«Налмэсыр» уахътэм пхырэкIы»
Адыгэ Республикэм и Къэралыгъо академическэ лъэпкъ къэшъокIо ансамблэу «Налмэсыр» зызэхащагъэр илъэс 85-рэ хъугъэ.
Дунаим щыцIэрыIо «Налмэсым» июбилей фэгъэхьыгъэ пчыхьэзэхахьэхэр Адыгеим имызакъоу, Къыблэм, Темыр Кавказым, нэмыкIхэм ащызэхещэх. «Налмэсыр» уахътэм пхырэкIы» зыфиIорэ юбилей зэхахьэхэр едзыгъуи 3 мэхъух.
ЯтIонэрэ едзыгъор мы мафэхэм Мыекъуапэ щыкIуагъ. «Налмэсыр» уахътэм пхырыкIызэ, ансамблэм къыкIугъэ гъогур къашъохэмкIэ къегъэлъагъо. Оркестрэм ыгъэжъынчырэ орэдышъохэмрэ лъэпкъ къашъохэмрэ зэкIэлъэкIох, зэхэгъэщагъэх.
Къашъо пэпчъ, музыкальнэ едзыгъохэм «Налмэсым» итарихъ ухащэ. Къашъор къызыщашIыщтыгъэ уахътэр гум къэогъэкIыжьы, артистэу пчэгум щыуджыщтыгъэхэр, къашъом псэ къыпызыгъакIэщтыгъэхэр нэгум къыкIэуцох.
Тыркуем щыпсэурэ тилъэпкъэгъухэм якъашъо къашIы Адыгэ Республикэм изаслуженнэ артисткэу Бэрзэдж Дианэрэ артистэу ЛIыIупэ Амиррэ. Пэсэрэ адыгэ къашъоу «Ислъамыер» Бэрзэдж Дианэрэ Къонэ Мыхьамэдрэ къагъэлъэгъуагъ.
«ШIуфэс къашъом» икIэщакIох Адыгэ Республикэм инароднэ артисткэу Хьакъуй Анжеликэ, Адыгэ Республикэм изаслуженнэ артистхэу Бэрзэдж Дианэ, Едыдж Гушъао.
Къашъохэу «Налмэс-налкъутэр», «Налмэсыр къэшъо» зыфиIохэрэр, нэмыкIхэри ансамблэм ипчыхьэзэхахьэ къыщигъэлъэгъуагъэх. Адыгэ шъошэ кIэракIэхэр ащыгъэу къэшъуакIохэм «Адыгэ уджхэр» дахэу къашIыгъэх. Зэхэпхъэгъэ къашъохэм адыгэхэм ятарихъ ухащэ. Шэн-хабзэхэр, гум иорэд хъугъэ мэкъамэхэр гъэшIэгъоных. Артистхэр нэгушIохэу мэуджых, къашъор зыгъэбаирэ пычыгъохэр зэдырагъаштэзэ къашIых.
— «Налмэсыр» уахътэм пхырэкIы» зыфиIорэ проектым иедзыгъуи 2 Мыекъуапэ къыщыдгъэлъэгъуагъ, — къытиIуагъ Урысыем, Абхъазым, Пшызэ язаслуженнэ артистэу, Адыгэ Республикэм инароднэ артистэу Хъоджэе Аслъан. — Ящэнэрэ едзыгъор тэгъэхьазыры.
«Налмэсым» апэрэ ыкIи ятIонэрэ едзыгъохэр тыгъэгъазэм и 14 – 15-м Къэбэртэе-Бэлъкъарым икъэлэ шъхьаIэу Налщык къыщишIыщтых. Ящэнэрэ едзыгъор 2022-рэ илъэсым мэзаем Мыекъуапэ къыщигъэлъэгъощт. «Налмэсым» шIушIэ пчыхьэзэхахьэхэр Адыгэ Республикэм икъалэхэм, къуаджэхэм къащетых.