Ищытхъу лъагэу зерэIэт
Урысыем культурэмкIэ и Мафэхэр Боснием ыкIи Герцеговинэм шэкIогъум и 21 — 23-м щыкIуагъэх. Ансамблэу «Уджыр» зэхахьэхэм ахэлэжьагъ.
Къалэу Сараево щызэхащэгъэ лъэпкъ Iофтхьабзэм кIэщакIо фэхъугъэх Урысыем культурэмкIэ и Министерствэ, Урысыем ипосольствэу Боснием ыкIи Герцеговинэм (БиГ-м) щыIэр. Сараево илъэпкъ театрэ зэхэщэн IофыгъохэмкIэ IэпыIэгъу къафэхъугъ.
Тихэгъэгу икультурэ и Мафэхэу Боснием ыкIи Герцеговинэм щыкIуагъэхэм Урысыем щыпсэурэ лъэпкъхэм якультурэ зэрэбаир, шэн-хабзэу яIэр къызэраухъумэрэр игъэкIотыгъэу къыщагъэлъэгъуагъ.
Анахь дэгъухэр хэлэжьагъэх
Урысыем икультурэ и Мафэхэм тихэгъэгу ифольклор ансамблэ анахь дэгъухэр рагъэблэгъагъэх. Концертым икъызэIухын, изэфэшIыжьын яIэпэIэсэныгъэ къыщигъэлъэгъуагъ Тэхъутэмыкъое районым адыгэ музыкальнэ IэмэпсымэхэмкIэ илъэпкъ ансамблэу «Уджым».
Башкортостан и Къэралыгъо академическэ лъэпкъ къэшъокIо ансамблэу Файзи Гаскаровым ыцIэ зыхьырэр, Санкт-Петербург урыс ыкIи балкан лъэпкъ музыкэмкIэ иансамблэу «Добраночь» зыфиIорэр Сараево щыуджыгъэх.
«Хэгъэгу анахь дах» зыфиIорэ къэгъэлъэгъоныр Урысыем географиемкIэ иобществэ ыгъэхьазырыгъ. Урысыем ичIыгу, ичIыопс ядэхагъэ сурэтхэмкIэ къагъэлъэгъуагъ. Iэнэ хъураер лъэпкъхэм язэфыщытыкIэхэр гъэпытэгъэнхэм, ягушъхьэ кIуачIэ зегъэушъомбгъугъэным, якультурэ къызэфаIотэным афэгъэхьыгъагъ.
Культурэм иIофшIапIэхэм, тхылъеджапIэхэм, музейхэм япащэхэм яеплъыкIэхэр къаIотагъэх. Студентхэм апае IэпэIасэм иеджапIэ зэхащагъ, фольклор ансамблэхэм концерт къатыгъ.
ОрэдыIохэр, къэшъуакIохэр
Адыгэ музыкальнэ Iэмэ-псымэхэмкIэ лъэпкъ ансамблэу «Уджым» иконцертхэм ахэлэжьагъэх Адыгеим изаслуженнэ артистэу Ацумыжъ Адам, адыгэ къэшъокIо ансамблэу «Адыгэхэм» яартистхэу Нащ Асфар, Алышэ Руслъан, ЕкъутэкI Тимур.
«Уджыр» 1993-рэ илъэсым зэхащагъ. Адыгэ Республикэм изаслуженнэ артистэу Къэлэкъутэкъо Инвер ансамблэм ихудожественнэ пащ. Лъэпкъ проектэу «Культурэм» хэлажьи, лъэпкъ самодеятельнэ купхэм язэнэкъокъу текIоныгъэр къыщыдихыгъ, грантэу сомэ миллиони 2 къыфагъэшъошагъ.
Тыркуем, Урысыем икъалэхэм ансамблэр ащыIагъ, концертхэр къащитыгъ.
— Урысыем итворческэ купхэм яфестиваль-зэнэкъокъу 2021-рэ илъэсым, тыгъэгъазэм Москва щыкIонэу щыт, — къытиIуагъ Тэхъутэмыкъое районым иадминистрацие культурэмкIэ и ГъэIорышIапIэ ипащэу, Адыгэ Республикэм искусствэхэмкIэ изаслуженнэ IофышIэшхоу Ацумыжъ Рустам. — «Уджым» хэгъэгум изэхахьэ зыфегъэхьазыры.
Сараево щызэхащэгъэ Iофтхьабзэхэм Ацумыжъ Рустам ахэлэжьагъ. «Уджым» къызэрэщытхъугъэхэм дакIоу, адыгэ шэн-хабзэхэр бысымхэм, хьакIэхэм ашIогъэшIэгъонхэу зэрэщытыгъэхэр Р. Ацумыжъым къыIотагъ.
Ансамблэм хэтхэм, «Уджым» IэпыIэгъу къыфэхъухэрэм художественнэ пащэу Къэлэкъутэкъо Инвер афэраз, гъэзетымкIи «тхьашъуегъэпсэу» ариIожьы шIоигъу.
— Фестивальхэм, зэIукIэгъухэм тахэлэжьэнымкIэ Адыгэ Республикэм культурэмкIэ иминистрэу Аулъэ Юрэ ишIогъэшхо къытигъэкIыгъ. Творчествэм зедгъэушъомбгъуным фэшI тиамалхэм къахэхъуагъ, — игупшысэхэм тащигъэгъозагъ Къэлэкъутэкъо Инвер. — IэкIыб къэрал укIуа-гъэу концертым хэушъхьафыкIыгъэу Iэгу къыщыпфытеохэ зыхъукIэ, «Уджым» имызакъоу, тилъэпкъ, Адыгэ Республикэм къафэгушIохэу сэлъытэ.
«Уджым» тапэкIи тигъэгушIонэу, Адыгэ Республикэм ищытхъу искусствэм нахь лъагэу щиIэтынэу тыфэлъаIо.