Зэнэкъокъу зэхащэщт
Адыгеир загъэпсыгъэр илъэси 100 зэрэхъурэм ихэгъэунэфыкIын къыдыхэлъытагъэу Урысыем икинематографистхэм я Союз икъутамэу республикэм щыIэм фильмхэм язэнэкъокъоу «Мыекъуап, шIу усэлъэгъу!» зыфиIорэр ригъэкIокIыщт.
Iофтхьабзэм изэхэщэнкIэ IэпыIэгъу къафэхъух Адыгэ Республикэм культурэмкIэ ыкIи гъэсэныгъэмрэ шIэныгъэмрэкIэ иминистерствэхэр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет, муниципальнэ гъэпсыкIэ зиIэ «Къалэу Мыекъуапэ» культурэмкIэ и ГъэIорышIапIэ.
Зэнэкъокъум пшъэрылъ шъхьаIэу иIэр — культурнэ проектхэм ныбжьыкIэхэр афэщэгъэнхэр, кинематографием ылъэныкъокIэ сэнаущыгъэ зыхэлъхэр къыхэгъэщыгъэнхэр ыкIи IэпыIэгъу афэхъугъэныр.
Фаехэр зэкIэ зэнэкъокъум хэлэжьэнхэу къырагъэблагъэх. Мыекъуапэ иурамхэм къащыхъугъэхэр е къащыхъун ылъэкIыщтхэр, тарихъ хъугъэ-шIагъэхэр, мыщ щыпсэурэ цIыфхэм ящыIакIэ къизыIотыкIырэ фильмхэр зэхэщакIохэм къафэжъугъэхьын амал шъуиI.
Фильмхэр джэгукIэ шIыкIэу, документальнэу е анимационнэу техыгъэнхэ ылъэкIыщт, ащ икIыхьагъэ такъикъ 20-м шIокIы хъущтэп. IофшIагъэхэр 2021-рэ илъэсым тыгъэгъазэм и 15-м нэс аштэщтых. Ахэр электроннэ почтэу «lera.osyka@bk.ru» зыфиIорэм къэжъугъэхьынхэ шъулъэкIыщт. Телефон номерыр: 8(952) 857-91-33.
ТекIоныгъэр къыдэзыхыгъэхэм дипломхэр ыкIи шIухьафтынхэр афагъэшъошэщтых. Фильмэ анахь дэгъухэр сборникэу «Мыекъуап, шIу усэлъэгъу!» зыфиIорэм хэхьащтых.