хьасанэкъо Мурат дунэе зэIукIэгъу­хэм ахэлажьэзэ Урысыем щытхъур къызэрэфихьыгъэр, Адыгэ Республикэр спортышхом лъагэу зэрэщиIэтыгъэр хигъэунэфыкIыгъ, бэнакIохэм зэнэкъокъум гъэхъагъэ щашIынэу афэлъэIуагъ.

Дунэе спортым итарихъ шIукIэ хэхьэгъэ Хьасанэкъо Мурат зэ­IукIэгъухэу Мыекъуапэ щыкIуагъэ­хэм ахэлэжьагъэхэм гущыIэгъу афэхъугъ, зэхэтхэу нэпэеплъ сурэтхэр атырахыгъэх.

Дунаим самбэмкIэ изэнэкъокъу апэрэ чIыпIэр къыщызыхьыгъэхэ Мэрэтыкъо Сахьид, Абрам Агамирян, республикэм самбэмкIэ испорт еджапIэ ипащэу Делэкъо Адам, нэмыкIхэри зэхахьэм хэлэжьагъэх. Урысыем, Адыгеим язаслуженнэ тренерэу Хъот Юныс зэIукIэгъур зэрищагъ.

Адыгеим ибэнакIохэр яIэпэIэсэныгъэкIэ зэнэкъокъум къыщыхэщыгъэх. ЗэIукIэгъухэр зэрэкIуагъэхэр «Адыгэ макъэм» къыщыхэтыутыщт.